「丸龜城」同「金刀比羅宮門前町商店街」，一個展現日本城堡建築嘅力與美，一個體驗江戶時代風情嘅「門前町」，有齊烏龍麵、骨付鳥等地道美食。一日之內體驗兩種日本文化、美食.....

全文內容

「四國」的旅程今日正式開始，昨天在「高松」住宿一晚後，我哋今日就離開「高松」前往「丸龜市」、「琴平町」、「觀音寺市」，玩到夜晚睇埋日落再喺「觀音寺市」住宿一晚，明日就方便我哋再直接落「高知」

🔽下圖就係今日嘅行程

今次呢篇首先講嘅係～

丸龜城

由入住的酒店「Webase高松」開車行駛31.3公里約44分鐘就可以到達，這段路行收費公路為￥600円 (用ETC卡同樣是￥600円)

行不收費公路只需29.7公里約53分鐘就可以到達，差9分鐘就要￥600円，不過可能你會話，出去玩唔志在這少少費用，咁都係事實嚟嘅🙄

景點資訊

地址：〒763-0025香川県丸亀市一番丁（城内）

電話：0877-22-0331

🔽開放時間：：
➤天守為9:00～16:30（入館到16:00為止）

🔽門票收費：一般免費
➤參觀天守：成人400日圓兒童（國中及以下學生）免費

停車費用：免費

🔽公共交通：
➤由「JR高松站」搭乘《JR予讚線》，前往「丸龜站」落車。之後由（南出口）出閘，全程步行約10-15分鐘即可抵達城堡入口
📌如果你嘅行程會玩埋「四國」其他地區，強烈建議購買JR通行證：
· JR四國周遊券：可以無限搭乘《JR四國全線》，包括去「丸龜」同「琴平」，非常適合集中玩「四國」嘅朋友
· 瀨戶內地區周遊券：除咗《四國JR》，仲可以搭《山陽新幹線》（例如由岡山來回）、部分渡輪同巴士，適合計劃玩埋「岡山、廣島」等地嘅大範圍行程

「丸龜城」附近有數個停車場可以停車，「丸龜城」本身亦附設停車場（不用收費）

而我哋就選擇泊車喺～

市民ひろば駐車場

MAPCODE：

77 741 153 *85

停車喺呢度去城堡較方便，唔使行咁多路

離遠已經見到「天守」在山頂上聳立著

泊車喺呢個停車場，只需要行過馬路就已經係「丸龜城•大手二の門」入口

等過馬路時見到有介紹「丸龜市」景點嘅地圖，如果想多遊覽「丸龜市」嘅景點，也不妨參考下

呢個城有咩吸引人參觀？雖然城跡範圍唔算大，但就內藏乾坤！「丸龜城」是『日本現存12座木造天守之一』，同時又係「日本」最高嘅石牆城堡，成個感覺就好似一個迷你巨人，反差感十足

「丸龜城」所在位置喺「丸龜市中心」一座叫「龜山」嘅小山丘上

雖然山只係高66米，但由山腳到「天守」，四層石垣疊加起嚟總高度有成60米，係全日本城堡之最，所以都非常有氣勢

行去「大手二之門」途中，會經過護城河

護城河兩邊嘅風景都非常不錯

河中仲有不少魚在暢游

一路向前行，就會嚟到～

丸龜城大手二の門

「大手二の門」與「大手一の門」同時建造，採用的是『高來門風格』。呢座城門堪稱係「丸龜城」的門面，石牆採用大塊石料，鑿痕精美

「大手二の門」是「丸龜城」的重要文化財產之一，與「大手一の門」之間形成一個稱為【桝形】的防禦空間，{【桝】意思是指日本傳統的方形木製量器（讀音：Masu）}

進入「大手二の門」之後再回頭望，就見到呢度門嘅另一面貌

呢座城門係一座有防禦功能嘅櫓門

入到嚟「大手二の門」望向右方，就已經係～

大手一の門

裏面有個必睇寶物——『時太鼓』！自江戶時代起，每日正午都會敲鼓報時，據講呢個傳統全日本只剩「丸龜城」保留，如果時間啱絕對要親耳聽下

要參觀城門上的『時太鼓』，要於當天11點50分前與「丸龜城觀光資訊中心」或「竹扇工坊」的工作人員聯絡預約

圖片出自：www.come-marugame.jp

我哋就繼續穿過「大手一の門」，向「天守」方向繼續前進

跟住就講下「丸龜城」嘅歷史，參觀一啲城跡嘅時候，知道少少歷史，起碼知根知底，參觀時就更有趣味💯

「丸龜城」嘅故事好曲折，可以用（一波三折）」嚟形容：

1️⃣築城與廢城：最初喺1597年，由當時統治「讚岐國」（即而家香川縣）嘅『大名』生駒親正父子興建，築城時參考咗「安土城」同「大阪城」嘅設計興建。但到咗1615年，德川幕府推行『一國一城令』，生駒揀咗保留「高松城」，而「丸龜城」就被廢棄拆毀

2️⃣重生與定型：直到1640年後，新城主山崎家治獲得幕府批准重建。之後由京極氏接手，喺1660年完成咗而家見到嘅天守閣，並喺1673年完成包含壯觀石垣在内嘅大改修，奠定今日所見嘅格局。之後二百年，京極氏一直係呢度嘅城主

下圖嘅建築係「丸龜城內觀光案內所」，案內所兩邊都有路可以行，記得揀右邊上山嘅斜路，左邊喺可以去到「東御門跡」，同時亦可以繞住「丸龜城」行一圈

「丸龜城內觀光案內所」裏面亦有各種「丸龜城」週邊商品、當地特色產品、店鋪限定商品以及「丸龜」獨有的紀念品售賣。在同一棟建築物內，還有『團扇工房』，可以在那裡購買和觀看扇子製作演示，甚至可以親自體驗製作扇子的樂趣

開頭呢一段斜路，一啲都唔難行，就算老人家同小朋友應該都行得好輕易

行到斜路嘅最上方就會見到～

高石垣

「丸龜城」最有名就係呢道總高超過60米、日本現存城堡中最高嘅石垣

呢道石垣唔係一味高，仲好有美學，採用咗【打込接】、【切込接】等多種技法（其實呢啲專有詞匯，我都唔係好明，不過資料係咁寫我就照抄🙄），越往上越呈現優雅嘅弧形，叫做【扇形坡度】，雖然唔多清楚詞匯嘅形容，不過望落真係好似一件藝術品

沿著高石垣一路上斜嘅呢段路叫做～

見返り坂

「見返り坂」是城堡中最陡峭的斜路，整條斜路總長度約150公尺

由於斜路陡峭，不時會讓人忍不住駐足回望，故得此名

（行呢度真係幾斜，真心有啲覺得舉步難行😮）

由「見返り坂」行上嚟就已經到達「三之丸」

站在高處的這個角度，望向遠方盡頭就係藍色大海

「三之丸」嘅地勢，比剛剛行過的平地路段已經高出許多

下圖這個是 ~

三の丸東張出石垣

（也稱為三の丸東石垣櫓台跡）是一個獨特的景點，呢個設置是從「三の丸」延伸出去，就似係一個瞭望台一樣

兩邊都是陡峭的石垣，在其他城堡中並不常見

相反方向望返轉頭，又係另一角度的風景

「三の丸」是一個形狀像頭巾的環繞「二の丸」和「本丸」的庫魯瓦（圍場）。呢度有好多值得一睇嘅歷史遺跡，例如紀念吉井勇（日本明治至昭和時期的著名耽美派歌人、詩人）之紀念碑，以及據說曾經是逃生通道的「三の丸井」

呢兩棵樹在「三の丸」嘅中心部分聳立著，令景觀變得不那麼單一

從「三の丸」向外望，可以見到「丸龜市區、瀨戶內海」嘅美景

一望無際嘅景色，市中心冇太多高樓大廈嘅景觀，喺香港幾乎已經係冇可能

向下望落去，由於唔係太高，山下嘅房屋形態，就很清晰的展現在眼前

下圖右邊的那個山丘是 ~ 飯野山

「飯野山」海拔 422 公尺，因其外表酷似「富士山」，故被暱稱為【讚岐富士】，並入選為【新日本百名山】之一

據資料說單程步行約 1.5–2小時，走可以上到「飯野山頂」

「飯野山」喺每年 4 月中旬及 8 月下旬，太陽會從山頂正上方升起或落下，倒映在水面形成絕美的【雙鑽石】奇景，有興趣嘅朋友就不要錯過了

呢邊見到嘅係 ~

勤王碑

呢座係紀念江戶末期至明治維新時期，為『尊王攘夷』理念而奮鬥的志士們所立之石碑，讚揚他們的勤王精神，是「丸龜城」內的重要歷史景點之一，（中國歷史都未讀得掂，假如各位有興趣日本歷史，就要自己上網睇資料，喺呢度唔講咁多人哋嘅歷史了）

喺呢度望到嘅石牆真壯觀

由「三の丸」再向上行就會到達～

二の丸大手虎口

呢度係連結「三の丸」與「二の丸」的重要區域，以其嚴密的防禦構造👉【枡形虎口】（箱型入口）而聞名，（要自己喺個腦裏面聯想下，究竟係乜嘢佈局嘅呈現🤭）

雖然呢座城跡唔係高，但行咁多斜路，加上天氣又熱，（10月份嘅「香川縣」仍然有28、29度，我呢啲怕熱嘅人，已經行到全身出曬汗🥵，仲行到都係全靠意志💪）

「二の丸」位於「本丸」下方，是山上區域面積最廣闊的【曲輪】（防禦空間）

呢個構圖咁靚嘅井係 ~

丸龜城二の丸井戸

呢度係「二の丸」最著名的景點，被譽為『日本第一深』的城郭井戶（推測深約 65 公尺）

城堡嘅「三の丸」、「二の丸」種滿櫻花同楓樹，春天係知名賞櫻勝地，有約1,000 株櫻花，而秋天則可賞楓

從這個角度望向「飯野山」，感覺變大不少

跟住行埋呢一小段斜路，就已經去到「天守」

天守閣係『現存12座木造天守之一』，雖然是規模最小（僅有三層樓建築），但依然有格式優美的『唐破風』及『千鳥破風』屋簷

這座天守閣高約15米，共三層三角，於1660年竣工，是「四國」現存最古老的木製天守閣

入天守閣是要付入場費

開放時間：

09:00～16:30（最後入館16:00），全年無休

入場費用：

成人400日圓兒童（國中及以下學生）免費

雖然官網話會全年無休，但我哋想上去嘅時候就無人售票，同埋裡面漆黑一片，所以唯有係外面影相就算了😔

除了天守閣之外，本丸還有角樓、連接大樓以及環繞石牆嘅土牆

喺呢度睇風景真係相當唔錯

可以俯瞰整個「丸龜市」，也能遠眺「瀨戶內海大橋」，視野相當遼闊

當然都唔可以忘記同我家大頭🐼大壯🐼影張到此一遊相先

「丸龜城」唔單止可以行，仲可以入住，喜歡古色古香、又想有特別體驗嘅話可以考慮入住～

丸龜城圓壽閣別館（住宿）

圖片出自：www.come-marugame.jp

住完記得留言話我聽正唔正😉

參觀完「丸龜城」，下一個景點就係出發去～

金刀比羅宮門前町商店街

由「龜丸城」開車行駛15.1公里約28分鐘就可以到達，這段路不需要公路費用

我哋將車停喺 ~

タイムズ琴平こんぴら前

MAPCODE：77 383 197 *10

停車收費為600日元（一次性）

景點資訊

地址：〒766-8501香川縣仲多度郡琴平町892-1

電話：0877-75-2121

🔽開放時間：
➤主參道及本宮區域原則上全天開放，全年無休）
➤表書院、寶物館等設施：通常是上午8:30至下午5:00（16:30最後入館））
➤參拜時間會因季節有所調整，例如冬季（1-2月）開放至17:00）
➤春秋季（3-4月, 9-10月）至17:30）
➤夏季（5-8月）至18:00）
➤「奧社」則為8:00-17:00

🔽門票收費：一般免費
➤主參拜區域免費入場
🔻「表書院、高橋由一館、寶物館」）
➤每個館（成人 800円、高中/大學生 400円、國中以下免費）
➤【3館通票】成人 1,500円、高中/大學生 800円、國中以下免費。三館各可入館參觀一次）

停車費用：附近收費停車場，通常一次性600日元

🔽公共交通：
➤由「JR高松站」搭乘《JR予讚線》，前往「琴平站」落車，由車站步行10分鐘可到達入口
📌如果你嘅行程會玩埋「四國」其他地區，強烈建議購買JR通行證：
· JR四國周遊券：可以無限搭乘《JR四國全線》，包括去「丸龜」同「琴平」，非常適合集中玩「四國」嘅朋友
· 瀨戶內地區周遊券：除咗《四國JR》，仲可以搭《山陽新幹線》（例如由岡山來回）、部分渡輪同巴士，適合計劃玩埋「岡山、廣島」等地嘅大範圍行程