四國香川縣 ~ WeBase高松酒店（住進有隻【SHIP'S CAT！守護貓】嘅型格酒店）、高松美食（Lowe Kukodori菓子工房、骨付鳥 かし羽）

「WeBase高松」酒店係一間將酒店同Hostel概念融合嘅新型住宿，成間酒店都係藝術品，酒店外牆上有隻【SHIP'S CAT】為醒目標志，今次入住兩大房型：舒適雙床房 vs 高級雙床房。另外仲會推介兩大美食餐廳：「Lowe Kukodori菓子工房」、「骨付鳥 かし羽」.....

全文內容

又開始新一段旅程，今次依然係「日本」，「日本」實在有太多美麗嘅風景，而且自駕亦十分方便，今次去「日本」嘅目的地就係 ~ 「四國」，香港有直航機可以到達「高松機場」（非常古早嘅機場😅）

所有租車公司都要轉乘接駁車去攞車，其實距離唔算遠，大約1公里左右，當然有接駁車，總好過自己拉住啲行李，行路去攞車💯

嚟到「高松」攞埋車，已經係下午3點多，在開車前往酒店途中，會經過以下這間人氣糕餅店 ～

Lowe Kukodori菓子工房ルーヴ 空港通り店

MAPCODE： 60 454 735 *47

營業時間：

星期一至日09:30–19:00

這是「香川縣」一家很有名的蛋糕店

GRANDMAISON LÖWE」（グランメゾン・ルーヴ）是1978年創立，在「高松市」享有超高人氣嘅「菓子工房ルーヴ」（菓子工房LÖWE）是旗下店舖之一

糕餅包裝得十分精美，買嚟做手信送俾人，我估大家收到時都會好鍾意

我哋就有目的嚟買呢度十分出名嘅『和三盆手卷』

好彩今次我哋有4個人，咁大份量4人分食都會食飽

『和三盆手卷』嘅做法，據說係使用「香川縣」產的雞蛋、牛奶等食材，搭配傳統（和三盆砂糖）製作而成

食落口蛋糕鬆軟，雖然用（和三盆砂糖）做主角，但味道亦唔會太甜，品嚐過之後覺得，係好食但又未到驚艷的地步

下圖係「菓子工房LÖWE」另一款大熱產品 ~

和三盆可麗露(Canelé)

味道不錯，不會太甜，整顆都很軟糯、煙韌，我覺得比『和三盆手卷』好味😋

呢間店舖嘅包裝實在精美，我都買咗一些當做手信送人

呢款係秋天限定嘅栗子蛋糕，大約可以擺放十日，如果用嚟做手信記得留意日期

連埋個手抽紙袋畀人，係咪非常得體

Grandmaison Loweグランメゾン ルーヴ係「高松市中心」嘅「高松丸龜町商店街」亦有店舖，十分方便

又再講番我哋嘅行程，由「高松機場」開車行駛15.5公里約31分鐘就可以到達今晚喺「高松」住宿嘅酒店 ~

WeBase Takamatsu（WeBase 高松）

呢段路不需要付公路費

（注意：酒店沒有停車場，但就有幾處合作停車場可供泊車）

酒店資訊

地址：香川縣高松市河原町 1-2-3

電話：08-7813-4411

👇入住及退房時間：
➤15:00-11:00

👇停車費用：
💡酒店沒有停車場，有幾個聯營合作嘅停車場
💡【收費】1200日圓/一天，【時長】24小時停車券
🔻GREEN Parking Lot（丸龜町Green停車場）
➤MAPCODE：60 606 580 *00
➤步行1分鐘 (110公尺)到酒店
🔻丸亀町町営第4駐車場（丸い亀さんP-4）
➤MAPCODE：60 606 545 *45
➤步行3分鐘 (190 公尺)到酒店
🔻丸亀町壱番街駐車場
➤MAPCODE：60 636 194 *32
➤步行10分鐘 (700 公尺)到酒店

👇公共交通：
➤從《高松琴平電鐵》「河原町站」步行6分鐘即可抵達

我哋選擇泊喺酒店最近嘅停車場 ～

丸龜町Green停車場 

GREEN Parking Lot

MAPCODE：60 606 580 *00

（步行1分鐘約110 公尺到酒店）

酒店同停車場嘅距離其實好近

酒店嘅外牆平台上有隻『SHIP'S CAT』，十分吸引人注目，『SHIP'S CAT』是什麼東西？（等一陣再同大家講解）

酒店嘅Reception設係二樓，比較麻煩喺雖然有扶手電梯上去，但就無升降機，而且酒店嘅扶手電梯又比較窄小，拖住行李就比較危險、麻煩

各位入住呢間酒店，搬行李都要小心啲呀📢

搭扶手電梯上到1樓，就見到有三部𨋢上酒店房間

大堂嘅設計是比較藝術又隨性，畀人嘅感覺係有一股年輕有活力嘅感覺

沒有過多花巧嘅設計，亦沒有太令人有窒息感嘅富麗堂皇，整體氣氛令人覺得很放鬆

最遠嗰一邊仲設有按摩服務

旅行舟車勞頓後，按摩的確會令人非常舒適

收費價目如下：

喺按摩店嘅另一頭就係Reception，同樣設計到非常有溫馨感，沒有距人於千里之外嘅高級感

有自助機可辦理入住、退房

有自助梳洗用品，可以自行攞取

喺reception旁邊設有『禮品專區』

呢度有好多『SHIP'S CAT』嘅產品售賣，『SHIP'S CAT』是酒店同日本當代藝術家 Yanobe Kenji 合作嘅作品。靈感嚟自大航海時代，船上養貓可以守護船隻、驅趕鼠患，係船員嘅心靈伙伴。酒店將自己比喻成航行中嘅船，而呢隻（船貓）就係守護每位旅人旅途平安、帶來美好邂逅嘅吉祥物。成個Concept好有心思，藝術祭期間住呢度，感覺特別應景

酒店仲有以『SHIP'S CAT』為主題嘅盲盒，價錢500日元1個，我自己都抽咗4個

盲盒裡面的『SHIP'S CAT』在酒店櫃台有展示出嚟，至於抽到乜嘢款式，就係閣下嘅運氣了😅

職員見我影相，就專登搵咗一隻超大嘅『SHIP'S CAT』畀我影，放大睇更加覺得cyber feel

打開盒內嘅包裝，原來係要自己砌，砌成睇落都幾藝術Feel，不過如果啲接駁口做得仔細啲會更好

喺reception左邊再行入去就係喺canteen，在入口處設有微波爐、電腦，供住客使用

Canteen嘅面積都唔細

呢度仲有膠囊咖啡機，供住客免費飲用

搭𨋢上房間時，好清楚見到樓層有咩設施

有3部𨋢可供上落，實在太好了，人多使用亦唔怕會等太耐

我哋今次住9樓，酒店一共有11層，今次住得算高

樓層走廊非常光光猛、闊落，亦沒有陳年嘅噏味

房間設置位置，最緊要留意走火通道喺邊度

酒店一共提供10種房型的房間

如果背包客嘅話，酒店亦有提供床位款式空間入住，分男女入住共用洗手間，如果想住得較舒適，就起碼要訂『舒適雙人房』以上嘅房型，如果住『標準雙人房』就會太細（得11.8㎡）

我哋分兩次入住呢間酒店，第一次係落機第一日時入住，第二次係由「高知」返嚟「高松」時入住

第一次入住時我就訂咗『舒適雙床房 』(Comfort Twin)，房間有（18.5㎡）大，唔算太大但會住得舒服

跟住就同大家睇下『舒適雙床房 』嘅實景，一入到房間就見到房門傍邊嘅衣櫃

一條長長嘅走廊

走廊邊上設有獨立廁所

最貼心係有個小型洗手盤💯

跟住就見到房間裡面，放兩張床之後，還有很多空間

牆身掛有電視，非常慳位嘅設計

床對住盥洗區同淋浴區

盥洗間同淋浴區是分開的，淋浴區嘅空間非常大，我超級喜歡呢種設計嘅淋浴間

兩張床都可以三面落床，雖然話房間得18.5平方米面積，但其實真係唔算細

床頭有2隻窗，可以望到室外

床邊嘅角落就擺放咗枱、櫈、雪櫃、同加濕機

房間亦有膠囊咖啡機，咖啡控嘅朋友就最開心

雪櫃喺枱嘅下面，size非常迷你

另外仲有好多日常用品，酒店都可以租用

睇完『舒適雙床房 』，跟住就再睇埋

『高級雙床房』 (Superior Twin)，房間面積有23.7㎡

其實我哋本來都係預訂『舒適雙床房 』，但由「高知」回來再入住，就upgrade咗俾我哋，上網睇過好多人同我哋一樣，再入住就upgrade房間，（但唔係一定會upgrade㗎📢）

 一入房間同樣見到獨立廁所

跟住就係盥洗區同淋浴區

房間佈局有很大分別

梳化同枱變得咁大

房間嘅床鋪，就要由下圖紅圈內的小巷走入嚟先會見到

整個佈局就好似有客廳同房間，房間呢邊亦有窗戶可以睇到外面

廳同房都各有一部電視

其他嘅設施就同之前嘅房間差不多，都係有免費咖膠囊啡機、飲用水供應

保險櫃同雪櫃亦有設置

酒店嘅地理位置相當不錯，鄰近幾大商店街，外出用餐、購物都非常方便

「高松市中心」幾大商店街包括有：

兵庫町商店街、片原町西部商店街、片原町東部商店街、丸亀町商店街、高松中央商店街、南新町商店街、田町商店街、常磐町商店街

下面嘅地圖，就清晰展示出商店街同酒店（包括停車場）嘅地理位置

攞完房整頓一下，就已經到晚餐時間，今晚我哋食「高松」名物『骨付鳥』（ほねつきどり），而我哋今晚就幫襯 ～

骨付鳥 かし羽

地址：香川縣高松市梶屋町1-14

營業時間：

星期一至日16:30–23:00

由酒店步行過嚟400公尺約5分鐘就可以到達

原本係打算食「一鶴」餐廳嘅『骨付鳥』，但去到發現GOOGLE MAP大神竟然帶我哋嚟到呢間，既然咁有緣份，就將錯就錯食呢間，況且見到門口咁多人排隊，一定都唔會太差

店內嘅裝修有少許似日式居酒屋嘅風格，好彩餐廳嘅設計唔係榻榻米座位，（對我而言，喺日本雙腳可以垂直放落地食飯，係天大嘅福音🤭）

『骨付鳥』（ほねつきどり）是「日本香川縣」的特色美食，指的就是帶骨的烤雞腿，以鹽、黑胡椒和蒜頭等香料調味後烤製，外皮香脆、肉質鮮嫩多汁，是「香川縣」知名的在地料理

它有兩種主要選擇：

📌嫩雞（ひな/Hina）肉質軟嫩，適合初次嘗試

📌老母雞（おや/Oya）肉質有嚼勁，味道更濃郁，是搭配啤酒的絕佳下酒菜

其實在門外等位等咗差唔多15分鐘，店員已經問我哋要order啲乜嘢，主角『骨付鳥』烹調時間較耐，要20分鐘，所以入到嚟坐低，好快就已經有得食

好多人都話『骨付鳥』唔好食，又鹹又油膩，但係講真，我真心覺得幾好味，雞肉咬落唔柴又有咬口，味道可能會太濃，但用嚟送飯就剛好，我覺得嚟到「香川縣」不妨一試，況且價錢亦唔係太貴，1210日圓（含稅）連飯、湯，真係試下無妨

質素好嘅酒店，通常都係一夜無夢到天亮，新一日嘅行程又開始了，首先當然從早餐講起

（之前已經介紹過酒店嘅用餐地點）

跟住我哋就睇下早餐有啲乜嘢食物：

西式早餐基本款式麥片、麵包，當然唔少得

早餐價錢大約2000日元，食物選擇算多，超過40款菜式，日式西式都有、亦有各式飲品供應

下圖見到的是：

法式吐司、Scrambled egg、腸仔、雞肉炒飯、自製肉醬意粉

另外呢邊就有：

芥末醬烤豬肉、京都風味烤嫩雞、咖哩肉丸、拿坡里水煮魚

另外重有一些日式冷盤，包括有：

芥末鯖魚佐杏鮑菇、炒紅蘿蔔、金平牛蒡、芝麻冷豆腐.....等

另外仲有：

沙律、漬物、蛋糕、自制美味丼飯

✨最大亮點係可以自製讚岐烏冬，有齊湯底同配料，俾你喺酒店就食到「香川」名物，為一日行程充滿電

食完呢盤早餐，就能量滿滿出發第二日行程

下一篇會寫在「高松」第二日嘅行程，首先第一個景點就係 ~

【四國香川】日本最高石垣「丸龜城」、「金刀比羅宮門前町商店街」（兩大歷史景點！）

記得留意哦！也謝謝您的觀看❤️

Share: