如果大家去厭咗「大阪、京都」嗰啲倒模一樣嘅景點，而又喜歡親親大自然同動物嘅朋友，今次呢篇一定啱晒你，「Janohire淡路海豚農場」可以近距離睇同接觸海豚🐬，最重要喺係露天嘅海岸邊睇，同係海洋樂園睇有好大分別，附近嘅「漩渦之丘大鳴門橋紀念館」，有對住「嗚門海峽」嘅超巨型洋蔥可打卡🧅，館內又有美食、手信可品嚐、選購，洋蔥控嘅朋友千萬唔好錯過......
全文內容
乘搭大型観潮船 わんだーなると（Wonder Naruto）睇完「鳴門漩渦」後，我哋就繼續開車經「大鳴門橋」出發嚟到「淡路島」，我哋之前幾年都曾經嚟過「淡路島」，不過嗰次就由「神戶」過嚟，而今次就由「德島」過嚟，今日嚟到「淡路島」嘅第一個景點就係 ～
Janohire淡路海豚農場
MAPCODE ：
406 251 360 *08
地址：兵庫縣南淡路市安縵鹽谷町2660號656-0543
電話：：799-50-3353
營業時間：各項體驗時間請看下面附表
停車收費：免費
🔻公共交通：
▶️🚌 由「香川」出發嘅交通攻略
▶️喺「高松駅高速巴士總站」（高松駅高速バスターミナル）買飛嘅時候，揀去《福良 (Fukura)巴士路線》，呢個係「淡路島南端」嘅主要巴士總站，亦係去「Janohire海豚農場」嘅必經中轉站
▶️由「高松」去「福良」，車程大約2.5至3小時（視乎班次同中途停站，如果經「洲本」嘅話會耐少少）
▶️到達「福良巴士總站」之後，你需要轉乘的士。由「福良」去「Janohire」大約10分鐘車程，的士費大約1,200至1,500円左右。你喺「福良巴士總站」外面可以搵到的士站，如果無車嘅話，可以請站務員或者附近嘅觀光案內所幫手call車
🚨 重要提示：由「福良巴士總站」去「Janohire」係無直達嘅巴士路線，所以一定要搭的士！建議你預先喺手機save低Janohire嘅地址或者電話，方便俾司機睇
由「鳴門観光汽船」開車行駛23.6公里約29分鐘就可以到達，無得揀不收費道路，因為一定要經過「大嗚門橋」，而「大嗚門橋」屬於「神戸淡路鳴門自動車道」，呢段路俾現金就要￥1,200円，用ETC平日收費￥690円，星期六、日、假期ETC收費￥580円
.webp)
下圖就係今日嘅行程
有免費停車位，呢個地方自駕會比較方便，「日本」3連休真係唔講得笑，唔係大熱嘅景點都泊咗唔少車
呢個農場其實係「淡路Janohire戶外度假村」嘅一部分，個地理位置真係一絕，對住個大海，吹住海風同海豚玩，真係諗吓都覺得正💕
呢度唔止淨係可以睇海豚，仲有好多其他嘅項目，好似停車場呢邊就對住馬場，可以騎馬㗎
每一個體驗項目，都設有不同嘅售票處，要睇清楚想玩啲乜，先至行去買票
我哋嚟呢度最主要係睇海豚，向海邊走就一定唔會錯
呢個檔口上面寫滿好多海鮮嘅名稱，大家心想呢度難度仲有魚市場？
其實係因為呢度有釣魚場🎣，釣到嘅漁獲可交由園區餐廳處理，會提供宰殺、冰鮮、以及烹調（處理漁獲會收取費用）
嘩！睇下個魚排幾多人喺度釣魚，真係幾熱鬧
睇官網見到，剩係釣魚嘅Item 都有好幾項，有啲Item 仲講明，就算釣唔到魚，都會贈送一條鱲魚🎣
另外亦可包成艘木筏供團體釣魚，等一陣係下面，再詳細列出各類item嘅要點同收費
剛好見到師傅喺度幫人殺魚
呢位客人釣到滿滿一兜漁獲
釣到嘅漁獲，亦可以咁樣陳列喺枱上面，畀客人影相打卡留念
呢度有講明漁獲嘅處理方法式
遊客釣到嘅漁獲，可以交到園區嘅 ～
太功望餐廳
營業時間：
