四國高知 ~莫奈庭園Monet's Garden Marmottan 走入莫奈嘅畫作世界！絕美打卡攻略

 

講到去「日本四國高知」，除咗食鰹魚同睇「高知城」之外，如果你係文青或者鍾意打卡，有一個地方你絕對唔可以錯過，就係位於「北川村」嘅「莫內花園」。呢度係全球唯一得到【法國莫奈基金會】官方授權，可以同「法國-吉維尼」Giverny齊名嘅庭園，呢度基本上係 99% 還原咗莫奈畫作入面嘅世界.....

全文內容

先前一篇已經講咗由「香川觀音寺市」，自駕落「高知」嘅沿途風景，下圖就係今日DAY 3 嘅行程

差不多120公里嘅距離，揸咗2小時車，終於嚟到今次整個行程我最期待嘅景點 ～

莫內庭園
Monet's Garden Marmottan 

MAPCODE：

421 664 311 *45

景點資訊

地址：〒781-6441高知県安芸郡北川村野友甲1100番地

電話：0887-32-1233

🔻營業時間：
▶️9:00-17:00（最後入場時間為16:30）
▶️6月至10月的第一個和第三個星期三，以及12月1日至2月底的第一個和第三個星期三為休息日
▶️5月至10月期間，每星期二工作人員將在池塘中維護睡蓮

🔻門票收費：
▶️一般門票➨1,000日圓 ▶️中小學生➨500日圓
▶️學齡前兒童➨免費
▶️團體票（20人以上）➨一般門票900日圓；中小學生450日圓

停車收費：有免費停車位

🔻公共交通：
▶️從「高知站」乘搭《JR土讚線》到「後免站」，轉搭私鐵《土佐黑潮鐵道》（ごめん・なはり線） 去終點站「奈半利站」（呢程車沿海行，風景好靚），喺「奈半利站」再轉乘《北川村營巴士》，喺「モネの庭站」落車即可到達
🔔《北川村營巴士》單程價格➨從奈半利駅到莫奈花園：成人230日元/兒童120日元
🔔《北川村營巴士》班次請看下圖👇

奈半利駅 ➤ 莫奈花園	莫奈花園 ➤ 奈半利駅
09:56 ➤ 10:05	11:35* ➤ 11:44
11:00 ➤ 11:09	13:09 ➤ 13:18
12:26 ➤ 12:35	14:42 ➤ 14:51
14:06 ➤ 14:15	15:44 ➤ 15:53
15:03 ➤ 15:12	16:32 ➤ 16:41
16:16 ➤ 16:25

*雖然巴士通常與火車銜接，但請注意，上午 11:35 從莫奈花園出發的巴士將於下午 12:32 與火車銜接。 （這意味著您需要等待約 40 分鐘的轉乘時間。）

由「野良時計」開車行駛19.7公里約31分鐘就可以到達，呢段路不需要收費

如果您喜歡印象派畫家莫奈Oscar Claude Monet的作品，咁呢個景點你一定要嚟， 因為呢度基本上係 99% 還原咗莫奈畫作入面嘅世界

山長水遠終於嚟到，園區有免費停車場，自駕最方便

呢個花園位於「高知縣」東部嘅「北川村」，其實位置幾偏僻（係呀，真係幾山旮旯㗎😂）

園區大致可以分為三部份，分別為要入場費嘅「水の庭」、「博迪蓋拉花園」，同可以免費入場嘅「花の庭」，每個部分都係跟住莫奈嘅名畫嚟設計

嘩！😱張門票真係好靚，莫奈經典『睡蓮』圖，我真心覺得張門票值得收藏

園區簡介及地圖都係『睡蓮』，嘩！對於喜歡莫奈畫作嘅人嚟講，真係心心眼😍，（我就超級喜歡莫奈嘅畫作，屋企都有幅仿製品呢😂）

我哋首先參觀 ～

💙 水の庭

在去「水の庭」的路上，再講多少少園區嘅資料

「北川村」本身係出產柚子（Yuzu）嘅地方。當年村政府想搞振興計劃，竟然膽粗粗去「法國」搵『莫奈基金會』傾授權

「法國」方面最初都好懷疑，但派人嚟到「北川村」考察之後，發覺呢度嘅自然氣息同光影，竟然同莫奈當年住嘅吉維尼（Giverny）好似，於是就成就咗呢段跨國緣分，花園喺 2000 年正式開幕

所以呢度亦係全球唯一得到『法國莫內基金會』官方授權，可以同「法國吉維尼」（Giverny）齊名嘅庭園，漫步在莫奈的畫作之間，這座花園的設計靈感來自莫奈摯愛的「法國吉維尼」

十月份嘅「四國」，真係熱到日日似焗桑拿，今日「高知」仲發報咗中暑警告，雖然行去庭園唔係好遠，但都已經全身汗濕

「水の庭」嘅拱橋、紫藤花架、柳樹和竹子，受浮世繪版畫影響、呢度其實都充滿著日本風情

💙 水之庭——必打卡！

莫內《睡蓮》靈感來源

呢度就係成個區嘅靈魂！佢完全還原咗莫奈最出名嗰幅《睡蓮》

池塘上面有一條粉藍色嘅太鼓橋，旁邊種滿垂柳同紫藤。夏天嚟嘅話，池面開滿紅、白、黃色嘅睡蓮，真係以為自己入咗畫入面

呢個絕對係成個庭園嘅靈魂所在！池塘入面色彩繽紛嘅睡蓮、波光粼粼嘅水面、嗰條藍色嘅太鼓橋……簡直就係莫奈名畫《睡蓮》嘅真實版

咁靚嘅環境，梗係要同我家大頭🐼大壯🐼影張到此一遊相先啦

藍色睡蓮（Blue Water Lilies）絕對係庭園中的王牌景色！莫奈當年喺「法國」一直想種藍色睡蓮

但因為「法國」凍得滯種唔到。而「高知」氣候夠暖，竟然成功種到，每年 6月下旬至10月上旬，你可以親眼見到莫內當年『夢想中嘅藍色』

另外仲有夏季限定嘅『藍蜂』（Blue Bee），每年夏季呢度都會有一種好罕見嘅（青色蜂）出現，日本人相信見到佢會帶嚟幸運

拱形花架，同畫中對比，10月份已經見唔到花，夏天嚟嘅話可能會比較好，（前提係你要唔怕熱🥵）

 參觀完「水の庭」後，我哋繼續行去更入面的 ~

「博迪蓋拉花園」

Bordighera Garden

由「水の庭」步行600公尺約8 分鐘就可以到達

中暑警告真係唔講得笑，行呢段路完全冇風，太陽又曬，全靠意志強撐走在發燙的小路上，真係要好喜歡莫奈嘅畫作先可以支持到，順帶提醒一下各位，夏天時候嚟嘅話，最好做足防曬避暑的準備

要經過「遊びの森」先可以去到「博迪蓋拉花園」

呢條小路喺秋天嘅時候有紅葉，影相會份外美麗

謝天謝地！終於行到嚟「博迪蓋拉花園」

呢個庭園係 2020 年先重新裝修加建的，以莫奈名畫《博迪蓋拉》中所描繪的景色而設計

靈感嚟自莫奈去「地中海」旅行時嘅畫作

呢度種咗好多棕櫚樹同橄欖樹，充滿南歐陽光活力

係法國「吉維尼」Giverny都無嘅『高知限定』原創庭園

嘩！呢度啲蓮葉，影相出嚟嘅效果都好靚

再行前50米左右還有 ～

リヴィエラの小屋

營業時間：09:30 - 16:00

休息日：

每年6月至10月的第一個和第三個星期三，

以及12月1日至隔年2月底的第一個和第三個星期三

呢間餐廳提供精緻嘅蛋糕、簡餐同飲品，可以坐喺到好寫意休息、欣賞風景

呢個時候最想要一支超級冰凍嘅可樂🤣，我哋沿路返轉頭，繼續去下一個庭園參觀，在「水の庭」對面（要穿過停車場）就會見到 ～

🌹花の庭

Flower Garden

無做功課就好容易遺留呢一邊，因為呢個庭園喺停車場嘅另一面，好多人都會忽略咗

一個色彩繽紛、宛如調色板的花園，鍾意花嘅朋友千祈唔好錯過

其實嚟呢邊最重要係開餐，剛好係午餐時間，行咁多路又咁熱，當然要坐低休息下先

入到嚟室內，第一時間會見到莫奈畫像

跟住就會見到好多莫奈嘅作品

呢幅就係剛剛係「水の庭」見到嘅藍色嘅太鼓橋

「法國吉維尼」的「莫內花園」中有一座跨越池塘的日本橋，最初被塗成綠色，但隨著時間推移與莫內對色彩的理解，呢座橋就變成而家見到嘅藍色，與睡蓮、垂柳構成極具東方禪意的景象

樓下就係商品銷售區

有好多「北川村」特產禮盒

當然唔少得有莫奈畫作嘅商品

最基本嘅就係postcard、日曆

仲有明信片，一大堆莫奈嘅畫作喺眼前，真係每張都好鍾意，買嘢一向果斷嘅我，呢啲時候都變得三心兩意起嚟

除咗基本大路嘅商品，莫奈畫作較精緻嘅物品亦有

眼鏡盒、眼鏡布、音樂盒、手巾仔，全都印有睡蓮嘅圖案💕

我都買咗一啲返屋企

咁多商品中，我覺得呢盒（和三盤糖）係最靚嘅

唔單止個盒印有莫奈畫作，連盒裏面啲糖，粒粒都好精緻，呢個買嚟做手信就真係夠曬「四國」特色

「花の庭」仲要落樓梯先會見到

終於到開餐時間😍，呢間係 ～

Cafe Monet 

カフェ モネの家

營業時間：09:00 - 16:30（最後點餐時間16:00） 

午餐時間：10:00 - 下午 15:00（最後點餐時間下午 14:30）

餐廳主打用「高知」當地嘅食材去做料理

最正係佢個露台位，可以望住花園景食 Lunch，真係 chill 到爆，（♨️唔中暑警告嗰陣就係嘅）

咁熱梗係坐室內啦，有冷氣呀嘛，呢度嘅麵包都好出名㗎，可惜我哋啲酒店已經全部訂購咗早餐，如果唔係買嚟做早餐都唔錯㗎

呢間咖啡廳係仿照莫奈喺「法國」嘅故居同畫室起嘅，黃色牆身配綠色窗框，非常有歐洲田園風味

我今次叫咗杯無酒精嘅mojito，剩係睇個樣都覺得清涼無汗了，沙律又夠fresh，嗰種熱爆嘅感覺終於降低

我家主主同另一個朋友就食海鮮意粉

另一位朋友嘅蛋包飯，真係超吸引人

而我就揀咗食咖哩牛肉飯，超級好味😋，咖哩唔係太辣，都係屬於日式咖哩，味道十分之好

仲有，「北川村」係『柚子之鄉』，記得飲返杯柚子梳打，我自己因為食開嘅藥物中，有標明不可以食柚子，所以幾出名都唔關我事

食飽飯就行出觀景台欣賞下風景，呢幾盤盆栽上面嘅浮連，真係幾靚㗎

造型好似成件藝術品咁

喺觀景台望落去，就係「花の庭」

四週都係被綠色嘅山巒圍繞，深深淺淺各種不同嘅綠色，真係好療癒🤩

「花の庭」嘅『花拱門』，係根據莫奈嘅畫作設計而成，呢度係一處非常之受歡迎嘅打卡點

我家大頭🐼大壯🐼都要打下卡先📸

呢度四週圍都係花草，四季都有不同種類嘅花係度盛放

小路兩邊都係花草，非常好的嘅影相背景

而且仲會隱隱約約聞到一股花香

花壇嘅設計又高，喺度玩迷宮遊戲都可以

庭園仲有一個圓形水池，熱起上嚟真係想跳落去浸下😂

嘩呢啲紫藤花架下影相真係-----掂👍

遠處仲見到有溫室

跟住就畀啲鮮花寫真大家睇下

「莫奈庭園」絕對係一個可以讓你遠離煩囂、靜靜感受藝術氣息嘅地方。行喺呢度，每一眼都好似一幅畫，每一次快門都係一件藝術品。如果你鍾意莫奈、鍾意印象派、或者純粹想搵個靚到喊嘅地方打卡放空，呢度一定唔會令你失望

下一篇係 ~ 

四國德島 ~ 日本三大奇橋之一「祖谷藤蔓橋」、「琵琶瀑布」、可以俯瞰壯麗峽谷嘅「West-West大步危展望台」

記得留意哦！也謝謝您的觀看❤️

Share: