廣州長隆 ~ 熊貓酒店（自助晚餐）、探訪【長隆野生動物世界】全球唯一熊貓三胞胎（下篇 PART 2）

「廣州長隆~熊貓酒店」嘅自助晚餐，對比園區其他餐飲，絕對物超所值，同時這篇亦會介紹「長隆野生動物世界」，遊園必坐的（小火車）及（空中纜車），更會著重探訪「熊貓村」，尤其要去睇全球唯一熊貓三胞胎🐼萌萌、🐼帥帥同🐼酷酷.....

全文內容

今日我哋就繼續「廣州長隆渡假園區」的（Part 2下篇）

各位朋友如果冇睇過（Part 1上篇），可點擊以下連結睇番

✅📌廣州長隆 ~ 入住童話Feel【熊貓酒店】、【長隆野生動物世界（熊貓餐廳）】午餐（上篇 PART 1）

上編講到入住「長隆 ~ 熊貓酒店」，而今次呢篇一開頭，就會講「熊貓酒店」的自助晚餐

我哋喺旅遊平台購買咗晚餐，去到入口喺櫃檯出示二維碼就可以入去開餐

餐飲資訊

🔽餐飲美食禮遇：
➤入住酒店每房每晚包含一位兒童（用餐當日年齡已滿3歲但未滿12歲，或身高達到1.0米但未超過1.5米）之自助午餐或晚餐，鑑於兒童為未成年人，需照顧兒童用餐安全，每位兒童票至少需一位成年監護人陪同及付費用餐，僅限入住期間在餐廳開放時間內使用

自助晚餐時間： 17:30 - 21:00/21:30

酒店嘅「熊貓自助餐廳」一啲都唔細面積非常大，閒閒哋坐幾百人絕冇問題

享用自助晚餐仲可以欣賞到『熊貓奇幻劇場』

圖片出自：廣州長隆旅遊度假區

『熊貓奇幻劇場』由台灣著名技術團隊，為「熊貓自助餐廳」精心打造『熊貓家族的奇幻故事』劇場，每天上演熊貓三胞胎（🐼萌萌、🐼帥帥、🐼酷酷）一家的趣事，小朋友應該最鍾意

表演時間: 

早場: 08:00-10:00 

午場: 12:00-14:00 

晚場: 18:00-20:30 

(每次播放5個故事，約30分鐘，每20分鐘播放一次，自動輪播形式，如有調整，請以現場公告為準)

原本我想每個菜式都影相畀大家睇，但係去到發現真係冇咁嘅可能，除非拍片，因為實在太多食物

全部食物都擺放得整整齊齊，擺盤同五星級酒店自助餐冇分別

首先同大家睇下冷盤類：有青口、凍蝦、大蜆、螺肉

成張圓枱圍住唔同種類嘅飲品，有好多選擇

餐廳最受歡迎嘅係蒸海鮮，包括有蒸蟹、蒸蠔、蒸鱔魚，另外有蒸白米飯、蒸臘味飯

喺各省市都非常受歡迎嘅 ~ 串燒

喺「廣東」點少得 ～正宗燒味

呢邊見到有：燒牛肉、燒五花肉、燒魷魚鬚

下圖就全部都係煎，有煎香草腸、煎豬扒、煎白倉魚、煎牙帶魚、煎雞扒、煎牛扒、煎羊扒

仲有一人打邊爐窩

有打邊爐嘅材料任選，包括有蜆、生蠔、青口、魚片、丸類、肉片、蝦滑、墨魚滑、手打牛肉丸

下圖呢張可能影得比較清楚啲

最經典仲有新鮮牛肉，即切用嚟打邊爐

牛肉睇落非常新鮮

都係第一次見到有專門烚菜court

跟住就見到 ~ 椰皇雞湯、牛骨湯麻辣燙

呢邊有 ~ 香辣大盤魚，其他唔係太特別，就唔逐一影相了

鏡頭一轉就見到 ~ 香煎鴨胸、肉蟹炒年糕

連早點嘅食物都有，例如 ~ 酸菜魚片腸粉、黑椒牛肉腸粉、雞蛋腸粉、金沙鮮蝦腸粉、椰子鮑魚雞粥、皮蛋瘦肉粥

係咪睇到開始流口水呢？跟住見到嘅有 ~ 擔擔麵、牛肉麵、雲吞麵，基本上乜嘢面都搵到

燉湯同燉甜品都有，有椰皇燉竹絲雞、冰糖燉柑桔

甜品之中我最不喜歡的 ~ 廣東八寶茶、熊貓八寶粥，食呢兩樣甜品，真係會過飽

蒸包點 ~ 對我嚟講都係只可以睇，唔可以食，真係攞一兩個食落肚，其他野食我就真係食唔落

除咗叉燒包仲有千層糕，包點嘅造型好可愛，有老虎、小雞，啱曬小朋友

長隆整嘅（榴槤酥）真係幾好味，中間同右邊嘅就係（老婆餅、一口酥）

另一甜品就非常有當地特色 ～ 番禺沙灣姜撞奶

除咗中式包點，還有Pizza、葡撻、麵包布甸、馬仔

小朋友最喜歡嘅糖果、餅乾、薯片

動物系列布丁，焦糖燉蛋，紫薯布甸、椰蓉芒果布丁

兔仔布丁，造型非常逼真，逼真到有點難以下咽😅

呢邊就係傳統蛋糕，譬如有（黑森林蛋糕、藍莓Mouse蛋糕、草莓雜果蛋糕、糯米磁.....等）

見到呢個熊貓造型嘅蛋糕真係超級心心眼😍

大家估到呢款係乜嘢蛋糕嗎？裏面係有榴槤餡嘅榴槤蛋糕，都非常好味😋

呢度仲有一個個生果

蒸熟咗嘅生蠔，食法始終同生食有啲分別，不過蒸熟咗可能食得更安心一些

魚生其實仲有希靈魚、吞拿魚，不過我要三文魚都已經畀咁大碟我，其他嘅真係怕食唔落，浪費食物就唔好啦

自助晚餐二百幾左右一位，比起一支雪糕棒賣35人民幣，自助餐其實性價比都算高，另外我哋亦都幫襯埋酒店嘅自助早餐（同一地方），詳細嘅內容早餐就唔多講了，總之比晚餐嘅款式，食物少一半左右，但係同樣價錢亦係晚餐嘅一半，所以都算抵食，「長隆」嘅（皮蛋瘦肉粥）都幾好味

食埋三隻鳳爪加炒麵就已經飽到上額頭😅

第二日食完早餐，我哋一早又再出發去 ～

廣州長隆野生動物園區

「長隆野生動物世界」劃分

①🔻行車遊覽區（乘小火車/自駕）
👉乘車遊覽區佔地近100萬平方米，（門票已包含費用），可分為『澳洲森林』、『美洲叢林』、『中亞沙漠』、『南亞雨林』、『歐洲山地』、『狂野地帶』、『南非高原』、『東非草原』八個區域，旅客可在「北門」附近搭乘小火車遊覽或自駕遊覽。 搭乘小火車遊覽全程約30分鐘包含講解；自駕遊的遊客需在園區另外再購自駕票（300-350人民幣），相較於搭乘小火車，自駕遊沒有時間限制，但同時也沒有講解服務。 *乘車／自駕車遊覽區內居住的野生動物較為兇猛及罕有，遊客要注意不要擅自投餵動物或自行在中途下車啊！
👉廣州長隆野生動物世界自駕遊覽區收費為平日¥300/車，特定日（週末、節假日、暑假）¥350/車。自駕票僅為車輛入園憑證，車上遊客需另購野生動物世界步行區門票。自駕區開放時間為9:30-16:30，建議經北門進入
②🔻步行遊覽區
步行遊覽區共有十多個動物展區，遊客可徒步跟各種野生動物近距離接觸，園區內分為『亞洲象園』、『百虎山』、『科莫多龍龍宮』」、『熊貓樂園』、『非洲長廊』等區域，當中包含樹熊、長頸鹿、駱駝、黑葉猴等動物；此外，不少展區還包含各式各樣的體驗活動可供家庭參與，例如動物行為展示、動物投餵等，讓遊客以不同的方式與動物互動 。 *動物投餵費用為¥10至30不等。

上一篇其實已經有介紹過入園嘅資訊，如果訂房嘅時候係已經包含門票嘅話，咁就簡單直接好多，因為住客係可以提早半小時入場（09:00開始），專門俾住客乘搭嘅接駁車，從早上08：45就有特快專車，直接到達「北門」

入埸門票(👈可點擊觀看} ：  

營運時間：
南門區 South Gate Area	09:15-18:00
北門區 North Gate Area	09:15-18:00
行車區 Safari on Wheels	09:15-16:30 (16:30最後進入)	如需自駕的遊客，須持自駕車票+遊客門票先遊玩自駕遊覽區後，再入步行區
青龍百虎區 Dragon and Tiger Areas	10:00-18:00 (青龍山17:30最後進入)
中心區 Central Area	11:15-18:00

我哋今朝早主要嘅行程，就係坐接駁車到「北門」，之後就乘坐小火車遊覽園區，小火車嘅路線同時可以自駕，想自駕定係搭小火車就睇個人取向，下圖就係乘坐小火車或自駕所經過的區域

（「北門」入口距離乘小火車處非常近）

🚂另外「野生動物園區」除咗（小火車），另外還有（空中纜車），亦係非常經典遊覽方式

等坐完（小火車）之後我哋就會去座（空中纜車）

圖片出自：廣州長隆旅遊度假區

喺「北門」落車後，經工作人員檢查酒店房卡（證明係酒店住客），就可以行『快速通道』去乘坐小火車，在排隊等小火車時，抬頭向上望，就見到園區另一經典「空中纜車」

「北門」呢邊嘅人工湖就係「天鵝湖」

以為係酒店住客可以早入場，理論上應該不用等太耐就可以坐上小火車

但我太睇小「廣州長隆度假園區」的入住率，除咗「熊貓酒店」、呢個園區仲有「長隆酒店」、「長隆香江酒店」，三棟酒店嘅入住率都非常高

結果唔計街外人，我哋排隊等（小火車）都等咗50分鐘😱，所以如果唔介意要付費嘅話，可能購買『住客特快通關手帶』或幫襯現場的街外車（自駕）遊覽，那就不用浪費時間排隊

特快腕帶

📌飯店住客可憑房卡在園區指定店舖尊享住客優惠價購買歡樂世界、動物世界、水上樂園指定【快速參玩手腕帶】（歡樂世界僅限於歡樂至尊手環。）不設兒童長者優惠價，每房限購4條，數量有限，售完即止園，即售完賣
📌🔻購買方式與價格 購買管道：
👉主要在各園區（如歡樂世界、野生動物世界、水上樂園）的 現場銷售點、正門售票處、或園區內指定的遊客服務中心購買
📌🔻收費標準：
👉價格並非固定，會根據 平日 與 特定日（如週末、公眾假期、暑假）以及園區當日的客流量進行調整，具體收費以現場公示為準，正常情況下260人民幣一條一個人

圖片出自：廣州長隆旅遊度假區

上到小火車記得選擇坐右邊，一排可以坐四個人，臨上車前亦係4個1行排隊，因為從車望出去，大部分嘅動物都在右邊，其實有做攻略嘅人，都知道坐小火車要坐右邊，本來明明我哋係可以坐右邊，結果排前面嗰兩位阿姑，點都唔肯上先，因為上第三第四個先會坐到右邊，呢個世界上真係乜人都有👎，佢哋唔上唯有我哋兩個上先啦，何必咁計較

就算坐到右邊亦唔代表你睇得清楚，因為自駕嘅私家車，已經遮擋了不少視線

而且私家車係可以停車睇動物，而坐小火車就唔會停車畀遊客欣賞動物，匆匆走過就算

所以好多動物我都係睇到個影，曇花一現罷了，你睇到下圖嗎？搭小火車去欣賞人哋揸私家車🙄

所以我建議大家都係畀錢，幫襯街外嘅車，行自駕路線，這樣所睇到嘅動物才不會錯過

（喺園區入口，停有好多街外車，在招攬遊客做生意，又或者可以上『小紅書』搵，幫襯一啲比較有質素同口碑嘅租車）

坐小火車（仲要左邊），真係好難得先至影到一張比較完整有動物嘅相

又嚟影人哋車頂了🙄

本來我都好期待經過猛獸區，可以見到黑熊、老虎、獅子，但當行經（獅子區域）時，真係睇都未睇清楚獅子係邊個位，小火車就已經駛離了

睇老虎就比較清楚，因為老虎區域係喺小火車左邊嘅位置

犀牛雖然喺右邊嘅位置，但幸好都睇到身影

前面見到嘅就係（空中纜車）嘅「非洲草原站」（不可以上落車）

喺行車區域呢邊，最滿意見到嘅就係最尾呢一Part「東非草原」

真係見到有好多長頸鹿、斑馬、羚羊

冇鐵欄圍住，無拘無束喺度自在行走

行車區域呢邊其實真係好值得一看

起碼唔似其他動物園有鐵欄圍住，感覺動物比較多空間活動

官網話乘坐小火車，全程需時要30到40分鐘，但係當日我哋坐咗20分鐘就已經完成，你話阿師傅幾趕住載人呢

坐完小火車，我哋就喺「天鵝湖站」（靠近北門）乘搭『空中纜車』

空中纜車

▶️「廣州長隆野生動物世界」的「空中纜車」是園內的標誌性項目，全長約 2.4 公里，纜車票價已包含在園區門票內，遊客無需額外付費即可無限次搭乘（視乎現場排隊情況）
🔻纜車共有3個站點：
▶️「熊貓樂園站」、「非洲草原站」、「天鵝湖站」
🔻路線主要分為2條線：
▶️《環園線》和《天鵝湖線》，也只在「熊貓樂園站」和「天鵝湖站」可以上車和下車，「非洲草原站」不」能上下車站
①《天鵝湖線》：是從熊貓樂園站－天鵝湖站的路線，纜車將低空橫跨天鵝湖和鴛鴦湖，在纜車上俯瞰整個天鵝湖
②《環園線》：從「熊貓樂園站」－「東非草原站」－「天鵝湖站」－「熊貓樂園站」！整個路程大概30分鐘，低空掠過整個園區時可以再看一遍動物，可以看到在奔騰的長頸鹿、跳羚、斑馬等，還可以從空中看到無尾熊館和熊貓樂園

「天鵝湖站」上纜車，其實會經過「非洲草原站」（不設上落），之後就到達「熊貓樂園站」（即係上一篇睇熊貓嗰度）

喺「天鵝湖站」唔需要等太耐，就可以上到車

「天鵝湖站」相對「熊貓樂園站」冇咁多人排隊，因為官網說明從「熊貓樂園站」上車，可以乘坐『圓環線』，原本我哋都係昨日在（徒步區）都諗住乘坐空中纜車，但眼見太多人，所以選擇今日喺「天鵝湖站」坐番過去「熊貓樂園站」

其實喺「天鵝湖站」上車，都可以從高空腑瞰睇動物（即係剛剛坐小火車睇到嘅動物）

園區嘅大象都分有幾種，喺『行車區』見到嘅係非洲象

我哋仲要非常好彩，坐到腳底係透明玻璃嘅『水晶車廂』，視野更刺激，（不過據說數量較少，要坐就要排隊等）

喺高空見到老虎嘅身形，相對變得細小

睇背脊真係好難睇到，佢係一隻乜嘢動物😅

條頸咁長嘅就一定係長頸鹿啦

睇下幾多私家車係週圍，長頸鹿、斑馬都可能已經習慣有私家車在旁邊轉來轉去

好快就到咗「非洲草原站」，（只係經過，不可以上車、落車）

喺「非洲草原站」再開始駛向「熊貓樂園站」，會見到乘搭空中纜車時，先至見得到嘅兩隻熊貓，下圖就是其中一隻🐼友友

喺低空見到長頸鹿食嘢，感覺真神奇，不用抬高頭，就可以睇到清清楚楚

去到「熊貓樂園站」 （即係上篇去過嘅地方），我哋係熊貓fans，當然又再去睇一次熊貓🐼，（今日主要行下圖紫色圈部份）

不過其實『徒步區』呢邊，都有好多節目可以參觀，所以記得入場時候睇清楚告示板，記低時間

主要頂目表演時間：（每月或日可能不一樣）

分類 Items	項目 Programs	時間 Time	區域 Zone
科普驛站 Animal Keeper Talk	鵜鶘飛翔 Birds Flying Show	9:45 10:30 11:30 13:30 14:30	天鵝湖 Swan Lake
科普驛站 Animal Keeper Talk	白虎跳水 White Tiger Jumping	12:00-16:30(每半小時一場)	百虎山 Tigers Hill
科普驛站 Animal Keeper Talk	快樂森林 Happy Forest	11:10 12:10 14:10 16:10 17:10	青龍山 Green Dragon Hill
科普劇場 Wildlife Experts	南美探秘 South American Adventure	12:00 14:00 17:15	南門區 South Gate Area
科普劇場 Wildlife Experts	非洲發現 African Discovery	12:00 14:00 17:15	南門區 South Gate Area
科普劇場 Wildlife Experts	大象傳奇 Elephant Legend	12:30	中心區 Central Area
快趣達優先通行 Fast Pass	單項優先通行券 80元起	多項優先通行手腕帶 210元起	纜車天鵝湖站入口旁 Swan Lake Station 纜車熊貓樂園站入口旁 Triplets Park Station
萌帥酷樂園 Triplets Park	瘋狂小屋 Crazy House	11:30-17:30	南門區 South Gate Area
萌帥酷樂園 Triplets Park	風箏飛人 Kite Flyer	11:30-17:30	南門區 South Gate Area
萌帥酷樂園 Triplets Park	小蜜蜂 Jump Around	11:00-15:30	南門區 South Gate Area
萌帥酷樂園 Triplets Park	迷你摩天輪 Mini Ferris Wheel	12:00-17:30	南門區 South Gate Area
萌帥酷樂園 Triplets Park	茶壺火車 Teapot Train	10:30-17:30	南門區 South Gate Area
兒童天地 Children's World	妹猪卡丁車 Mei Zhu Kart	11:30-17:30	中心區 Central Area
貓熊樂園 Panda Park	小秋千 Lolly Swing	10:30-17:30	中心區 Central Area
貓熊樂園 Panda Park	桑巴氣球 Samba Tower	10:30-17:30	中心區 Central Area
遊藝設備 Amusement Facility	小火車 Safari on Wheels	09:15-16:30	北門區 North Gate Area
遊藝設備 Amusement Facility	纜車 Cable Ca	10:15-17:30	天鵝湖站 Swan Lake Station 熊貓樂園站 Triplets Park Station
遊藝設備 Amusement Facility	4D影院 4D Theatre	10:30-17:30 (逢整點半點一場)	南門區 South Gate Area

昨天已來過一次嘅「熊貓村」，我哋今日又再去一次，上篇其實只係講咗熊貓🐼親親同🐼國慶，今次呢篇會講更多熊貓畀大家認識

下邊呢個圖就可以清楚睇到，「廣州長隆」熊貓嘅家庭族譜，大致上可以分為四個家族：

「廣州長隆」熊貓家庭族譜

🔻大熊貓🐼婷婷
▶️🐼婷婷為媽媽，而兩姐弟中的🐼悅悅是🐼婷婷女兒，🐼婷仔是🐼婷婷兒子

🔻大熊貓🐼菊笑
▶️🐼菊笑生咗全球唯一的三胞胎，分別是姊姊🐼萌萌、二哥🐼帥帥同細佬🐼酷酷，而大家姊🐼萌萌於1年多前與大熊貓🐼家和，生咗女兒🐼妹珠

🔻大熊貓🐼梅清
▶️🐼梅清生有4子女，分別為長公主🐼隆隆、雙胞胎兄弟（哥哥🐼親親、弟弟🐼愛愛）、同最細嘅女兒🐼國慶，而🐼隆仔就係長公主🐼隆隆的兒子

🔻大熊貓🐼友友
▶️剛剛乘坐空中纜車時，見到嘅🐼友友係單身漢，所以係一個家族

而家各位係咪都好清楚了解呢🤭

不過長隆都係主要用🐼萌萌、🐼帥帥、🐼酷酷三胞胎嚟做Gimmick

呢邊真係有好多熊貓公仔可以影相

我哋首先去睇新寵，大熊貓🐼妹珠

🐼妹珠都有好多fans

🐼妹珠專屬嘅座椅同玩具飛碟

你睇下呢隻未夠兩歲小熊貓真係幾可愛🥰

如果大家又留意佢嘅短片，佢都算係一隻十分聰明嘅熊貓，任何玩具都玩到可以出神入化

不過大家唔好畀佢外表騙到，熊仔細細就已經榮升為『長隆三大惡熊』之一

因為🐼妹珠未開始出牙仔，就已經鍾意咬人

算係一隻十分古靈精怪嘅熊貓仔

第二日見到嘅🐼珠妹同樣精靈

呢位就係🐼珠妹嘅媽媽🐼萌萌

「長隆 」大熊貓三胞胎中的姐姐，呢位「長隆 」大小姐，以一天生氣800次出曬名，生氣時候就鍾意用個背脊對住人唔睬人

其實淨係參觀「熊貓村」，每一隻認真睇嘅話，都已經用咗唔少時間，所以嚟參觀「野生動物園區」記得要預多啲時間

另外園區係允許嬰兒車進入，如果參觀熊貓時，人太多就要小心畀嬰兒車撞到，我家主子已被撞了幾次，（其實人多推住㗎嬰兒車真係有啲危險，人逼人平衡唔到，就好易跌落架嬰兒車度😓）

跟住見到嘅就係🐼婷仔，2018年出生，牠經常與同年出生的另一隻大熊貓🐼隆仔一起活動，兩熊曾被合稱為「長隆」的『熊貓雙寶』

跟住見到嘅係🐼婷仔家姊🐼悅悅，兩日見到🐼悅悅都係在zzzzz，🐼悅悅係『長隆三大惡熊』之一，喜歡揀飲擇食，有唔啱心水嘅食物，就會對飼養員目露兇光

另一家庭的大熊貓🐼愛愛

同樣兩日都係瞓覺嘅🐼愛愛，瞓到流曬口水，不過男仔唔緊要啦，唔使顧及儀態🤭

跟住見到嘅就係大熊貓三胞胎的二哥🐼帥帥

真開心見到🐼帥帥喺度食嘢

喺2024年7月29日，大熊貓🐼帥帥同姊姊🐼萌萌、弟弟🐼酷酷，獲得健力士世界紀錄『首例繁殖成功的大熊貓三胞胎』&『最長壽的大熊貓三胞胎』兩項認證

🐼帥帥有一件很出位嘅玩具咖啡杯，係電動㗎，而且開著嘅時候🐼帥帥會坐喺上面

下一位熊貓就係『長隆長公主』🐼隆隆

🐼隆隆係「華南地區」第一代繁育嘅大熊貓，長公主🐼隆隆又名『霸王隆』，聽個名就知佢係『長隆三大惡熊』之一

公主殿下同樣在睡午覺，大家嚟睇熊貓建議都係朝早會好啲，稍為晏啲熊貓們就瞓覺

第一日見到三胞胎弟弟🐼酷酷在睡覺

跟住第二日就好開心見到佢喺度食嘢🥰

🐼酷酷同哥哥一樣，都有一件出位的玩具，就係電動小火車，同樣都電動㗎，開著時🐼酷酷會坐喺車頭遊車河，車頭仲會噴煙架🚊

跟住見到呢隻就係長隆駙馬🐼家和，由「四川」入贅「廣州」，係大熊貓三胞胎家姊🐼萌萌老公，🐼妹珠的爸爸

參觀完熊貓之後，發現了一棵很特別的植物 ~

 地涌金蓮

俗稱又叫做千瓣蓮花、地金蓮、不倒金剛，原產地係「中國雲南省」，其實名我就聽過，但係都係第一次見到

跟住我哋就睇下「長隆」其他動物，去到「亞洲象園區」，見到小象🐘威風，🐘威風於2021年出生，係一隻好攪笑嘅小象

佢非常可愛，同我心上熊🐼福寶， 一樣古靈精怪🤣

「長隆」一個特別嘅節目，就係睇『老虎跳水』

白虎是「長隆野生動物世界」的鎮園之寶，也是「長隆集團」的吉祥物

圖片出自：廣州長隆旅遊度假區

目前「長隆野生動物世界」已經擁有超過150多隻白虎，被稱為世界白虎王國也當之無愧

除了白虎，還有華南虎、金虎、銀虎以及孟加拉虎和東北虎等六大虎種，總數達300多隻

每種老虎都有自己的單獨生活區域，嚟「長隆」除咗睇熊貓，睇老虎亦係不能錯過嘅項目

圖片出自：廣州長隆旅遊度假區

跟住就嚟到「考拉園區」（樹熊）

「長隆」係國內首間，獲準引進「澳洲」國寶🐨樹熊的機構，由2006年4月首批6隻🐨樹熊定居「長隆」之後，僅半年；全球唯一嘅🐨樹熊雙胞胎🐨歡歡、🐨樂樂出生，（除咗熊貓可以生三胞胎，「長隆」其他動物都真係幾好生養😚）

呢隻樹熊叫🐨錢多多

都幾好動活潑㗎

樹熊對面仲有鸚鵡睇，紅紅綠綠嘅羽毛十分搶眼

其他較特別嘅動物仲有小河馬

講真我最初以為只係電視劇（無線夜晚八點嗰套），作個名出嚟，點知原來真係有種爬蟲類叫（科莫多龍），今次嚟「長隆」真係長知識

圖片出自：廣州長隆旅遊度假區

同我家主子嘅動作一樣，樹懶

跟住呢區見到嘅動物全部都可以餵飼

水豚個樣真係幾得意

超級多人鍾意餵長頸鹿

午餐我哋就喺考拉園區度食

價錢都唔算平㗎

長隆野生動物園區仲有以下設施 ~

 4D影院 

4D影院播放的動畫以「長隆野生動物園 」內『全球唯一存活的大熊貓三胞胎』——🐼萌萌、🐼帥帥及🐼酷酷，為故事主角，全片約30分鐘。 故事講述了大熊貓三胞胎為實現熊貓爸爸願望的冒險故事；影院以杜比全景聲環音系統讓遊客從視覺、聽覺、觸覺、嗅覺等全方位沉浸在逼真的故事環境中

兒童天地

「長隆野生動物世界 」除了參觀動物外，還設有「兒童天地」等一系列遊樂設施，當中包含小型過山車、迷你摩天輪、空中千秋、卡丁車等，讓小朋友在學習動物知識的同時也能盡情玩樂

除咗「野生動物園區」之外，「廣州長隆」仲有 ~

水上樂園

 歡樂世界

飛鳥樂園

長隆國際大馬戲

圖片出自：廣州長隆旅遊度假區

📅 建議行程 (2日1夜)： 

·Day 1：下午抵達「廣州」，入住「長隆熊貓酒店」 > 喺酒店探索、影相、玩設施或到「飛鳥樂園」、「歡樂世界」 > 享用「熊貓自助晚餐」及觀看奇幻劇場 > 有精力可加看「大馬戲」

 Day 2：搭提前入園巴士，一早進入「野生動物世界」 >  搭乘觀光小火車 >「考拉園」、「白虎山」等  >直奔「熊貓村」步行遊覽 > 中午「熊貓餐廳」用餐 > 下午搭乘「空中纜車（環園線） 」> 結束行程

🕒 觀賞動物黃金時間：  

想見到動物最生猛嘅一面，記住以下兩個黃金時間：

· 上午開園後 (9:30 - 11:00)：動物經過一晚休息，晨早最活躍，特別係大熊貓、老虎等

· 下午近傍晚 (15:00 - 17:00)：天氣冇咁熱，動物又會開始出來活動同等候餵食

下次同樣希望，可以寫一些另類嘅景點同大家分享

我嘅『日本四國篇』，還有慢慢長路未寫完，記得要睇喔！謝謝大家❤️

Share: