【日本鎌倉住宿】MUJI風「Hotel Metropolitan鎌倉」鎌倉大都會酒店＋「小町通商店街」美食

 

「Hotel Metropolitan鎌倉」酒店位處「鎌倉JR站」旁邊，酒店由知名建築公司『日建設計』打造，以【觸動心靈的新古都】為主題設計，2020年先開幕，仲入圍過日本空間設計獎，所以呢間酒店絕唔單止係一間普通車站酒店，酒店鄰近（櫻花隧道「段葛」），櫻花季時賞櫻距離超近，「小町通商店街」亦係附近，可隨時品嚐美食及購買手信.....

全文內容

今次呢篇係『關東自駕遊』嘅最後一篇，先前幾篇已經寫咗部分「鎌倉」嘅景點，今次呢篇就會講係「鐮倉」住宿嘅酒店 ～

鎌倉大都會酒店 
Hotel Metropolitan鎌倉飯店

MAPCODE：8 216 799 *44

酒店資訊

地址：神奈川縣鎌倉市小町 1-8-1

電話：0467-60-1111（客服代表）

🔽入住及退房時間：
➤15:00-11:00

🔽停車費用：
➤（※需提前預約），每晚2000日圓，（車身高度不超過2.1米，寬度不超過1.9米）

🔽公共交通：
➤到達「JR鎌倉站」落車後，記得由車站嘅「東口」出閘，步行150公尺約2分鐘就可以到達
🔔從「東京」前往「鎌倉」的方法，請看本文末段

✨如果酒店停車場泊滿，亦可泊在與酒店合作之停車場

📌泊喺下圖Ⓐ,Ⓑ,Ⓒ,Ⓓ中任何一處停車場，住客可享停車優惠，【停車24小時收費1300日元】（不提供按小時計費的優惠）

📌記得從繳費機領取停車證並前往酒店前台辦理，自進入停車場日起計算

✴️（請注意，如果您在停車期間離開停車場，將再次收取停車費）

❶ 至 ⓫ 之停車場與飯店無任何關聯及優惠，只提供住客停車資訊

Ⓐ,Ⓑ,Ⓒ,Ⓓ停車場資訊：

🔽Ⓐタイムズ鎌倉小町第６
➤📍 MAPCODE：8 216 770 *42
➤✅步行33公尺1分鐘可到酒店，可停放9台車

🔽 Ⓑタイムズ鎌倉小町第７
➤📍 MAPCODE：8 216 803 *84
➤✅步行130公尺2分鐘可到酒店，可停放21台車

🔽Ⓒタイムズ鎌倉小町第５
➤ 📍MAPCODE：8 216 803 *01
➤✅步行140公尺2分鐘可到酒店，可停放8台車

🔽Ⓓタイムズ鎌倉小町第３
➤📍 MAPCODE：8 216 683 *17
➤✅步行300公尺4分鐘可到酒店，可停放6台車

酒店旁邊就係「鶴岡八幡宮」嘅（櫻花隧道「段葛」），如果房間窗戶對住「若宮大路」，就可以欣賞到（櫻花隧道「段葛」）嘅美景

酒店不屬於摩天大樓，就只有簡簡單單4層高，總共有138間客房

一樓（地下層）設有「Cafe&Meal MUJI」與「無印良品」販賣商店，有得食又可以購物

停車場唔喺「若宮大路」，而係近橫街「Family Mart」嗰邊

酒店停車場設係地庫，要留意泊車有車身高度限制

地庫停車場有𨋢可上到2樓酒店大堂

泊好車上酒店前，記得攞番張停車紀錄

一入到酒店大堂，已經同一般日本商務酒店好唔同。大堂唔算奢華，但有一種木質嘅溫馨感

酒店每日都會有導賞團去一些附近景點觀光，而且係免費

呢邊見到有消毒毛巾供應，另外喺

二樓呢度仲有投幣式洗衣（需付費）、自動販賣機/製冰機、吸煙區、自動外幣兌換機

同埋免費咖啡服務

咖啡供應時間： 05:30-10:00；17:00-24:00

呢間酒店唔單止係一間普通車站酒店，而係由知名建築公司『日建設計』打造，以『觸動心靈的新古都』為主題嘅作品，2020年先開幕，仲入圍過日本空間設計獎

之後更被選入『JIA優秀建築選2021（100選）』

呢度嘅設計無浮誇感、無富麗堂皇嘅壓迫感，入到嚟真有種放鬆感，就真係好似返到屋企嘅感覺

酒店有個綠意盎然嘅中庭，種滿植物，四季景致會變，經過真係會忍唔住駐足望多兩眼

成個氛圍好安靜、好放鬆，完全冇站前酒店嘅嘈雜

等𨋢上酒店房嘅位置，就有濃厚嘅日式氛圍感

連𨋢門都係木造嘅顏色，與四週圍嘅設計非常配合

上到嚟酒店房樓層，木色系列依然繼續，雖然係木色系列，但係又唔覺昏暗，而且走廊十分寬闊

我哋今次訂嘅係普通雙人房 (Double Room) ，有20 平方米/215 平方呎，雖然係普通雙人房但係價錢一啲都唔平，因為櫻花季嘅原因，呢間房連早餐為港幣$1700，不過住落又覺得都值嘅，因為真係好舒服

一入到房間左手邊就一個凹位，用嚟掛衫，下面有保險箱同埋可摺疊嘅行李架

凹位旁邊就係洗手間，面積算非常之大，4星級嘅酒店，果然浴室真係唔差

有獨立嘅沖涼間，裡面有浴缸同花灑沖涼企位

我最鍾意洗手間嘅檯面就係咁樣，有足夠嘅位置畀我擺嘢，我呢啲師奶出門都好煩㗎，瓶瓶罐罐搽面、洗面嘅一大堆，木質嘅盥洗區，非常有質感

除咗5星級嘅酒店，真係好難見到咁大嘅空間

更驚喜嘅係，酒店供應嘅梳洗用品，真係我住咁多酒店以嚟，供應得最貼心同齊全

居然有『雪肌精』嘅護膚品，另外仲有漱口水、蒸氣眼膜、舒緩肌肉嘅冷貼、浴鹽、當然唔少得有化妝棉、棉花棒、牙刷、即棄浴巾.....等

『雪肌精』一整個系列，包括洗面、搽面、保濕、乜都齊，真係超級驚喜

雖然廁所嘅空間十分大，但一對比房間嘅面積，就覺得房間唔算大

一張雙人床擺在房間中央，雖然整體房間面積唔算大，但仍可以三邊落床

有浴衣供應

床頭就冇太多地方可以擺嘢

床嘅旁邊就掛有電視，瞓喺度只能夠靠左邊睇電視，好彩我都唔會睇

床嘅另一邊就有兩張櫈同一個小茶几

櫈後面就係落地大窗，可以睇中庭景，可惜睇唔到「若宮大路」

除咗茶几，呢個櫃就係全間房唯一可以擺野嘅地方，呢間酒店普通房嘅缺點，就係冇乜地方擺雜物

櫃嘅上層擺咗水煲、水杯、茶包

而最底就有一個透明門嘅雪櫃

如果租住Premium Corner Double 和 Premium Corner Twin 客房，室內同樣有大大隻落地窗，就一定睇到「鶴岡八幡宮」嘅（櫻花隧道「段葛」），但係價錢就會更貴🤑

圖片出自：Hotel Metropolitan鎌倉

攞完房，我哋就打算步行去附近嘅「小町通商店街」

睇下有咩特色食品同手信買，由1樓（地下）出𨋢就見到酒店嘅中庭花園

地下一出𨋢行左邊就可以去到Café & Meal MUJI

  同埋MUJIcom，行右邊就係酒店出入口

喺出入口呢邊擺咗架人力車喺度，當係展品定裝飾品或係可以租用，我就沒有認真留意

個出入口設計到左轉右轉似迷宮一樣

不過有咁大個酒店名，正常都唔會錯過嘅

櫻花季住呢間酒店，真係好方便就可以睇到（櫻花隧道「段葛」）嘅美景

我哋喺「二の鳥居」呢度影咗好多相，真係百看不厭

小町通商店街

行去「小町通商店街」時，見到呢間「鎌倉」非常出名嘅手信店 ～

豐島屋 鎌倉本店

營業時間：

星期四至二09:00–19:00；星期三休息

上一篇都有講過嘅『鳩サブレ』，是「鎌倉」手信界嘅超級明星，創業百年、家傳戶曉，店裡以酥脆奶油餅乾、做成可愛鴿子外型，輕易就擄獲大人小孩嘅心，食落口感亦香甜不膩

由酒店行去「小町通商店街」非常近，只距離200公尺左右，行路3分鐘就可以到達

「小町通商店街」從「鎌倉站東口」，以「二の鳥居」為起點，向北延伸約360公尺，就係「小町通商店街」，商店街有當地人生活所需的商店，亦有以觀光客為主嘅餐飲店同禮品店，大約有250家店店舖

商店街較受遊客歡迎嘅店舖，分別有以下幾間：

Sakura no Yumemiya 

さくらの夢見屋 小町通り本店

營業時間：

星期一至日09:00–17:30

呢間係專賣手工和菓子嘅店舖，提供超過70種風味，包括醬油、黑糖、芥末、抹茶等特色口味和菓子。用竹串穿起嘅糰子非常吸睛

Tomoya Kamakura Komachi 

ともや 鎌倉小町店

營業時間：

星期一至日10:00–18:00

「鐮倉」IG打卡美食，開運大佛燒，各款口味有其寓意，包括紅豆=健康、奶黃=人氣、紫薯=金運

宗家 源吉兆庵 鎌倉本店

營業時間：

星期一至日10:00–18:00

佢哋最出名嘅係用當季水果（例如麝香葡萄『亞歷山大』、清水白桃、市田柿子等）製作的創意和菓子

除咗美食，商店街亦有售賣精品嘅店舖，我最鐘意行呢類店舖，非常有尋寶嘅感覺

mille mele 鎌倉小町店

營業時間：星期一至日10:00–18:00

呢間店舖嘅蘋果派，曾經一度成為排隊美食之一

Miffy Oyatsudou Kamakura branch 

みっふぃーおやつ堂 鎌倉店

營業時間：

星期一至日10:00–18:00

喜歡Miffy公仔嘅朋友，就一定不要錯過

Giraffa Curry Pan 

ジラッファ 鎌倉小町通り店

營業時間：

星期一至日10:00–18:00

Giraffa Curry Pan 是「鎌倉」超人氣的咖哩麵包專賣店

主打外酥內嫩的現炸咖哩麵包，選用日本國產牛與秘製香料，香氣四溢、口感酥脆，係好多遊客嚟到「鎌倉小町通」行街必買嘅排隊名店

每個麵包都即場炸、外皮薄脆不油膩，一啖咬落去，啲芝士就傾瀉而出，減肥時係非常邪惡嘅食物😋

鎌倉五郎 小町通本店

營業時間：

星期一至日10:00–18:00

同樣係「鎌倉」是一間著名嘅和菓子店，以其招牌手信『鎌倉半月』而聞名

亦係最受歡迎嘅商品

『鎌倉半月』係一種半月形狀嘅法蘭酥餅，餅乾紮實、口感硬脆，內餡飽滿。經典口味包括小倉風味（紅豆）同抹茶。季節限定口味：有花生、芝麻、蘋果或白桃等口味

係「小町通商店街」行街時食得太飽，嚟到晚餐時間我哋就唔想咁heavy ，所以就幫襯番酒店嘅 ~

Café&Meal MUJI食晚餐

營業時間：

（午餐、晚餐）11:00-20:00 (LO19:30) 

呢度標榜每道菜嘅製作都盡可能簡單，以帶出食材嘅天然風味，盡量減少化學調味料，並且不添加任何防腐劑

晚餐時間店舖唔係太多人

選擇套餐嘅話，就包含一份時令蔬菜沙律和一份自選主菜。 ¥1600（含稅），春季套餐飲品 +¥250

我家主子就選擇「鎌倉」嘅特色 ~『海苔豬肉』做成嘅 ➡️薑汁豬肉

我喜歡咖哩，就選擇日式肉醬咖哩，咁嘅價錢出乎意料咁大份，所以都係食到非常飽😋

想知味道如何？➡️ 無驚喜，但唔難食，可以接受

食飽飽想Shopping可以行去旁邊嘅

MUJIcom

營業時間：

星期一至日10:00-19:00

小型無印良品店，賣旅行用品同零食，但留意只營業到晚上7點

一夜無夢，肥肥白白、健健康康又過咗一晚，到第二朝我哋同樣幫襯Café&Meal MUJI食自助早餐

營業時間：

（早餐）06:30-10:30 (LO：10:00) 

早餐價錢：3000日元1位（有啲貴）

坐低就見到枱上面有張早餐食物流程表，有咩食同係邊個位置都一目了然

跟住我哋就睇下有咩食，首先見到係飲品區，算係非常多選擇

麵包嘅種類亦唔小

據說麵包係採用「北海道」小麥混合，並運用湯種法隔夜發酵，令到麵包風味更佳

沙律吧係使用當地種植嘅蔬菜，非常新鮮

和食專區

呢區就有烤製「相模灣」捕撈嘅魚類，以及以傳統方法烹調的日式小菜

現場嘅擺盤同官網張相有啲分別，鮮魚無咁完整一條🤔

仲有甜點區

湯都有選擇，有日式湯、蔬菜豆腐湯、蔬菜豬肉湯

店舖嘅招牌菜：鎌倉海苔豬肉飯（豚丼）

時令米飯

提供用時令食材烹調的米飯（例如栗子、南瓜、番薯、紅蘿蔔.....等）

現整嘅鎌倉海苔豬肉卷（限量）

豆腐同一啲日式漬物

下圖見到有西京烤馬鮫魚、唐揚雞、炸薯角

 

用「鎌倉」火腿做成嘅無色香腸、炒蛋、風乾豬肉片

自助餐價錢雖然貴啲，但都算多野食，未試過MUJI嘅自助早餐可以一試

整體評價：幾多分？

✅地理位置：★★★★★ (滿分！)

冇得輸，懶人之選，玩攰隨時可以返酒店休息。

✅設施設計：★★★★☆

設計感強，乾淨舒適，細節貼心。不過留意酒店喺2025年底至2026年初有部分客房進行裝修工程，預訂前最好上官網確認一下。

✅周邊娛樂：★★★★★

落樓已經係美食景點區，100分方便。

✅性價比：★★★★☆

以佢嘅位置、新淨程度同設計來講，價格合理，尤其適合注重便利同住宿品質嘅朋友。

食飽飽後我哋就退房然後落去「橫濱」，喺「橫濱」行吓街、影吓相，然後就再揸車直去「成田機場」，喺「橫濱」停車較為順路去機場嘅景點就係 ～

山下公園

「山下公園」是位於「橫濱港」旁邊嘅一個海濱公園

喺呢度會見到 ～

橫濱海洋塔

（Yokohama Marine Tower）

海洋塔係「橫濱港」嘅象徵，於2022年9月翻新後重新開放，設有觀景台、餐廳、咖啡廳同商店。從塔上可以360度全景欣賞「橫濱」地區嘅美景，天氣晴朗時甚至可以見到「富士山」

「山下公園」係『關東大地震』後，利用瓦礫填海造地建成的，於 1930 年開放

呢度環境舒適，可以欣賞「港未來區」的美麗景色，是散步、休閒和約會的熱門地點，圖中所見嘅橋樑係「橫濱海灣大橋」

最後我哋都要行經「橫濱海灣大橋」出發去「成田機場」

「橫濱海灣大橋」係一座斜拉橋，連接「本牧埠頭」和「大黑埠頭」。大橋全長 860 公尺（中央跨度 460 公尺），橋塔高出海平面 175 公尺

『關東自駕遊』到呢篇就順利完結了！

下一篇就開始『四國自駕遊』，第一篇就係 ~

WeBase 高松酒店（住宿體驗）

記得留意哦！也謝謝您的觀看❤️

Share: