廣州長隆 ~ 入住童話Feel【熊貓酒店】、【長隆野生動物世界（熊貓餐廳）】午餐（上篇 PART 1）

「廣州長隆」 ~ 入住童話Feel「熊貓酒店」，會同大家參觀「熊貓酒店」有甚麼設施、優惠，亦會去「長隆野生動物世界」內的「熊貓餐廳」午餐，餐廳有熊貓🐼親親陪食午餐，喜歡熊貓的朋友千萬不要錯過.....

全文內容

今次攪攪新意思，喜歡熊貓嘅朋友，就千萬不要錯過這篇同下一篇～

廣州長隆旅遊度假區

酒店資訊

地址：廣州市番禺區漢溪大道東299号

電話：020-84722888

入住及退房時間：15:00-11:00

首先呢篇會講入住「廣州長隆」的「熊貓酒店」，又會同大家睇下「長隆野生動物世界」裡面嘅「熊貓餐廳」

而下一篇就會講「廣州長隆~熊貓酒店」嘅自助晚餐、同埋去「長隆野生動物世界」搭小火車、空中纜車睇動物，我呢啲熊貓fans，最主要當然係參觀「🐼熊貓村」十多隻熊貓

我哋而家就正式出發📢

首先同大家講下

「香港」去「廣州長隆」的方法：  

交通資訊

🔽公共交通：
①➤搭乘高鐵到「廣州南高鐵站」，步行約5分鐘到「廣州南地鐵站」，搭乘《7號線》約10分鐘到「漢溪長隆地鐵站」（E出口/D出口）步行約5分鐘到「長隆地鐵廣場接駁巴士站」轉乘園區接駁巴士（搭乘長隆免費穿梭巴即可到達各樂園園區及飯店）
②➤到「廣州南高鐵站」後，亦可以乘搭《長隆專線車》（廣州南站⇄廣州長隆度假區），會途徑「廣州長隆熊貓飯店」、「長隆飯店」及「長隆香江飯店」車程約35分鐘
②⭐備註：
1. 售票點：關注「廣州東站汽車站」公眾號
2. 可選乘車日期以「廣州東站汽車站」公眾號顯示為準
3. 詳情可諮詢 020-87728200

而我哋就乘搭🔻

【環島中港通直通巴】  

可以由「東涌」直接去到「長隆」，因為而家有「屯赤隧道」，再加上行「深中通道」，唔使3個鐘就可以到達

搭高鐵固然係快，但左轉車右轉車實在太麻煩，而且大家乘搭嘅時間都差不多，我哋就一定會揀直通巴

喺「深圳灣口岸」過關之後，好快就駛上「深中通道」

唔使舟車勞動一程車就嚟到 ~

廣州長隆 ~ 熊貓酒店

今次旅行嘅重心，就係呢間以全球唯一大熊貓三胞胎（🐼萌萌、🐼帥帥、🐼酷酷）為主題嘅酒店。未入門口已經被佢色彩繽紛、好似童話城堡咁嘅外觀吸引到哇哇聲

「 熊貓酒店」顧名思義，一定會多熊貓公仔設置，畀遊客影相

一入酒店大門就覺得五彩繽紛

非常有童真，同好似開party嘅感覺🎉

熊貓聖誕樹，嘩😍！真係心心眼

酒店裡面仲有個 『動物展廳』，可以近距離睇到啲珍奇禽鳥，就算唔出酒店都唔會悶

跟住就睇下酒店有啲乜嘢商店同設施：

如果好似我哋咁，訂房已經包入住之日期兩日內無限次遊3園（動物世界、歡樂世界、飛鳥樂園）之套票，就要去票務中心整入場手續，最重要嘅就係有人面識別系統，靠個樣就可以入場，超級方便💯

（當然亦會有實體票供應以防萬一）

酒店大堂週圍都有好多補給站、零食售賣機

酒店地下大堂面積非常大，指示方向牌亦標示得非常清楚

 酒店週圍都見到有熊貓（🐼萌萌、🐼帥帥、🐼酷酷）嘅身影

酒店當然唔少得有禮品店

店裏面可以買到大熊貓三胞胎（🐼萌萌、🐼帥帥、🐼酷酷）同（🐼妹珠《三胞胎大家姊🐼萌萌嗰女》）嘅公仔，未入動物園已經可以掃貨

大熊貓三胞胎（🐼萌萌、🐼帥帥、🐼酷酷），喺「長隆 」是最有話題熱度的熊貓，但自從🐼萌萌生咗個女🐼妹珠之後，🐼妹珠就將媽媽、舅舅的話題熱度搶去不少，🐼妹珠熊貓公仔亦很受歡迎

普通細細隻熊貓公仔幾十元人民幣就有交易，

全場最靚、最吸引人攬住嗰隻，售價要2000人民幣😱

以下呢間熊貓生活館

可以買到「長隆」紀念品，還可以點上一杯咖啡和甜點，聽聽音樂，享受愜意時光

亦有便利店，個店名真夠簡單直接 ~ 熊貓便利店

居然會見到美甲店，咁神奇😱，因為我有啲潔癖，留長指甲怕藏污垢、細菌，所以呢類店舖與我無緣份

酒店嘅餐飲除咗有熊貓自助餐廳（下一篇會詳細介紹，酒店的自助晚餐），仲有以下這個地方提供美食 ~ 

美食小鎮

全部自助點餐，用電子貨幣結算，唔使找續又唔使去換錢真係好方便💯

美食小鎮共有18間檔口，總有一間啱你心水

所有店舖都佈置得特別童話feel

驟眼睇亦都十分乾淨、企理

小朋友見到呢啲佈置，可能都會好樂意喺度食飯

就算唔食「熊貓酒店」嘅自助餐，呢度都有好多餐飲可供選擇，包括有廣式燒味、四川烤魚、壽司刺身、粵色小炒.....等

熊貓酒水屋

基本上呢度任何種類飲品，都能夠搵得到

「 美食小鎮」更提供從品嚐美食到參與製作美食的機會，小鎮內設立的DIY學堂，配備各式烘焙設備、烹飪器材，由專業廚師定期開展包括西點烘焙、沙律簡餐、精美甜品等不同烹飪課程以及花藝課程

萌萌🐼、帥帥🐼、酷酷🐼嘅商品購買機隨處可見

「 美食小鎮」嘅面積都十分之大

大到有兒童遊樂區，所以「熊貓酒店」基本上嘅設計概念，係一間百份百的親子酒店

圖片出自：廣州長隆旅遊度假區

附近仲有好多以熊貓為包裝嘅商品售賣

以熊貓做包裝嘅雪糕、雪條

價錢都唔平㗎，35元人民幣一支雪糕棒，妹珠🐼雪糕食落味道真係怪怪地☹️，水蜜桃嘅香味實在太奇怪，好似空氣清新劑

酒店都有健身室，而且規模唔算細

圖片出自：廣州長隆旅遊度假區

入住酒店有乜嘢優惠：  

入住酒店之優惠

▶️預訂飯店一票多園住房套票 ~ 尊享「 廣州長隆」三大主題樂園（動物世界+歡樂世界+飛鳥樂園），入住之日期兩日內無限次遊園
▶️接駁巴士 ~ 飯店住客可免費乘搭往「長隆野生動物世界」及「長隆飛鳥樂園」兩大樂園的園區接駁巴士
▶️住客專道，快速入園 ~
①「長隆野生動物世界」➨南門➨飯店住客VIP專用通道，「長隆野生動物世界」➨北門➨飯店住客VIP專用通道
②「長隆歡樂世界」➨北門➨飯店住客VIP專用通道
③「長隆水上樂園」➨熊貓飯店VIP專用通道：飯店二樓天橋連廊往水上樂園VIP通道，沿途標示「水上樂園」標示的指引通道。（如遇園區客流高峰，將需統一依照園區即時安排的入口分流進園）
▶️餐飲美食（美味禮遇）~ 每房包含一位兒童（用餐當日年齡已滿3歲但未滿12歲，或身高達到1.0米但未超過1.5米）的自助午餐或晚餐，鑑於兒童為未成年人，需照顧兒童用餐安全，每位兒童票至少需一位成年監護人陪同及付費用餐，僅限入住期間在餐廳開放時間內使用
▶️《卡卡兒童俱樂部課程》~ 預訂「熊貓酒店（王子家庭房）」，每房包含一堂《卡卡兒童俱樂部課程》，使用前需提前半小時到「貴賓接待廊」➨「卡卡虎俱樂部」處預約（部分課程需提前一天預約，以現場諮詢為準）
▶️逢週六免費參加《晚安故事會活動》~ 活動當天當天18:00點前到「貴賓接待廊」➨「卡卡虎俱樂部」預約，（名額有限，先到先得）

如果有帶小朋友嘅話就千祈唔好錯過：

熊貓三寶歡樂見面會：  

互動時間 ～

📌大堂▶️：10:00-10:30、11:00-11:30、15:00-15:30、16:00-16:30
📌熊貓自助餐廳▶️08:30-08:50、12:00-12:20、18:00-18:20
📌美食小鎮▶️12:40-13:00、18:40-19:00

圖片出自：廣州長隆旅遊度假區

由於仲未夠15:00攞房，我哋就擺低行李出發去「野生動物世界」間「熊貓餐廳」開餐，啲行李多到嚇親人，我哋都身受其害，因為我哋個喼可能太細，被遮擋住，去完「動物世界」返嚟，酒店職員搵咗半個鐘行李🙄，真係一言難盡🙄🙄

🚌 出發去「野生動物世界」有免費接駁車接送

由大堂呢個位置搭電梯，就可以去到1樓乘搭接駁車

我哋走都係喺呢度等直通巴士回香港，認真方便

接駁車會途經幾個站，如果去「野生動物世界」睇熊貓，喺「南門」落車就可以了

（自己行路過去要1.9公里）

長隆野生動物世界

入埸門票(👈可點擊觀看} ：  

園區開放時間（通常09:30-18:00）

我哋嘅套票雖然已包含3大樂園門票，但我哋今次主要都係去「野生動物世界」睇熊貓，而「野生動物世界」可分為

①行車遊覽區（乘小火車/自駕） ：  

②步行遊覽區 ：  

「長隆野生動物世界」劃分

①🔻行車遊覽區（乘小火車/自駕）
👉乘車遊覽區佔地近100萬平方米，（門票已包含費用），可分為『澳洲森林』、『美洲叢林』、『中亞沙漠』、『南亞雨林』、『歐洲山地』、『狂野地帶』、『南非高原』、『東非草原』八個區域，旅客可在「北門」附近搭乘小火車遊覽或自駕遊覽。 搭乘小火車遊覽全程約30分鐘包含講解；自駕遊的遊客需在園區另外再購自駕票（300-350人民幣），相較於搭乘小火車，自駕遊沒有時間限制，但同時也沒有講解服務。 *乘車／自駕車遊覽區內居住的野生動物較為兇猛及罕有，遊客要注意不要擅自投餵動物或自行在中途下車啊！
👉廣州長隆野生動物世界自駕遊覽區收費為平日¥300/車，特定日（週末、節假日、暑假）¥350/車。自駕票僅為車輛入園憑證，車上遊客需另購野生動物世界步行區門票。自駕區開放時間為9:30-16:30，建議經北門進入
②🔻步行遊覽區
步行遊覽區共有十多個動物展區，遊客可徒步跟各種野生動物近距離接觸，園區內分為『亞洲象園』、『百虎山』、『科莫多龍龍宮』」、『熊貓樂園』、『非洲長廊』等區域，當中包含樹熊、長頸鹿、駱駝、黑葉猴等動物；此外，不少展區還包含各式各樣的體驗活動可供家庭參與，例如動物行為展示、動物投餵等，讓遊客以不同的方式與動物互動 。 *動物投餵費用為¥10至30不等。

 今日下午我哋主要參觀「②步行遊覽區」

至於園區的 ①行車遊覽區（乘小火車/自駕）同其他特色（包括空中纜車.....等），會在下一篇詳細講解

（我哋今次主要行下圖黃色圈部份）

酒店住宿之客人前往3大樂園，可經以下方式免排隊體驗各類設施

住客前往樂園之優惠： 

特快腕帶

📌飯店住客可憑房卡在園區指定店舖尊享住客優惠價購買歡樂世界、動物世界、水上樂園指定【快速參玩手腕帶】（歡樂世界僅限於歡樂至尊手環。）不設兒童長者優惠價，每房限購4條，數量有限，售完即止園，即售完賣
📌🔻購買方式與價格 購買管道：
👉主要在各園區（如歡樂世界、野生動物世界、水上樂園）的 現場銷售點、正門售票處、或園區內指定的遊客服務中心購買
📌🔻收費標準：
👉價格並非固定，會根據 平日 與 特定日（如週末、公眾假期、暑假）以及園區當日的客流量進行調整，具體收費以現場公示為準，正常情況下210人民幣起一條一個人

圖片出自：廣州長隆旅遊度假區

去到「南門」入口，已經見到熊貓三胞胎🐼萌萌、🐼帥帥、🐼酷酷公仔

刷臉就可以入到嚟，真係超級方便，唔使摷入場券

園區有附費接駁車，唔想行畀錢就可以解決

雖然事先已做過功課，但入到嚟都照舊要睇下地圖，咁就穩陣好多

今日下午入嚟「野生動物園區」，最主要係去「熊貓餐廳」食午餐，兼順路參觀一下我最愛嘅「熊貓村」

前往餐廳途中會先經過火烈鳥園區

呢度嘅火烈鳥數目多到鏡頭都影唔曬

如果有密集恐懼症見到咁多火烈鳥會唔會感到害怕？

鳥身有微微的粉色，一大群聚在一起，就似無數精靈聚在湖中

好快就行到嚟 ~

熊貓餐廳

喺度影相就係等於同「熊貓餐廳」賣廣告😂

同「美食小鎮」一樣，都係自助點餐，電子支付就可以了

圖片出自：廣州長隆旅遊度假區

呢度靠落地玻璃窗嘅坐位，係最多人選擇嘅

因為玻璃外面就有熊貓🐼親親可以睇到

熊貓🐼親親係長隆🐼梅青（梅貴妃）的孩子，今年已經9歲

佢都完全唔會理會餐廳嘅人，自顧自過得的優哉悠哉

「熊貓餐廳」嘅菜式以中餐為主，我家主子就食燒鵝飯，可樂係送嘅

我就食牛肋骨湯麵，牛肋骨有強勁嘅牛騷味，同埋肉質太煙韌，煮得未係太軟身，咬入口要拉扯一下，麵係寬麵條，我比較喜歡食米線、粉絲、米粉，呢啲咁寬闊嘅麵條唔係我杯茶☹️

呢杯有熊貓造型嘅凍飲，有一股空氣清新劑嘅香味，飲落口同（妹珠雪糕）味道一樣怪怪的😵‍💫

最驚喜都係呢個萌萌蛋糕

隻熊貓係用蛋白膠做嘅，係完全冇味道嘅，至於蛋糕唔係太甜，啲cream又夠軟身豐厚，非常不錯嘅口感

熊貓🐼親親走落地之後，就走去開餐

你有你食，佢有佢食，真係幾得意

食完午餐之後，我哋喺「熊貓餐廳」另一個出入口出嚟，就已經係熊貓村

喺「熊貓村」見到我最期待見到嘅熊貓🐼國慶

大熊貓🐼國慶，女仔嚟㗎，母親同樣係大熊貓🐼梅清（梅貴妃），🐼國慶亦係🐼梅清最後一胎寶寶，（🐼梅清現在已經退休不展出）

因為「長隆」想畀🐼梅清享受一下最後嘅親子樂，所以🐼國慶食媽媽奶，可以食到三歲半，今年6歲嘅🐼國慶因此得名（奶皇慶），而餐廳裏面嘅🐼親親就係牠的哥哥

當日🐼國慶戒奶成功，「長隆」仲專登為佢整咗個戒奶成功party🤣🤣🤣

至於其他嘅熊貓、動物，我哋會喺下一篇再詳細介紹

睇完熊貓已經接近下午4點30分，剛好可以睇埋『花車巡遊』

推薦區域：通常在『南門入口』內的主干道起始區域

幾熱鬧同幾有氣氛㗎，每日晏晝16：30喺「長隆野生世界動物園區」唔好錯過哦！

睇完花車巡遊，就係一大堆旅客，離開動物園嘅時刻，「長隆」嘅安排非常好，循環巴士數量未必應付到乘搭高峰期，所以喺繁忙嘅時候，「長隆」就租用巴士公司嘅車輛接載遊客，所以接駁車喺繁忙時段，基本上係一架接一架咁開

等候上車嘅時間，仲可以喺呢啲欄桿度坐低，真係非常好嘅設計，因為「野生動物園區」面積範圍都非常大，參觀一日嘅話，你預計要行兩萬步，行到攰攰地，等接駁車見到呢啲設計，真係衷心覺得完美💯

返到嚟「長隆熊貓酒店」，就已經夠時間可以上房間

搭電梯上房要留意，應該係搭『萌萌電梯』，定係搭『酷酷、帥帥電梯』上房，兩者是有分別的，另外又有『茶壺小火車』造型電梯，小朋友可能真會覺得好似去緊奇幻冒險

一出電梯就見到非常多熊貓彩繪嘅牆身

樓層嘅空間面積都好大

走廊亦都充滿童趣嘅設計

連地氈都有熊貓個樣

酒店有超過1500間主題房，主要分為『酷酷』、『萌萌』、『帥帥』同『王子』四大主題。我哋今次就揀咗（帥帥雙床房）

一入房門口其實就已經係洗手間

梳洗用品都係有「廣州長隆」嘅『萌、帥、酷』招牌

坐廁同沐浴區係分隔開嘅，雖然係用透明玻璃分隔，但總好過冇分隔，洗手間無水垢，非常乾淨

廁所對出就有個大衣櫃，裏面有浴袍、備用被

連衣架都係非常童真feel嘅設計，有各種動物，當然我都係鍾意熊貓

每間房都會預有小朋友入住，所以都會具備小朋友著嘅拖鞋

用消毒殺菌機，裝住飲用嘅杯，感覺好似比較安心攞嚟用

（不過以我呢種性格，我都係會用自備嘅，就算要用，我都係要用自己嘅消毒紙巾，清洗一番先會用），所以有部殺菌消毒機，對我真係無差別

有茶包同咖啡包供應，我家主子話，估唔到居然有咖啡包供應，仲要係認識嘅牌子

另外有6支飲用水供應

個雪櫃就夠曬新款，係用半導體雪櫃

有小米浴室磅

行過去就係見到電視，唔算細嘅枱可以擺嘢，亦有地方擺行李

喺書枱旁邊有部腳用按摩器，不過有二維碼係要付款解鎖先至用到

落地大窗出面有個小露台，不過因為我哋住得比較低層，所以都冇咩風景可以睇到

其實房間嘅面積真係唔算細，可以三面落床，不過就真係純粹for小朋友嘅設計，房間嘅繪圖、用色都係適合小朋友多啲，如果係我嘅話，我會更傾向於寫實一啲嘅設計，譬如用油畫風嘅熊貓，代替卡通版嘅熊貓，不過小朋友應該都喜歡呢種設計，至於我呢啲老朋友.....唯有返老還童🤣🤣🤣

另外房間亦會送一本🐼（萌、帥、酷）嘅故事書，同明信片畀入住嘅客人

另外亦會贈送呢個鎖匙扣，同樣係🐼（萌、帥、酷），是一個空嘅鐵盒仔

下一篇仍會繼續講「廣州長隆旅遊度假區」

廣州長隆 ~ 熊貓酒店（自助晚餐）、探訪【長隆野生動物世界】全球唯一熊貓三胞胎（下篇 PART 2）

記得留意哦！也謝謝您的觀看💗

Share: