今次同大家分享喺「香川」一間超有驚喜嘅酒店——「Hotel O. Setouchi」（ホテルオー瀬戸内、ホテルO.瀬戸内）。成個體驗由頭到尾都充滿渡假感，尤其係可以用「琴彈迴廊」超大嘅溫泉設施，真係好啱自駕遊人士慢慢享受，另外酒店距離日本夕陽絕景No.1嘅「父母濱海岸」（Chichibugahama Beach）好近，開車10多分鐘就可以影到『天空之鏡』.....
全文內容
喺「錢型展望台」開車落山，好快就到達我哋今晚入住的酒店 ~
Hotel O. Setouchi
（ホテルオー瀬戸内、ホテルO.瀬戸内）
MAPCODE：
77 152 212*72
地址：〒769-1404 香川県香川県三豊市仁尾町仁尾乙203‐3
電話：0875-56-5880
入住/退房時間：15:00/11:00
🔔晚上22:00以後不接受辦理入住手續
停車收費：有免費停車場
🔻公共交通：
▶️如果無揸車，可以喺JR「觀音寺站」轉乘的士，車程大約5分鐘左右，步行要2公里
下圖係第2日行程之景點
由「錢形展望台」開車行駛2.4公里約8分鐘就可以到達，這段路不需要公路費用
酒店就在「琴彈迴廊」範圍，自駕朋友嘅車可以泊喺「琴彈迴廊」，係免費停車場唷！有成50個車位，自駕完全唔使煩惱泊車問題
我都係第一次住呢一種，純日本人渡假feel嘅酒店，喺停車嘅地方行過對面就係酒店
酒店位置真係超近海，隔籬就係「有明海灘」（Ariake-hama Beach） ，行過去唔使5分鐘 。沿住海邊行一陣，就可以去到著名景點「琴弾公園」同埋「銭形砂繪」
呢棟就係我哋今晚入住嘅酒店
冇錯呀酒店係得一層㗎，係2025年2月先新開張，成間酒店都係得19間房，主打精品精緻路線，由於房唔多，真係唔係咁容易book到㗎
入到reception已經覺得似喺屋企，非常令人放鬆的設計
坐喺呢度就似坐喺自己間屋嘅客廳一樣，非常寫意
我真係超級喜歡呢種設計，無太多嘅金碧輝煌，簡簡單單又乾淨，真係令人有滿滿的溫馨感😍
喺Reception呢邊仲有免費咖啡供應
連搽臉嘅保養品亦都有提供，而且仲要係Pola呢個品牌
去房間所經過的走廊充滿光線，就算夜晚無陽光，但燈光十分充足，不會黑漆漆
🏠呢間酒店一共提供五種精心設計的房型，分別以「瀨戶內海」和「香川」地區的著名景點為主題
| 房間類型 | 詳情 |
|---|---|
| Kotohiki琴引 （單/雙人房） |
這間客房以綠色為主題，讓人聯想到美麗的松樹林。「琴引公園」是「瀨戶內海國立公園」的一部分，也是風景優美的景點 |
| 「Hiuchi」 (Twin Room) |
以藍色為主題，讓人聯想到寧靜的「瀨戶內海」。「瀨戶內海」常被譽為『東方愛琴海』 |
| 「Yuubae」 （三人房） |
靈感嚟自附近「有明濱」嘅日落，用咗橙色做主調，好有溫暖感 |
| Sunae （四人房） |
此房間的設計靈感源自「有明海灘」和「錢形砂繪」，「錢形砂繪」是「觀音寺市」的象徵，建於江戶時代 |
| 「Torii」 （家庭房/五人房） |
靈感源自「高屋神社」嘅「天空鳥居」，適合多人家庭 |
.webp) |
| 圖片出自：ホテルオー瀬戸内、ホテルO.瀬戸内 |
我哋今次就訂左雙床房『Hiuchi』
 |
| 圖片出自：ホテルオー瀬戸内、ホテルO.瀬戸内 |
入房間首先要除鞋，因為有工作人員陪同前往房間，她一再叮囑，所以我到現在仍記得十分清楚😅，一打開房門就見到有鞋架同一塊全身鏡
跟住見到有獨立嘅沖涼間，雖然冇浴缸，因為酒店傍邊有免費溫泉供應，所以房間嘅設施就不設置浴缸
沐浴間嘅面積都唔細㗎，我覺得冇浴缸更好，唔使跨出跨入
浴室嘅斜對面就係洗手間，真正獨立嘅空間
盥洗間就設置在外面
比較特別嘅設計，同房間裏面嘅萬用枱並排，不過咁其實都幾方便
呢種設計我都係第一次見，其實咁攞嘢都幾方便，唔使怕盥洗間張枱太細
跟住就睇下萬用櫃嘅下面，有擺放焗爐、電水壺、水杯、雪櫃
呢個焗爐係用嚟焗早餐嘅麵包，一陣同大家講早餐時再詳細描述
「Hiuchi」 (Twin Room)有24.9平方米，擺咗兩張床之後，都仲有好多空間剩
床嘅旁邊有張梳化同茶儿，坐喺度夜晚食生果都幾嘆㗎
房間有落地窗連接庭園，所以日頭嘅光線非常足夠
每個房間都設有私人木平台（Wood Deck） ，望出去係一個好有設計感嘅日式中庭。雖然望唔到海，但望住個庭園嘅綠意，一樣咁療癒
喺露台呢邊仲有兩張凳同茶儿，畀你欣賞下酒店庭園嘅美景
真係夠曬方便，拉開木欄就可以走去庭園
而且很貼心供應埋室外拖鞋
酒店係歡迎動物入住，如果帶狗狗嚟嘅話，有寵物籠供應，會有鐵絲網圍住屬於自己嘅庭園草地，畀狗狗快樂地在玩耍
庭院中央設有營火區，真係好有野外度假feel
篝火點燃時間：
晚上7:30 - 晚上9:30
再返入房間睇下有乜嘢，可以再同大家分享
房間有齊酒店嘅資訊放係架上，包括有乜嘢特色項目同設施
| 項目 | 詳情、費用 |
|---|---|
| 單車租賃 | 您可以沿著「瀨戶內海」騎行，或穿過「琴引公園」美麗的松林 每人1000日元90分鐘 |
| 騎馬遊覽 | 可以騎馬遊覽「觀音寺市」的著名景點，例如被評為『日本百大日落勝地』之一的著名日落勝地「有明海灘」，以及被評為『日本百大歷史公園』之一的「琴引公園」 40分鐘步行路線（8,800日圓/匹馬） 20分鐘拍照路線（5,000日圓/匹馬） |
| Tent sauna | 在帳篷桑拿之後，您可以選擇泡露天浴池或跳入大海！這項活動只有在海邊度假村才能體驗到 *必須穿著泳衣。請自備泳衣 使用時間：15:00-21:00（僅限賓客） 費用 60分鐘，每人1000日元 |
| 芬蘭柴火桑拿 | 提供芬蘭風格的柴火桑拿房供您私人使用。您也可以在戶外享受桑拿浴，同時欣賞海景 開放時間：15:00–21:00（限飯店住客）） 費用 90分鐘，3,000日圓/人 |
| 贊岐烏龍麵製作 | 可以體驗「香川縣」獨有的『贊岐烏龍麵製作體驗』！天氣晴朗時，您甚至可以在戶外體驗製作烏龍麵的樂趣 *活動僅在有限日期內舉辦 使用時間：15:30-17:30 （僅限賓客） 費用 60分鐘，1500日元/人 |
| 立式槳板衝浪 (SUP) | 在平靜的「瀨戶內海」，這是一項完美的活動。站在槳板上划水，您會感覺自己彷彿置身於美麗的大海之中 開放時間：8:00–11:00，15:30–19:30*開放時間可能因季節而異 費用60分鐘，每人2,000日元 *需提前預約 |
| 棋盤遊戲 Board games |
提供多種棋盤遊戲包括疊疊樂 可於前台免費租借 |
| 私人狗狗活動 | 和愛犬在私密空間內享受專屬時光，不受任何人打擾 開放時間：15:00–22:00，8:00–退房 *僅限已預訂狗狗套房的顧客進入 |
| 天然溫泉及三溫暖 | 可以免費使用隔籬嘅「琴弾廻廊」，有11種唔同類型嘅桑拿同7種水風呂 溫泉開放時間：11:00–23:00 7:00–9:00（僅限入住酒店的賓客） |
可以在房間order或到酒吧享用飲品
供應時間：18:00-22:00
費用每杯飲料500日圓（不包括當地啤酒和威士忌）
另外酒店與天然溫泉「琴彈迴廊」合作，住客可免費享用溫泉設施，Check in時會附有溫泉卷，那就可以在「琴彈迴廊」任浸溫泉，（就算第二日退咗房，仍然可以繼續使用溫泉設施，簡單啲講即係住一晚就包兩日浸溫泉）
「琴彈迴廊」距離不遠，基本上行過對面就係
♨️ 酒店附加特色設施：溫泉愛好者天堂！
營業時間：
朝早11:00到夜晚23:00
*07:00–9:00👉（僅限入住飯店的客人使用）
*（09:00-11:00清潔時間暫停）
酒店最強嘅賣點，就係可以免費使用隔籬嘅「琴弾廻廊」。呢度唔係普通大浴場咁簡單，而係一個超大型溫泉設施 ！係2024年才進行了翻修，夠曬新淨，呢度有多樣化嘅浴池，泉水係『鈣-鈉氯化物泉』嘅療養泉，對神經痛、關節痛、手腳冰冷都有幫助
 |
| 圖片出自：ホテルオー瀬戸内、ホテルO.瀬戸内 |
 |
| 圖片出自：ホテルオー瀬戸内、ホテルO.瀬戸内 |
7種在這裡才能體驗到的冷水浴
 |
| 圖片出自：ホテルオー瀬戸内、ホテルO.瀬戸内 |
泡完溫泉後嘅休息區
呢邊可以睇到「有明沙灘」，喺度睇日落其實都唔錯
晚間周圍其實都幾靜，喜歡安靜嘅朋友必定喜歡
晚餐我哋都係幫襯「琴彈迴廊」
記得入到「琴彈迴廊」要除鞋，喺門口有locker可以擺放鞋同雜物，（就算唔係浸溫泉，淨係食飯都要除鞋）
 |
| 圖片出自：Hotel O. Setouchi |
「琴彈迴廊」嘅溫泉，比起其他五星溫泉酒店更有水準，喜歡浸溫泉嘅朋友真係不可以錯過，我兩位朋友對溫泉嘅設施讚不絕口👍
 |
| 圖片出自：Hotel O. Setouchi |
放好對鞋，入到「琴彈迴廊」裡面會見到有禮品區，其實一啲罐裝飲品同雪糕都有得賣
餐廳旁邊就係沙灘，如果早少少食晚餐，仲可以睇住呢個咁靚嘅日落景
 |
| 圖片出自：ホテルオー瀬戸内、ホテルO.瀬戸内 |
晚餐嘅餐單如下，都算幾多選擇，而且價錢亦唔係太貴
我哋今次就點咗「香川」嘅特色食物（橄欖牛），肉質軟嫩冇騷味，都算唔錯嘅口感，不過我都係鍾意（神戶牛）多啲😅
唔食牛都可以選擇刺身丼飯
套餐嘅小食
夜幕下酒店嘅外觀都幾靚，順便一提，夜晚23:00之後，所有門都會鎖上關閉，不可以進出
因為始終都係一幢樓層，始終有些防盜設置會比較好
係咁乾淨又舒適嘅酒店瞓覺，當然好瞓到一夜無夢到天光，跟住就同大家講埋個早餐，如果有訂早餐，入住嘅時候，職員就會問你幾點用餐，跟住第二朝就會有專人撳鐘送過嚟
早餐供應時間：
08:00-10:00
早餐放係野餐籃裡面，您可以在房間內享用，亦可以自己拎去戶外享用，例如花園、附近的公園或者「有明海灘」
房間嘅焗爐就係咁用，畀你焗熱啲麵包
早餐都好豐盛同健康㗎，有沙律、南瓜湯、乳酪，同兩大樽生果浸泡嘅營養水
幾特別嘅一次早餐體驗，因為要自己整🤭
真心推薦呢間酒店俾大家，我哋喺旺季入住，都係1000港幣左右，鍾意浸溫泉嘅真係唔好錯過
🐼 🐼 🐼 🐼 🐼 🐼 🐼 🐼 🐼 🐼 🐼
🌅 特別篇：自駕前往「父母濱海岸」（父母ヶ浜）捕捉「天空之鏡」
嚟到「觀音寺市」，又點可以錯過鄰近的『日本夕陽絕景No.1』嘅 ~
父母濱海岸（父母ヶ浜）
黃昏大約17:00嘅傍晚，由「Hotel O. Setouchi」自駕出發，開始呢個期待已久嘅日落景點，可以將車泊喺 ~
父母ヶ浜 第1駐車場
MAPCODE：
77 363 277*70
由酒店開車行駛8公里約15分鐘就可以到達
.webp)
地址：〒769-1404香川県香川県三豊市仁尾町仁尾乙203‐3
電話：0875-56-5880
開放時間：24小時
停車收費：有免費停車場
🔻公共交通：
▶️鐵路 + 巴士：在「JR詫間站」假日可以考慮坐週末限定嘅《愛心周遊巴士》 (Hearts Shuttle Bus)，一日券1500円可以周圍去
▶️的士/共乘的士：平日可以試吓用《讚･瀨戶接駁的士》（SunSet Shuttle Taxi），呢個係預約制嘅共乘的士，由「JR詫間站」去「父母濱海岸」，每人單程約1500円，仲可以安排去「高屋神社」（天空鳥居）
▶️單車：喺JR詫間站可以租電動輔助單車，4小時1100円，踩過去大約要45分鐘
去到見到停車場差不多都泊滿車，就知呢個景點有幾受歡迎
日落嘅速度好快，如果各位都係自駕嚟，最好都係17:00前就到達，要不然就咩都睇唔到
「父母濱」之所以咁出名，係因為佢喺退潮嘅時候，沙灘上會形成一啲淺淺嘅潟湖 
當風平浪靜，呢啲水面就會變成一面巨大嘅鏡子，將天空嘅雲彩同夕陽完美倒影出嚟，形成「天空之鏡」嘅效果，你睇下圖有幾多人在排隊等影「天空之鏡」
所以真係要早少少嚟到，因為排隊都要花時間
當太陽慢慢沉落去「瀨戶內海」，成個天空由金黃色轉變成橙紅色，再變成紫藍色
眼前嘅（鏡面）亦都跟住變色，真係靚到唔捨得眨眼睛。呢度入選『日本夕陽百選』絕對係實至名歸
正所謂『夕陽無限好，只是近黃昏」，夕陽在我心中雖然浪漫，但總有一點點愁緒在其中
再美嘅夕陽，當從海平線消失，留低嘅就係黑暗
你哋喜歡日出定日落呢？雖然會有啲傷感，但我都係喜歡日落
有研究話喜歡日落嘅人，都係會帶點憂鬱嘅天性，你們認同嗎？
呢張相有有名字㗎，叫『擁抱瀨戶內海的夕陽』
最後再多睇這美麗的景色兩眼
黑夜即將來臨，人們又再週而復始的期待日出🌞
✍️ 總結感想
今次入住「Hotel O. Setouchi」，無論係酒店本身嘅質素、嗰個大到誇張嘅溫泉，定係鄰近「父母濱海岸」嘅絕美日落，都令我好滿意。如果你計劃嚟『四國自駕遊』，想遠離大城市嘅煩囂，搵一個地方好好放鬆，呢度絕對係一個性價比極高嘅選擇👍
下一篇會講由「觀音寺市」揸車出發去「高知」，沿途所見的風景 ～
四國高知自駕遊 ~ 道之站南國風良里、野良時計、新阪急高知皇冠飯店、弘人市場（感受土佐風情）
記得留意哦！也謝謝您的觀看❤️
發佈留言