10:00-17:00
尤其我哋呢啲外國遊客，交俾廚房（代客料理），咁樣就可以品嚐自己親手釣到嘅成果，「太功望餐廳」係園區內嘅美食中心，提供豐富嘅「淡路島」在地料理。就算無釣魚，亦可以喺度享受美食，餐廳從早餐時段就開始營業，而中午就供應定食同時令海鮮、淡路牛料理、淡路當地咖哩
園區除咗「太功望餐廳」，仲有以下幾間餐飲店🍚 ~
燒烤花園
營業時間：
上午 10:00 - 下午 5:00
（晚間時段需預約）
可以坐喺海邊，可以望到遼闊嘅海岸，亦有海風帶嚟海洋嘅氣息，仲可以食住燒烤，真係人生一大美事
自己亦可以帶食物嚟燒烤，園區會收取炭火費用
費用包括以下各種物件：
炭爐出租1500円『包含網同炭鉗』
木炭850円
炭精300円
如果幫襯餐廳，會有下圖各種燒烤套餐供選擇
 |
| 圖片出自：janohire.co. |
海濱酒吧
營業時間：
10:00-17:00
（17:00 後需預約）
同『燒烤花園』係同一間機構經營，呢度係可以見到「淡路島」海景嘅飲品店
呢度有提供「淡路島」先有嘅特色飲品
 |
| 圖片出自：janohire.co. |
牡蠣小屋
營業時間：
（限11月至3月初）
11:00-17:00
（17:00 後需預約）
喺11月至3月初「海濱酒吧」就會變為「牡蠣小屋」
所供應嘅生蠔都產自「香川縣」，喺「Janohire」水域中養殖，保證夠曬新鮮
收費：
90分鐘無限量自助餐成人3,500日元，兒童1,500円
2公斤袋裝出售2,500円
以公斤出售1,400円
簡易裝3隻500円
 |
| 圖片出自：janohire.co. |
沿著海邊差不多走到最尾，就係觀賞海豚嘅地點
首先要到售票處購票
門票嘅種類有以下幾種：
| 項目 | 詳情、時間、費用 |
|---|---|
| 觀看海豚 | 可以近距離觀察海豚 營業時間：09:00至17:00（最後入場時間：16:45） 收取費用：550円（4歲以上）*3歲以下兒童及寵物（如狗）免費入場 |
| 觸摸海豚（可預約） | 想與海豚互動但又不想下海的人 營業時間：①上午10:50 ②下午 1:00 ③下午 2:50（名額有限，報滿即止），15分鐘講解，15分鐘實作亙動 收取費用：6,000円，無年齡限制 |
| 與海豚在水中漂浮（可預約） | 在海豚群中悠然漂浮，並與它們共度美好時光（請注意，在水中時您不能抓住海豚） 營業時間：①上午10:00 ②上午11:40 ③下午1:50（名額滿額即停止報名），20分鐘講解，20分鐘實作亙動 收取費用：8,400円，（適用於小學生及以上年齡層學生），包含潛水衣、面鏡、呼吸管、潛水靴和救生衣的租賃 |
| 海豚帶你動力游泳（可預約） | 只需輕輕將手放在海豚的背鰭上，海豚便可帶你游泳 營業時間：13:50（報名人數達到上限後將停止報名），20分鐘講解，30分鐘實作亙動 收取費用：12,000円（適用於小學生以上），包含潛水衣、面鏡、呼吸管、潛水靴和救生衣的租賃 |
睇海豚就只有我同主子大人，另外兩位朋友無興趣，大家出嚟玩，亦唔想浪費人哋嘅時間，所以我哋兩個都只係買咗最基本門票，齋睇海豚😓
離遠已經見到海豚同遊客喺度互動
門票係以手環形式帶喺手上，方便工作人員辨識你是否有購票
木製步道同浮台，正正喺海豚生活嘅潟湖上面。你可以由上而下望落去，見到水質清到見到海底，海豚喺水入面優游自在地游來游去，甚至跳躍、翻滾，急不及待我哋帶住興奮嘅心情，走落浮台準備睇海豚
