今次同大家分享個超充實又唔使趕到氣咳嘅「澳門氹仔」半日遊路線 ~
- 第一站：氹仔市政街市 — 食勻新派「美食+文創」區
- 第二站：Olamaria 澳瑪利亞手信（官也街店）— 買完唔捨得拆嘅靚爆手信
- 第三站：大潭山瞭望台 — 免費搭「斜行升降機」睇無敵全景.....
全文內容
今次嚟「澳門」是為了慶祝生日，得一、兩日假期，近近哋嚟「澳門」，可以住品質有保證嘅酒店，又可以食我喜歡嘅葡國菜，最重要喺有渡假嘅感覺
今次第一站就係去食午餐 ～
氹仔市政街市
📌第一站：氹仔市政街市 — 食勻新派「美食+文創」區
「氹仔街市」一樓及二樓天台的『美食+文創區』，於2025年12月16日正式開業，提供多元化且具「澳門」特色的創意美食、咖啡茶飲及文創產品
成個空間注入咗新穎嘅葡式元素
街市坐落喺「氹仔地堡街」，同熱鬧嘅「官也街」只係一步之遙，所以地理位置絕對方便各位遊客
街市地下依然係保留住傳統街市模式，有貨品買賣
我哋係開張後第六日過嚟，有部分店舖都仲未開始營業
跟住就同大家上去一樓睇下美食區
而且比起其他熟食街市，呢度就乾淨很多
彩色牆身同葡式窗框，充滿當地色彩
「澳門」嘅街頭招牌，充滿「澳門」風情，亦是「澳門」的一大特色
淨睇相唔講你都唔知呢度係街市
一樓有19個輕食同文創攤位
你可以搵到雞蛋仔、夾餅呢啲懷舊小食，亦有粉麵、東南亞菜、日式壽司同甜品.....等美食
比一般傳統街市熟食中心，呢度有更多選擇
而且每一檔賣嘅嘢都冇重複，即係唔會全部賣瓦煲咖啡、奶茶、牛雜、豬扒包.....🤭
我哋12月21日星期日過嚟，人流仲未有好多，可能大家都未知道呢個街市重新開張
『澳門研究所』淨係啲舖頭名都好吸引人，大家有興趣都要過嚟研究下佢賣乜嘢😉
不過都唔係冇缺點，呢度可以用餐嘅區域係非常細
雖然會坐得比較舒服同唔嘈吵，但係遲啲假期可能一位難求
我今次就揀幫襯食越南餐
我就食越法式包，（我食越式法包最好味嗰一次，居然唔係喺「越南」，而係喺「柬埔寨」，嗰間舖頭嘅法包外脆內軟，包裏面嘅餡料（豬肝醬）好味道令人回味無窮😋），而今次呢間食店，味道無驚喜，用料同品質亦有待提升
食完想抖抖，可以上二樓天台嘅咖啡茶座
買杯咖啡，喺戶外座位chill下，個view都幾開揚
可以睇到「銀河酒店」嗰邊
坐喺度嘆咖啡其實都幾寫意
望著樓下熱鬧繁華嘅景象，真有種放眼看世界的感覺
食飽飽，就係時候行過去「官也街」消化下兼買手信！今次我唔再幫襯個個都買嘅大路品牌，而係去咗一間近年人氣急升、包裝靚到暈嘅手信店 ~
Olamaria 澳瑪利亞手信（官也街店）
📌第二站：Olamaria 澳瑪利亞手信（官也街店）— 買完唔捨得拆嘅靚爆手信
地址：澳門氹仔木鐸街4號
電話：853 6359 0726
🔽營業時間：
➤10:00-21:00
🔽公共交通：
➤最近之輕軌站為「排角站」
店舖外牆畫有彩繪，畫上自家出品嘅產品，感覺好有Party Feel又有趣
呢間店舖近年來非常大熱，尤其多國內嘅朋友嚟幫襯
我哋午飯時候過嚟已經算係比較少人
呢間店舖嘅招牌商品係蝴蝶酥
蝴蝶酥絕對係鎮店之寶！有牛油味、杏仁味、咖啡味，芝麻味，口感鬆化得嚟又唔會太甜，最重要係佢嘅鐵罐同紙盒包裝靚到不得了，充滿歐陸風格，買嚟送俾朋友或者同事保證大受歡迎
我買咗牛油味同咖啡味，兩個口味都非常好味
.webp "澳門氹仔 ~ 大潭山瞭望台、氹仔市政街市、Olamaria澳瑪利亞手信（官也街店）【掃街市美食、買精緻手信、登高睇勻金光大道】")
牛油味蝴蝶酥嘅包裝係最漂亮嘅
佢哋嘅蛋捲亦都唔錯，我買咗咖啡味道，食落我超喜歡，同香港嘅「龍記」有得fight
每盒份量唔算多，包裝都幾精美
另外杏仁酥、蛋黃酥口感同樣鬆脆
.webp "澳門氹仔 ~ 大潭山瞭望台、氹仔市政街市、Olamaria澳瑪利亞手信（官也街店）【掃街市美食、買精緻手信、登高睇勻金光大道】")
我哋去嘅時候仲有優惠活動，買滿四盒另外影四張相發佈喺社交媒體上，就有一個袋送
跟住第三站，我哋就行去附近不遠嘅 ～
大潭山瞭望台
📌第三站：大潭山瞭望台 — 免費搭「斜行升降機」睇無敵全景
地址：澳門司徒澤雄神父馬路
電話：none
🔽開放時間：
➤瞭望台24小時開放
➤斜行升降機06:00至24:00
🔽公共交通：
➤從「官也街」步行約10分鐘可到達
行過去可以選擇行嘉模斜巷走上去，雖然要行樓梯，但係呢度影相真係幾浪漫㗎💞
一路行樓梯去到上面，就會見到嘉模聖母教堂
跟住向呢幾間薄荷綠色葡式建築龍環葡韻方向直行，就會到達
離遠已經見到在山上的瞭望台，但係如果你用google map導航，千祈唔好用「大潭山瞭望台」呢個名稱，佢會直接帶你行山路兜圈上去
導航要用呢個名稱➡️Foot of Taipa Grande Viewing Platform，咁走會帶你到天橋，過咗天橋，就會見到（斜行升降機）
搭呢架（斜行升降機）唔使一分鐘，就可以到達山上嘅瞭望台
升降機入面冷氣好足，透過玻璃已經可以望到外面越嚟越開揚嘅景色
升降機係斜斜地上山，感覺好似搭登山纜車
重點係：免費！ 開放時間由朝早6點到午夜12點，無論睇日景定夜景都得
一出升降機行兩步就係「大潭山瞭望台」
行到過嚟，就算好倦同有大太陽都唔使擔心，呢度有地方可以坐低同有得遮陰
呢度亦有解說板告知下面濕地公園會見到的昆蟲、鳥類
個view真係無得頂，望向右邊成個「路氹城」一覽無遺，「威尼斯人」、「倫敦人大笨鐘」、「巴黎人鐵塔」全部盡收眼底
如果係黃昏時分上山，就可以睇住「金光大道」嘅燈逐盞著，天色變幻，真係浪漫到極！我個人覺得呢度嘅景色絕對唔輸酒店嘅觀景層，而且係免費享受
左邊可以望到「澳門半島」同「友誼大橋」，仲有山下嘅濕地同豪宅景觀
跟住我哋就由沿路行返去「龍環葡韻」
「龍環葡韻」同「濕地公園」嘅接駁樓梯，短短一條樓梯但係就出奇地精緻、漂亮
似是文藝復興時期嘅色彩
「龍環葡韻」是『澳門八景』之一。相信好多人已經嚟參觀過
所以詳細嘅資訊就唔再多講，呢種葡式住宅影相真係幾靚，充滿「澳門」風情
離遠無認真睇時我以為是一件公雞雕塑，行近睇先知道這是由英國當代藝術家Philip Colbert， 所創作的龍蝦先生（Lobster Man）藝術雕塑
喺「龍環葡韻」對面就係 ～
龍環葡韻生態步道
開放時間：
西側生態池：逢週三、週六、週日、公眾假期及補假日，上午9時至下午5時
東側及北側生態步道：每日上午6時至下午6時（其餘步道全天開放）
這片美麗的濕地，吸引了不少鷺鳥和林鳥、蜻蜓及蝴蝶....等棲息，是「澳門」重要的生態區之一
跟住我哋就預備行去「銀河酒店」，乘坐接駁車去我哋今晚入住的酒店 ～
澳門 ~ 安達士酒店
在途中見到呢個路牌，覺得幾得意，就隨手影底
下一篇就係講今晚入住的酒店 ~
澳門 ~ 安達仕酒店（Andaz Macau）免費Mini Bar/銀河直達超方便、晚餐「官景正宗葡萄牙餐廳」
記得留意哦！也謝謝您的觀看💗
發佈留言