去「廣州」玩，如果無去過「北京路」，真係唔好話自己去過「廣州」！呢度唔單止係購物天堂，仲係一個可以腳踏千年歷史嘅地方。今日就同大家介紹吓呢個《老廣》必到地點，仲有最近爆紅、靚到好似宮崎駿《千與千尋》場景咁嘅「大佛寺」！仲有好似瞬間穿越去咗歐洲嘅「沙面島」，島上保留咗超過150棟19世紀末到20世紀初嘅歐式歷史建築.....
全文內容
去完「廣州聖心大教堂」之後，就走回頭路返酒店休息一陣，等差不多黃昏時份，再步行去酒店附近嘅 ～
廣州北京路步行街
「北京路」位於「廣州市越秀區」，係「廣州城」建城以來嘅中軸線。由北起「中山五路」，南至「惠福路」，成條街大約 1.5 公里長
🔽公共交通：
①➤廣州地鐵 1 號線 / 2 號線：去到「公園前站」D 出口，行 5-8 分鐘就到
②➤廣州地鐵 6 號線：去到「北京路站」B 出口，行幾分鐘就到
在踏進步行街之前，首先會經過下圖見到嘅 ～
心形樹
「心形樹」位於「北京路天河城B區」人行道旁，因兩棵緊鄰嘅樹木經修剪後，樹葉呈現『雙愛心』造型而走紅，超級多人專登過嚟影相打卡
「天河城」前的姆明，我哋沿著圖中粉紅色箭咀方向行，就會到達「同慶坊」
行無幾耐在小巷裏就會見到一大幅彩繪牆
黃色的牆面上寫滿了廣州的粤語方言
粵語方言我哋香港人梗係熟悉啦
非常有親切感，而且十分有廣東地道色彩
再向前行多一個街口，就會見到一幅『廣州』打卡牆
「同慶坊」係「北京南路」嘅新網紅地標，經常有節慶裝飾，呢度亦進駐不少食肆，例如有『新興飯店、蘩樓、秘密旅行、肯德基、喜茶、茶話弄、PAIX COFFEE』等多家知名品牌，所以呢度亦係搵食嘅好地方
跟住我哋就沿路行返去「運河成」，過對面馬路就會見到呢艘大型的『海絲之舟』主題裝置藝術，現場仲有節慶裝飾，例如馬年雕塑和可愛的卡通人物像
呢度亦係「北京路步行街」嘅起點
跟住見到呢個機械人咖啡，感覺都幾好玩，不過可惜我都唔飲咖啡🙂↔️
呢度就係「北京路步行街」最繁華嘅路口，呢條騎樓街景亦係打卡熱點
好多網紅都會走上「粵潮樓」3樓，由高角度影落嚟打卡
附近會見到「歌莉婭225概念會所」，亦係地標嘅象徵，一、二樓售賣衣服，裏面仲會有不定期展覽
始創於1949年嘅小紅樓，夜晚著咗燈之後就更靚
喺「北京路步行街」嘅中心位置，有必睇嘅「千年古道遺址」
遺址用鋼化玻璃封住
低頭望落去，可以見到唐、宋、元、明、清五個朝代疊埋一齊嘅路面磚石
呢種「腳踏千年」嘅感覺真係好正，Feel 到嗰種歷史嘅厚度
跟住見到嘅係『清代城防圖』
如果要影彩繪牆嘅話，就要認住『清代城防圖』，呢個位置，轉入橫街「府學西街」，就見到有好大幅嘅彩繪牆
跟住打橫望過去，就見到整條街都係彩繪牆
唔影彩繪牆，係呢度影一啲有趣嘅雕塑亦係唔錯嘅選擇
沿住「北京路步行街」都有好多店舖
有啲重設計到非常有特色
外觀都好重要㗎，起碼吸引到你幫襯
呢間書店就真係吸引我，門外擺放住呢啲拼圖屋，真係見到都心心眼😍
見到呢個鐘價錢唔貴，而且隻咕咕鳥仲可以走出嚟報時，真係幾別緻
不過就有成四百幾塊要慢慢砌😅
一路沿住「北京路步行街」行到去「新大新百貨」，呢度亦係出名嘅地標，尤其係3D大屏
跟住我哋就原路轉回頭去食晚餐，步行街原來有公共廁所，唔怕行到人有三急唔知點算好，不過個門口真係窄到都唔多起眼🤔
行下行下突然聽到非常響亮嘅狗吠聲，但係又唔見有狗狗喺附近🐶，原來呢兩隻百厭星喺2樓伸個頭出窗，吠街上面嘅行人
跟住見到呢間名為TOP TOY 的潮流玩具集合店，店內專門販售各種IP玩具。 販售包括Sanrio 等多個知名IP的潮流玩具、盲盒與收藏品
跟住我哋就喺步行街，轉入「惠福東路美食街」參觀下有咩美食
嘩！呢間大頭蝦專門店，排隊排到真係嚇親人
呢度都又有好多一檔檔嘅街頭小食，首先見到嘅就係燒魷魚
美食街裏面就係另一必到景點 ~「大佛寺」，不過我哋等夜晚著咗燈先再去
啲海鮮望落都非常吸引人，但可以話畀個位聽，價錢唔畀香港平
跟住我哋就行到去「書方街」對出，預備喺呢邊食晚餐
途中見到呢間以為係寵物店
晚餐我哋就選擇食 ~
蟹上黃-蟹黃麵
雖然並非廣州本土食物，但睇過一啲短片介紹覺得好吸引，所以就過嚟試下
上『大眾點評』購買套餐券，為二百幾蚊人仔，就包一碟蝦、同兩碗蟹黃撈麵、可以要飯或者湯麵都得，睇個樣真係冇得輸㗎，非常吸引人，但食落就.....🙄一言難盡，味道非常淡無鮮味，同我喺香港食過嘅大閘蟹膏有好大分別
另外亦單點咗蟹黃小籠包
其實做法係冇問題嘅，但係都係缺少鮮味，真係好難相信，喺全國有咁多間連鎖分店，難道香港人食嘢真係刁轉啲🤔
夜晚嘅美食街同樣咁多人喺度搵食
食完晚飯天都黑齊就可以去參觀 ~
大佛寺
如果你問我「北京路」最值得睇係乜，我一定會話係「大佛寺」
「大佛寺」始建於南漢時期（即係一千幾年前！），當時叫「新藏寺」。到咗清朝康熙年間重修，因為入面供奉住三尊超級大嘅青銅佛像，所以改名做「大佛寺」
殿內不可拍照
寺廟主體建築係傳統嘅嶺南木結構，飛檐翹角，非常宏偉
最特別係新起嘅「弘法大樓」，呢座樓高七層，成座用咗大量木材同黃金琉璃瓦，當夜幕低垂嗰陣，簡直係視覺盛宴
每晚大約 19:00 - 21:00 會著燈，當燈光一開，整座大佛寺變到金碧輝煌
同後面啲摩天大廈形成勁強對比，視覺效果極似《千與千尋》入面間《湯屋》
寺入面有間「普覺樓」提供素食自助餐，價錢大約 100 蚊人仔左右，質素好高，喜歡食素嘅朋友可以去試吓
🕒 貼士： 寺廟開放時間係 06:00 – 21:00，但亮燈時間係 19:00 開始，想影靚相記得黃昏前後去，一次過影勻日景同夜景！
靠一對腳係咁行，其實都幾倦，加上天氣又熱，3月點解會咁熱？難怪話就嚟無冬天😔
返到酒店開大冷氣，品嚐剛剛喺「惠福東路 ~ 鮑師傅」買到嘅puff
嘩嘩嘩！超級好味，外皮鬆脆，內裏芋頭忌廉軟滑，而且唔係好甜
仲有一粒粒爆珠嘅馬蹄山藥，可惜要雪住，如果唔係一定買一堆返香港慢慢食
一夜無夢，肥肥白白又過了一夜，今次訂酒店就無Order早餐，我哋去酒店附近嘅店舖 ~
陳·贊記布拉腸ＮＯ．６
食「廣州荔灣」出曬名嘅艇仔粥、油炸鬼
乾炒牛河都唔差㗎，杯奶茶直頭係超水準，充滿茶香
食飽飽就出發去 ～
沙面島
🔽公共交通：
①➤廣州地鐵1號線/6號線：搭到「黃沙站」，由 F 出口，跟指示行過條行人天橋（大約 10 分鐘）就到「沙面西邊」
②➤廣州地鐵6號線：搭到「文化公園站」，由 A 出口出，行 5-8 分鐘就到「沙面東邊」
③➤水上巴士（最 Chill 玩法）：可以喺「中大碼頭」或者「天字碼頭」坐水上巴士去「西堤碼頭」，落船行幾步就到
由「廣州賓館」搭地鐵去好方便，兩個站就可以到達，喺「廣州」要乘坐公共交通工具，最方便就係用『羊城通乘車碼』，係（WeChat小程式）就可以搵到，另外（支付寶）亦可用『羊城通乘車碼』
「廣州」地鐵的佈局設計同「香港」基本一樣，只係入閘前要安檢
等車嘅月台亦熟口熟面
不過線路就比較多，下圖見到嘅只係6號線嘅站點
係地鐵「黃沙站」出嚟後，經過呢條古色古香嘅橋之後，就已經係「沙面島」，成個島完全免費入場
呢條橋影相都幾靚㗎
「沙面島」位於「廣州市荔灣區」，就喺「珠江北岸」，佢其實係一個人工小島
途中見到呢隻咖啡店嘅貓咪，攤喺度撩人玩🐱，好得意🤩
話說喺 19 世紀（鴉片戰爭之後），呢度被劃分為英法租界
所以島上留低咗超過 150 棟歐式歷史建築。呢度曾經係銀行、領事館同埋外資商行嘅集中地，簡直就係一個『露天建築博物館』
呢度真係成個小歐洲咁
好多建築融合咗新古典主義、巴洛克、哥德式仲有維多利亞風格
你會見到好多紅白磚牆、半圓拱門、仲有超靚嘅鐵鑄窗花
喜歡睇歷史建築嘅朋友一定喜歡呢度，就算唔熟悉建築嘅朋友，亦都會喜歡呢度嘅氛圍感
喺步道嘅中心點仲有一大個花壇
睇落好似延綿不斷咁，影相真係幾靚㗎
路邊周不時會見到一啲青銅雕塑，描繪以前租界時期嘅生活場景，例如打電話嘅人、拉人力車嘅人，好啱同佢哋擺 Pose 影相
「沙面島」唔單止得建築物，最正係島上有好多超過百年歷史嘅榕樹。夏天去嗰陣，陽光透過樹葉灑落嚟，成條街都係涼浸浸嘅林蔭大道，氣氛超級 Chill！
雖然資料話有小歐洲嘅感覺，但我自己就覺得非常有民國Feel，腦海不自覺就會出現『傾城之戀、儂本多情.....』，呢啲經典劇目，真心覺得民國係一個動盪，不知道明天在那，但係又非常浪漫同淒美嘅年代
呢個『沙面牌』亦係非常受歡迎嘅打卡點
呢座係「匯豐銀行舊址」， 四層高的建築展現了濃厚的西方古典風格，融合了巴洛克與羅馬式元素，而家裏面就成為珠寶藝術展廳
被譽為【廣州最美星巴克】。佢係一棟湖水綠色（Tiffany Blue）嘅百年老建築，入去飲杯咖啡坐喺露台，真係幾有歐洲 Cafe 嘅 Feel
自 2022 年起，該店經常推出以『哈利波特』為主題的裝飾（如霍格華茲特快列車標誌、分院帽、復古書架等），甚至有穿著長袍的工作人員及限定聯名杯款，被遊客稱為【廣州版霍格華茲】
今期就有『哈利波特』的貓頭鷹嘿美 (Hedwig)，同乘坐火車去『霍格華茲嘅9¾月台』
其實喺「沙面島」，我哋都係行咗1/3部份，始終用腳真係行唔到咁多，（不復年輕時嘅體力😔）
不過真係好值得推介大家嚟呢度睇下啲歷史建築
隨手一影已經係非常有畫面感嘅相片
係咪覺得每張相裏面都充滿故事性
這個雕塑實在太搞笑
行到去尾段就係「珠江」邊
呢度好多舊建築而家都變咗畫廊或者精品咖啡店，值得入去睇吓
呢個寄信嘅雕塑充滿住盼望感
「白天鵝賓館」亦在「沙面島」，係「廣州」第一間五星級酒店，就算唔住，入去睇吓個『故鄉水』，室內景觀同埋食餐精緻點心都係極大享受
行到下午時間，食埋碗淨牛雜加撈粉，就要預備搭跨境巴士返香港
🔚 總結：
今次呢個「廣州」兩日一日夜遊，真係集齊咗千年歷史、鬧市禪意、邪惡美食同歐陸浪漫於一身！無論你係想掃貨、朝聖、食好嘢，定係純粹想搵個地方放鬆影相，呢條路線都一定滿足到你
下一篇記得留意返我嘅四國自駕遊呀
謝謝你的觀看❤️
發佈留言