真係好可愛唷💕
雖然我哋無得落水，但好彩見到職員餵食海豚，見到海豚好乖巧咁張開嘴接魚
有嘢食擺什麼姿勢都會好落力🤣
海豚雖然並非動物中智商最高，但絕對是地球上最聰明的動物之一👍
你可能會問：唔落水唔摸，咁有咩好玩？老實講，呢種純觀賞嘅體驗，反而有一種好特別嘅靜謐感
唔使著泳衣、唔使擔心整濕頭髮、唔使驚自己唔識游水，你只需要好簡單咁企喺度，望住眼前呢啲咁有靈性嘅生物喺身邊游來游去
就好似呢條海豚游到浮台邊，突然抬起頭望住我，眼仔碌碌，仲好似「笑」咁微微張開個嘴。雖然無得用手摸佢，但嗰種眼神交流嘅感覺，仲勁過喺水族館，隔住玻璃睇千百倍
一條條喺度排隊等嘢食🤣
好開心見到海豚，喺咁開闊嘅大海環境生活，而唔係被困喺室內細缸
呢度嘅設施雖然係人工潟湖，但係引進天然海水，空間又大，見到海豚嘅精神狀態同活潑度，你會覺得呢度嘅海豚真係好幸福
表演完跳水，自己就攞住嗰波喺度玩，真係好小朋友💕
除咗海豚，園區仲有其他項目可以體驗，分別有以下幾樣：
🔻海上釣魚場（需預約）：
㈠紅鯛魚course ：
▶️時間：08:00至14:00
▶️費用：（每人）5,500円*包含租賃魚竿和魚餌
▶️無論你釣到什麼魚，都會獲贈一條鯛魚
▶️當釣到2條鯛魚時，代表本次體驗結束，最多可使用 60 分鐘
▶️釣到第3條鯛魚時，會收取額外費用
▶️禁止放生自己釣到的魚
㈡私人包木筏釣魚：
▶️時間：07:00至12:30
▶️費用：（工作日）1木筏最多6人→70,000円；（週末及假日）1木筏8人→120,000円，增加人數（每人）14,000円※男女老少價錢一樣，出租魚竿：2,000円（不含魚餌）
㈢魚排釣魚：
▶️時間：07:30開始入場（最多可使用5小時30分鐘）
▶️費用：（16歲以上男性）14,000円、（成年女性和初中生）10,000円、（適用於小學生及以下兒童）5,000円、出租魚竿2,000日圓（不含魚餌）
🔻搭船出海釣魚（需預約）：
▶️時間：06:30至16:00
▶️費用：3,500円（每人）
🔻獨木舟（需預約）：
👇時間：
▶️早上08:45（集合）09:15（出發）10:30（完結）
▶️中午11:45（集合）12:15（出發）13:30（完結）
▶️下午14:30（集合）15:00（出發）16:15（完結）
▶️黃昏（於日落時分開始）
👇費用：
▶️單人獨木舟7,000円（每人）
▶️雙人獨木舟（可容納2人和2.5人；*0.5人指5歲或以下兒童），（國中生以上學生）每人4,500円、（小學生及以下兒童）每人3,000円
🔻立槳衝浪（需預約）：
👇時間（4月至9月）：
▶️早上08:30（集合）09:00（出發）10:30（完結）
▶️中午11:00（集合）11:30（出發）13:00（完結）
▶️下午14:00（集合）14:30（出發）16:00（完結）
▶️黃昏（於日落時分開始）
👇（10月至3月）：
▶️早上09:00（集合）10:00（出發）11:30（完結）
▶️中午12:30（集合）13:00（出發）14:30（完結）
▶️黃昏（於日落時分開始）
▶️費用：成人票價（每人）：7,000円、兒童票價（每人，小學生及以下）：3,000円
🔻騎術俱樂部：
👇㈠基本體驗
▶️時間：最後入場時間：15:00，（體驗大約10分鐘）
▶️費用：2,200円（每人）；3,400円（成人+小學低年級以下兒童*每匹馬限兩名兒童）
👇㈡騎馬漫步到沙灘
▶️時間：最後入場時間：15:00（8月至 9月關閉），（體驗大約20分鐘）
▶️費用：用：4,000円（每人）；6,000円（成人+小學低年級以下兒童*每匹馬限兩名兒童）
👇㈢Janohire 環線
▶️時間：最後入場時間：15:00（8月至 9月關閉），（體驗大約30分鐘）
▶️費用：5,000円（每人）；8,000円（成人+小學低年級以下兒童*每匹馬限兩名兒童）
 |
| 圖片出自：janohire.co.jp |
玩一日唔夠？咁大家就可以考慮下喺度住宿，冇錯！園區提供埋住宿設施，分別有以下幾種模式住宿，有露營地方、渡假小屋同埋旅行車住宿
 |
| 圖片出自：janohire.co.jp |
去日本體驗下人哋嘅渡假園區嘅生活，亦係非常唔錯嘅選擇，臨走見到呢隻超大嘅蜘蛛
睇完海豚之後，就繼續開車去「淡路島」第二個景點 ～
漩渦之丘 大鳴門橋紀念館
由「Janohire淡路海豚農場」開車行駛12公里約18分鐘就可以到達，呢段路不需要收費
.webp)
地址：兵庫縣南淡路市福平936-3
電話：0799-52-2888
👇營業時間：
🔻漩渦之丘味市場
▶️09:00-17:00
🔻Uzunooka餐廳（絶景レストラン うずの丘）
▶️10:00-15:30（15:00 停止點餐）
🔻淡路島漢堡 淡路島Onion Kitchen 渦之丘店
▶️09:00-16:0010:00-16:30
🔻淡路牛肉巻きハンバーグ 今日は肉の日
▶️目前長期歇業
🔻渦潮科學館（Uzushio Science Museum）
▶️09:00-16:30
🔔休息日
📌逢星期二休息
📌公眾假期照常營業
📌12月中旬休館維修3天
📌每年12月31日及1月1日休館
入場收費：渦潮科學博物館
成人300円
小學、初中、高中生100円
學齡前兒童（免費入場）
殘疾人士可享折扣50%
停車收費：免費
🔻公共交通：
▶️🚌 由「香川」出發嘅交通攻略
▶️喺「高松駅高速巴士總站」（高松駅高速バスターミナル）買飛嘅時候，揀去《福良 (Fukura)巴士路線》，呢個係「淡路島南端」嘅主要巴士總站
▶️由「高松」去「福良」，車程大約2.5至3小時（視乎班次同中途停站，如果經「洲本」嘅話會耐少少）
▶️到達「福良巴士總站」之後，步行不到3分鐘即可換乘前往紀念館的免費接駁巴士，車程約20分鐘
▶️在「福良巴士總站」亦有巴士可到達，班次可以睇下面時間表👇
福良➤➤陸の港西淡🔽：
呢度可以欣賞到360度全景，唔單止睇到「大鳴門橋」同「福倉灣」嘅壯麗海景
仲可以欣賞到山坡上令人驚喜嘅景色，包括「本州四國高速公路」&「丸山地區」嘅風力渦輪機！無論睇邊個方向，都能夠欣賞到絕佳嘅景色
| 巴士站 | 班次 |
|---|---|
| 淡路廣場酒店 | 09:55 11:40 14:45 16:25 |
| 淡路島海上酒店 | 10:02 11:47 14:52 16:32 |
| 漩渦七色館（福良休息站） | 10:02 11:52 14:57 16:37 |
| 海景露天溫泉 *休暇村*南淡路 |
10:17 12:02 15:07 16:47 |
| 淡路島美爵溫泉度假酒店 | 10:23 12:08 15:13 16:53 |
| Road station Uzushio |
10:32 12:17 15:22 17:02 |
| 漩渦の丘大鳴門橋記念館 | 10:36 12:21 15:26 17:06 *僅在星期六、星期日和公眾假期， 會將車停在3號停車場 |
| Hotel Anaga | 10:43 12:28 15:33 17:13 |
| 梅丸旅館 | 10:45 12:30 15:35 17:15 |
| 陸の港西淡 | - 12:45 - 17:30 |
陸の港西淡➤➤福良🔽：
| 巴士站 | 班次 |
|---|---|
| 陸の港西淡 | - 08:47 - 13:30 |
| 梅丸旅館 | 09:02 10:47 13:45 15:35 |
| Hotel Anaga | 09:04 10:49 13:47 15:37 |
| 漩渦の丘大鳴門橋記念館 | 09:11 10:56 13:54 15:44 *僅在星期六、星期日和公眾假期， 會將車停在3號停車場 |
| Road station Uzushio |
09:15 11:08 13:58 15:48 |
| 淡路島美爵溫泉度假酒店 | 09:24 11:09 14:07 15:57 |
| 海景露天溫泉 *休暇村*南淡路 |
09:30 11:15 14:13 16:03 |
| 漩渦七色館（福良休息站） | 09:40 11:25 14:23 16:13 |
| 淡路島海上酒店 | 09:45 11:30 14:28 16:18 |
| 淡路廣場酒店 | 09:52 11:37 14:35 16:25 |
3連休已經預咗會多車，但去到現場見到啲車龍，排住隊等停車場😱，嘩！😱😱170個車位全滿，要等有車走先可以泊車😱😱😱，真係唔知要等到猴年馬月，所以我哋情願泊喺較遠嘅停車場，然後再走過嚟😓，
最終我哋將車泊喺 ~
うずの丘 大鳴門橋紀念館駐車場
MAPCODE：
406 307 134 *87
距離紀念館350公尺（沿路要行斜路😮💨）
其實都唔係好遠，不過可能揸車嘅人都係咁，要行斜路就個個都唔肯泊呢個停車場，情願等車位泊👇 ~
普通車駐車場 (うずの丘 大鳴門橋記念館)
MAPCODE：
406 307 164 *72
真係有啲出乎我意料之外，咁多人嚟，仲誇張過去睇「鳴門漩渦」
咁多人嚟，亦證明咗呢個紀念館的確好吸引人
因為呢度可以話係「淡路島」南端嘅地標
下圖有標註附近仲有咩景點，做漏功課嘅話，參考下都好㗎
呢度絕對係洋蔥愛好者嘅天堂，因為「淡路島」嘅洋蔥真係非常出名
喺正門口，就已經有一間嚟到必食嘅漢堡包店 ~
淡路島漢堡 淡路島Onion Kitchen 渦之丘店
（あわじ島バーガー 淡路島オニオンキッチン うずの丘店）
不過排隊可能要排到天荒地老
個個嚟呢度，都話要食（洋蔥漢堡950円），成間店最貴嘅漢堡就係（淡路島吞拿魚腩、芝士、煙肉、生菜、蕃茄漢堡1,900円），不過我覺得最特別嘅都係（淡路島八爪魚辣椒漢堡1,300円），成條八爪魚鬚真誇張
 |
| 圖片出自：kinen.uzunokuni |
行到入館裡面，都係一樣人山人海
嚟到紀念館，唔可以錯過去以下呢間店舖買手信 ~
漩渦之丘味市場
我哋一齊入去睇下有啲乜嘢買😚
首先當然係有洋蔥買，呢隻洋蔥叫（蜜玉洋蔥），據講農藥同化學肥嘅用量，係比普通洋蔥減少50%以上，仲得到過『兵庫縣安全品牌』認證，口感清甜爽脆，但係我都冇理由買一袋洋蔥帶上飛機🤣
咁近「大鳴門橋」，梗係有當地嘅（鳴門金時蕃薯）買啦，我同行嘅朋友，排幾十分鐘隊畀錢都要買，你話幾吸引呢
呢款係好受歡迎嘅炸洋蔥片，口味完全復刻咗～榮獲『全國地方漢堡大賽』大獎嘅（洋蔥牛肉漢堡）味道
下面呢啲商品就比較吸引我，包括有（淡路島焦糖洋蔥湯、同用一整顆（淡路島洋蔥）製成嘅咖哩醬
幾乎見親乜嘢都係有洋蔥成份，下圖有（洋蔥乳酪芝士、洋蔥夾心餅乾）， 同埋用100%（淡路島牛奶製成的布丁）
下面呢個公仔叫「島なるオ」（NaruO），係紀念館嘅原創產品，而NaruO 禮盒嘅餅乾（原味同朱古力味），都係非常受歡迎
因為保存唔容易，而且有效日期亦非常短，如果唔係我都會買（鳴門金時番薯卷）
另外「淡路島」嘅牛奶都好出名，所以呢款（淡路島牛奶年輪蛋糕）同（淡路島咖啡牛奶年輪蛋糕）亦係好受歡迎嘅手信
睇完有乜手信賣，就再走出嚟紀念館行下，呢邊見到嘅係 ～ 夾洋蔥機
機入面嘅洋蔥，每個重約250克至300克
雖然洋蔥光滑嘅表面睇落可能好難夾得起，但有攻略教，話鉤住洋蔥嘅頂部和底部，就可以大大提高成功率（關鍵係事先要搵到側放嘅洋蔥）
收費：500円（5次）
我哋跟住就行去睇另一個打卡位
呢面牆有大約30個霓虹燈藝術裝置，都係以「淡路島」嘅著名地標、文化和當地食材為主題，令人可以更了解「淡路島」嘅魅力
跟住再睇下館內仲有咩打卡位
呢個鋼琴原先屬於「南淡路市三原七小學」，小學喺2020 年 3 月底關閉後，就將小學20名學生嘅自畫像，與洋蔥圖案巧妙融合，寓意著佢哋同「淡路島」嘅洋蔥一樣，能成為經典
呢個洋蔥Court ，亦係一個特別嘅影相設施
周圍都有剛剛喺手信店，見過嘅「島なるオ」公仔
上2樓就有餐廳 ~
絶景レストラン うずの丘
Uzunooka餐廳
原本我哋早就決定喺度食午餐，但係攞籌排隊，要一個半鐘後先至有得食😱，咁我情願回程返「高松」先再食
 |
| 圖片出自：hyogo-tourism.jp |
不過佢哋嘅餐點真係好吸引人，據講係用當地豐富嘅食材烹調，創意菜餚嘅菜單上，有好多食材都係用「淡路島」食材烹調
 |
| 圖片出自：hyogo-tourism.jp |
跟住我哋就行出戶外繼續參觀
周圍都有洋蔥造型嘅座椅
跟住見到嘅就係呢度嘅經典打卡位 ～
Ottama Negi®（巨型洋蔥）
呢個巨型洋蔥雕塑🧅高 2.5 米，直徑 2.8 米，重約 200 公斤！
巨型洋蔥後面就係「大鳴門橋」同「鳴門海峽」，今日咁多人，影呢個洋蔥都要排隊
喺巨型洋蔥下方（落樓梯後），仲有一張洋蔥座椅
同樣可以影到「鳴門海峽」
仲可以加埋頂洋蔥假髮去影打卡相，咁就夠晒特別😁
跟住我哋就一路行到嚟「木質平台」呢邊
可以好寫意咁座係吊椅上睇風景
呢個平台可飽覽「福倉灣」同「鳴門海峽」的全景
跟住見到嘅係南瓜餐車，其實係有兩架，而且仲有名字，分別叫『TAMAO』&『NEGIKO』，個造型都幾可愛
喺呢度仲有一間餐廳 ~
淡路牛肉巻きハンバーグ 今日は肉の日
不過而家係長期關閉中
臨走前就記得去埋紀念館旁邊嘅 ~
屋上展望台
對漩渦有研究興趣嘅朋友，不妨順便睇埋 ～
渦潮科學博物館
呢度有一個獨特嘅液壓模型，能似足真實世界一樣模擬天然漩渦。圖像透過投射喺牆壁螢幕，同懸掛於天花板上嘅巨型球形螢幕呈現，令參觀者可以直觀地睇到漩渦嘅形成
 |
| 圖片出自：kinen.uzunokuni |
下一篇會講番高松嘅景點 ~
四國自駕遊 ~ 栗林公園（米芝蓮綠色指南三星庭園）、 高松城跡玉藻公園（日本三大水城之一）
記得留意哦！也謝謝您的觀看❤️
發佈留言