四國香川~ 「高屋神社（天空鳥居）」、「錢形展望台」自駕遊「觀音寺市」兩大打卡熱點

去「日本四國」自駕遊，唔係淨係得『烏冬』同「金刀比羅宮」嘅樓梯。其實喺「香川縣」嘅「觀音寺市」，隱藏咗兩個近年勁Hit嘅打卡熱點：一處係要同靚景鬥長命先睇到嘅「高屋神社 ~ 天空鳥居⛩️」，另一處係據聞睇完會發達嘅「銭形展望台（錢形砂繪）🪙」.....

全文內容

10月份「四國」嘅天氣仲係好熱🥵，喺「金刀比羅宮」行咗一陣都已經出曬汗，想行完全程，我呢啲怕熱嘅人，可能真係要天氣轉冷，先至有咁嘅毅力行上去💪

離開「金刀比羅宮」之後，就出發去「觀音寺市」，今日餘下嘅時間同住宿都會喺呢邊度過

首先

📍 第一個景點就係我非常期待嘅 ~

高屋神社 ~ 天空鳥居

可以將車停泊喺 ~

高屋神社（本宮）駐車場

MAPCODE：

77 274 062 *67

景點資訊

地址：香川県観音寺市高屋2800

電話：0875-24-2150

🔻開放時間：
▶️（天空鳥居）可24小時參觀
▶️自駕上（天空鳥居）的山路僅在特定時間開放給私人車輛，通常為 9:00-17:00 或 10:00-18:00

🔻停車埸資訊：
▶️免費停車，（星期六、日、假期不開放）
▶️通往「高屋神社本宮（天空鳥居）」的山路由於週末例假日遊客眾多，為避免交通堵塞，一般車輛禁止通行。
※🔔包括單車、電單車也禁止

🔻公共交通：
👉從山腳「有明體育場前的停車場」（有明グラウンド前停車場）（位於縣立琴引公園內）前往「高屋神社本宮（天空鳥居）」的接駁巴士，於週末例假日行駛。接駁巴士車票可以在「觀音寺市觀光協會」內的自動販賣機購買（開放時間 9:00-17:00）
📌車票不接受預訂。接駁車營運日的上午9:00起可開始購買車票
📌車票在自動售票機出售（只接受1000日元紙幣）
📌接駁巴士營運時間：星期六、星期日和公眾假期上午9:00至下午5:30
▶️接駁車票價：來回票價 *單程票價相同*🔽
➤成人（國中生以上）：1500日圓
➤ 兒童及殘障人士：700日圓
➤ 學齡前兒童（每位成人限帶一名）：免費 *第二個孩子以上，每個孩子收費700日元*
📌此行程不允許輪椅通行。此外，從山頂停車場到「高屋神社本宮（天空鳥居）」的坡度非常陡峭，輪椅通行極為危險
📌除導盲犬和輔助犬外，其他寵物不得登車
🔔接駁車時間表請留意下圖

👉的士/共乘的士：平日可以試吓用《讚･瀨戶接駁的士》（SunSet Shuttle Taxi），呢個係預約制嘅共乘的士，由「JR詫間站」去「父母濱海岸」，每人單程約1500円，仲可以安排去「高屋神社」（天空鳥居）

🕒接駁巴士營運時間👈

《讚･瀨戶接駁的士》預約👈

（每月發車時間可能不同，出發前請查詢上述網站）

由「金刀比羅宮」開車行駛26.3公里約57分鐘就可以到達，這段路不需要付公路費

好彩我哋都係自駕，如果唔係呢度亦係一個行到氣咳嘅景點，開車嚟到「天空鳥居捷徑」，沿住指示一直開車，就會直达「高屋神社本宮駐車場」

不過呢條山路都非常狹窄，要極小心有對頭車，千萬不要開得太快

（要留意星期六、日及假期，呢條山路係會係09：00-17：30封閉不開放，唔想行路就要搭接駁車上去「天空鳥居」）

因為有啲彎位根本都睇唔到前面嘅路，喺呢啲山路上駕駛，千祈咪當自己係車神

大約行5公里山路，就會到達「高屋神社本宮駐車場」，呢度大約有十多個停車位

停車場（即係「高屋神社」本宮）位於標高404米嘅「稻積山」山頂

喺停車場都可以睇到山下嘅景色

一手揸手機，一手拎住兩隻熊貓影相，都真係幾高難度🙄

「高屋神社（本宮）」其實仲未到，由下圖中嘅路行上去先係目的地

由呢度開始行220公尺就會到目的地

沿路都係不斷要上斜，影相可能睇唔出呢度有幾斜

行到一半我差啲重心不穩，平衡唔到，真係隨時跌低咁款，220公尺不斷上斜，原來都幾辛苦

好彩一邊行，仲可以彎腰抓住欄桿，欣賞下山下風光

當見到兩邊都係樹木，就代表就快到達目的地

差不多到神社前，有洗手間設置，所以不用擔心人有三急😅

終於到達「高屋神社（本宮）」

已經唔係由山下的「下宮」行上嚟，難怪好多人都話仲難行過「金刀比羅宮」

呢度有咩特別風景同精彩吸引點？向下走落樓梯就會見到了

呢個「天空鳥居」就係成個景點嘅靈魂所在！

巨大嘅鳥居就咁矗立喺山頂懸崖邊，背景係一望無際嘅「瀨戶內海」同成個「觀音寺市」嘅街景

喺2018年「天空鳥居」被選為『四國88景』之一

咁靚嘅美景，點少得我家大頭🐼大壯🐼

企喺呢度影相，真係好似成個人都浮咗喺半空咁，難怪被人叫做「天空の鳥居」

呢度唔單止係打卡咁簡單，親眼望出去嗰種遼闊感，係相片表達唔到嘅

可以望住船隻喺海上航行，俯瞰山下嘅田野同小屋，真令人心曠神怡😍

我家主子都要影張振臂歡呼嘅相🤣

要睇咁靚嘅景色，如果喺平日，唔係自駕嘅話，（喺鳥居前面就有一條絕命長樓梯）

由山腳嘅「下官」開始行，沿住參道行上山頂，要挑戰難行嘅斜路同270級樓梯，用時大約50分鐘，路況係不斷嘅上斜同樓梯，再講一次：『全世界都話難行過「金刀比羅宮」』

睇見條樓梯，我都唔見咗一半老命😵‍💫

呢度睇日落日係非常出名，如果時間就啱，大家可以揀黃昏時段上嚟。睇住個太陽慢慢落山，成個天同鳥居染成金黃色，真係浪漫到暈

由樓梯行上嚟先會見到鳥居上的文字

睇完鳥居我哋就繼續參觀神社～

「高屋神社」本身係一座好古老嘅神社，成個範圍由山腳、山腰到山頂分為「下宮」、「中宮」同「本宮」

不過大部分人同我哋一樣，主要嘅目標，就係「稻積山」上嘅「本宮」

呢間神社嘅歷史可以追溯到平安時期，都算係古蹟級

佢有個特別嘅結構，就係山腳嘅「下宮」同山頂嘅「本宮」係二合一體

古時嘅人主要喺度祈求五穀豐收同航海安全

呢度供奉嘅神明包括「邇邇杵命」同「木花之咲耶姫命」，分別保佑交通安全、安產同姻緣，仲有好多人話呢度係金運嘅（パワースポット），時至今日，呢度變成咗好多人嚟（仕事運）同（縁結び）嘅人氣power spot

神社仲有『特色自動販賣機』，行到氣喘，山頂除咗有普通飲品機，竟然仲有得賣御朱印同繪馬嘅自動販賣機，甚至連（附上籤運的烏龍麵）」都有，夠晒特別

喺販賣機買完繪馬之後就可以掛喺呢邊

畀大家欣賞下由當地攝影師影嘅靚相

圖片出自：mitoyo-kanko.com/

去完「天空鳥居」落番山，一定要去埋附近嘅「錢形展望台」。呢度嘅重點係地上一個超大嘅銅錢！

📍 第二站：

錢形展望台

景點資訊

地址：香川県観音寺市有明町14

電話：0875-24-2150（觀音寺市觀光協會）

開放時間：24小時

停車收費：有免費停車場

🔻公共交通：
▶️從「JR觀音寺站」乘搭（のりあい巴士）《五郷高室線》往「谷上」方向，在「南公民館/香川県観音寺市」巴士站落車可到達
▶️從「JR觀音寺站」乘搭（のりあい巴士）《内循環線》『４便』往「観音寺市役所行」方向，在「元町広場/香川県観音寺市」巴士站落車可到達
▶️從「JR觀音寺站」乘搭（香川県三豊市巴士）《１１仁尾線》往「三豊総合病院」方向，在「たしろ医院/香川県三豊市」巴士站落車可到達
▶️從「JR觀音寺站」出發，可以選擇步行，大約需時 30-40分鐘左右，沿住路牌穿過市區同「琴彈公園」上山
▶️從「JR觀音寺站」乘搭的士，車程大約10分鐘

「由高屋神社（天空鳥居）」開車行駛9.6公里約34分鐘就可以到達，這段路不需要付公路費