「高知縣」位於「四國」南邊，被「太平洋」包圍，今次同大家分享幾個「高知」景點，包括可以購買手信的「道之站南國風良里」、充滿故事嘅「野良時計」，同埋有『高知廚房』之稱嘅「弘人市場」，仲有地理位置十分優越嘅住宿「新阪急高知皇冠飯店」.....

全文內容

今日會由「香川 ~ 觀音寺市」出發去「高知」，如果唔係要去睇我夢寐以求嘅「莫奈庭園」，「高知」其實唔會係今次旅程之內，因為今個旅程最主要係去睇「德島 ~ 鳴門漩渦」，加上「高知」嘅景點實在太分散，例如「莫奈庭園」喺「北川村」，由「高知市區」揸車去都要差不多70分鐘，另一知名景點「四萬十川 ~ 今成橋」喺另一方向就更遠，如果由市區揸車去差不多要2個鐘，plan路線認真拗頭，最後為咗「莫奈庭園」先決定落「高知」

下圖就係今日嘅行程

四國高知自駕遊 ~ 道之站南國風良里、野良時計、新阪急高知皇冠飯店、弘人市場（感受土佐風情）

去「高知」屬於長途車，所以當然會停一、兩個休息站，今次同大家介紹兩個休息站，首先第一個係

立川パーキングエリア
Tajikawa Parking Area
(Southbound)

MAPCODE：

546 230 633 *34

地址：〒783-0052 高知県南国市左右山102-1

由「Hotel O. Setouchi「開車行駛42.3km約 38分鐘就可以到達，行收費公路為￥770円 (假日ETC有優惠￥540円)

當然行不收費公路，基本上就唔需要專登嚟停休息站，不過都順便整埋俾大家睇，行車時間68分鐘48.6公里

晨咁早已經見到好多車停泊喺休息站，今天是星期五，難道「日本」今日已經不用上班，（因為由明日星期六開始至星期一都係日本假期）

立川パーキングエリア Tajikawa Parking Area (Southbound)

今次停呢個服務站係(PA)，所以規模一定唔大

但揸咗成40分鐘車，都係時候要畀我家主子休息下🤭

一般嘅PA未必有餐飲服務，最多會有間便利店，但今次呢個服務站就有餐廳、有座位供享用食物

亦有唔算大嘅銷售區，10月尾就係HALLOWEEN，好多商品都已經有南瓜造型出現🎃

喺度去下廁所，休息一陣，又繼續再出發去下一個休息站～

道之站南國風良里

MAPCODE：

73 377 820 *44

休息站資訊

地址：高知縣南國市左右山102-1

電話：88-880-8112

👇營業時間：
🔻ショップ風良里・インフォメーション（商店）
▶️ 09:00-18:00
🔻レストランFurari風良里（餐廳）
▶️（平日）11:00 - 15:00(L.O.14:30)
▶️（假日）11:00 - 16:0(L.O.15:30)逢星期二休息
🔻農家レストラン～まほろば畑（自助餐廳）
▶️逢星期二營業
▶️自助餐時間分2輪
▶️①10:50-12:20
▶️②12:40-14:10
▶️（用餐時間90分鐘）
▶️收費：成人（中學生以上）1500、小學生800、3歲以上-入小學之前500、無滿3歲免費
🔻直売所風の市（蔬果店）
▶️08:30-17:00

🔻公共交通：
▶️如果你冇揸車，可以喺「JR後免站」搭的士，大約10分鐘車程。或者可以考慮租單車，沿住「土佐之鄉」路線踩過嚟，都幾寫意

由「立川パーキングエリア」開車行駛27.6km約19分鐘就可以到達，行收費公路費用為￥730円 (用ETC有假日優惠￥510円) ，雖然同上一個休息站距離唔遠，但都想停一停參觀下有咩特別😉

（道之站）係設置在一般道路上，所以行不收費公路，都可以照樣開車過嚟，開車行駛31.3公里35分鐘就可以到達

自駕遊的好處，就係可以去啲遠少少嘅地方，都唔使怕左轉車右等車

當你揸車經過「高知自動車道」，喺「南國IC」落公路行唔使3分鐘，就會見到呢個超人氣嘅「道之站南國風良里」（道の駅南国風良里）

呢度位置超方便，可以話係「高知空港」區域嘅玄關口，無論你係啱啱落機定係準備離開「高知」，都好啱停低抖一抖

呢個道之站，唔係就咁得一間普通商店咁簡單。佢嘅建築設計充滿現代感，大量採用木系元素，感覺好 warm

但講到最標誌性嘅，一定係門口嗰座 ~

からくり機關鐘

為咗紀念出身於「南國市」、被譽為『機械工程半藏』嘅細川賴直，每到正點，個鐘就會有傳統嘅『茶運び人形』走出來表演，好似返咗去江戶時代咁，好多大人細路都睇到嘩嘩聲

呢個道之站影相出嚟嘅效果，真係幾有藝術氣氛

係咪幾靚呢？

「道之站南國風良里」有2間餐廳，首先講下地下呢間餐廳～

Furari

呢間拉麵店嘅湯底據說，採用三種優質「土佐」雞和上等魚湯熬製而成，配以100%「北海道」小麥粉製成的麵條。再加上用炙烤五花肉製成嘅叉燒，睇到啲介紹都幾吸引，可惜今朝已食過早餐☹️

嚟到呢度，重點梗係要行下佢哋嘅物產館～

ショップ風良里

另一間餐廳就係物產館的2樓 ~

農家レストラン～まほろば畑

佢哋嘅自助餐（モーニングバイキング）好出名，可以一次過試勻好多「土佐」嘅鄉土料理

跟住鏡頭一轉就見到一整排賣刀嘅架，手工精細嘅『土佐打ち刃物』，鍾意煮餸嘅朋友見到一定會心心眼

這是「高知」的Wooper【Wooper（烏波）同佢進化型嘅（沼王），係「高知」官方寶可夢代言人，主打（清流與森林）嘅形象】，各式週邊商品種類不斷增加，用嚟做手信都唔錯，夠曬「高知」特色

這款小米餅乾，內餡是特製的白色奶油。鐵盒上印有『熱愛高知的寶可夢』Wooper（烏波）和小米夾心餅乾的各種圖案，（呢款商品限購㗎，真厲害！每人限買兩件）

呢款手信是「高知縣~四萬十川」的『生薑女孩專賣店』的招牌貨品~『生薑派』（Gomen Ginger Die/Pie）

呢度仲有得賣「高知」名物（鰹魚半敲燒《鰹のタタキ》）

跟住見到嘅公仔吊飾，是「日本」流行的Mokeke，特徵係手腳很長，喜歡用有彈性的手臂緊緊抓住物品

下面貨架見到好多「高知」嘅特產，基本上要乜有乜，例如咖啡、拉麵、麵包超人裝飾品

除咗鰹魚，「高知」產嘅柚子亦係相當出名，下圖見到嘅係柚子汁，飲用時通常建議稀釋飲用

又見到同鰹魚相關嘅產品，（鰹魚碎同竹莢魚碎），可以撒在米飯、燙過的蔬菜、豆腐、大阪燒等食物上享用，另外仲有「土佐」一家擁有80年歷史的肉湯專賣店德屋出品的（飲用肉湯）。只需將一包溶於100毫升熱水中，即可享用美味的肉湯

下面見到嘅亦都係「高知」特產 ~ 柚子的製成品，包括柚子胡椒鹽、柚子醋、柚子鹽、柚子果凍、柚子辣椒、柚子胡椒蛋黃醬，可惜我長期服用的藥物中，有種藥標明服用後，不可以食柚子，所以都係得個睇字

喺其他凍櫃，就見到有據說日本No.1的(澤西牛奶)所做成嘅焦糖布丁

就連「四萬十市」嘅名產，（鰻魚餅乾、四萬十海苔）呢度都可以買到

據說呢款係銷量No.1嘅（鹹焦糖酥皮餅），入咁多貨，睇嚟真係會好多人鍾意買

行到去尾段，仲見到有凍飲、雪糕court

如果真係要買手信送畀人又要有當地特色嘅話，道之站其實真係一處不錯的選擇

跟住我哋就繼續行埋去隔離睇農產品 ~

JA高知県直売所

呢邊就有「高知」產嘅香菇、辣椒，同一啲農作物

「高知」最出名嘅水晶柚子，呢個品種係文旦

產自「德島縣」的（Jabara邪祓）柑橘

真係超級多地道產品購買

睇完「高知」嘅特產之後，我哋就繼續開車出發去「莫奈庭園」，喺途中會先經過以下這個景點 ~

野良時計

我哋將車停泊喺：

野良時計駐車場

MAPCODE：

335 349 443 *76

景點資訊

地址：高知縣安藝市土居638-4

電話：0887-34-8344（安藝觀光資訊中心）

開放時間：24小時

門票收費：免費

停車收費：有免費停車場

🔻公共交通：
▶️可以搭《土佐黑潮鐵道》在「安藝站」落車，然後轉的士大約5分鐘可到達。或者喺「安藝站」可以租單車，踩十幾分鐘單車過去，感受下田園風光，都係一個唔錯嘅選擇

由「道之站南國風良里」開車行駛36.3km約47分鐘就可以到達，這段路不需要公路費用

離開「南國市」，揸大約一個鐘頭車，就會嚟到「安藝市」

停車場有洗手間，真係超級貼心💯

由停車場行過去景點非常近，去「莫奈庭園」途中，（雖然唔算太順路，因為要兜多幾分鐘車程先可以嚟到），雖然唔係什麼大熱景點，但係其實都好值得過嚟欣賞下

首先就同大家講下，這個「良野時鐘」嘅歷史

「野良」喺日文係指「田野」，呢座時計嘅故事，要由130幾年前嘅明治20年（1887年）講起。當時嘅大地主畠中源馬先生對時鐘嘅機械結構非常着迷。嗰個年代，一般日本家庭邊有掛牆鐘呀！但佢為咗了解時鐘嘅運作原理，竟然將屋企唯一一個美國製嘅掛鐘不斷拆完又砌、砌完又拆，靠自學去理解每一個齒輪嘅作用

最後，佢呢個「逆向工程」創舉大成功！佢憑住一雙手，自己製作埋唔少零件，成功起咗呢座充滿日式傳統美感嘅巨型鐘樓。從此之後，附近嘅農民喺田度做工，只要抬起頭，就知道當時係咩時間，所以佢又被稱為『農田嘅時鐘』

呢座鐘樓嘅造型古樸優雅，木造嘅雙層結構，瓦片屋頂，前方有一小片種花嘅土地，如果夏天嚟到，就會見到開滿燦爛嘅向日葵花田，黃色嘅花海襯托住古老嘅鐘樓，成個畫面靚到好似明信片咁，充滿童話色彩

春天嚟到嘅時候，就會在空地上見到向日葵

要去朝聖嘅朋友要留意，呢座「野良時計」係屬於私人住宅嘅一部分，並唔對外開放內部參觀㗎！

大家最好靜靜哋喺外面欣賞同影相，唔好打擾附近居民。雖然只可以遠觀，但企喺度感受嗰份跨越百年嘅歷史氣息，同一啲大熱景點嘅感受完全唔同

附近好多民宅嘅建築都好古典雅緻

好似呢一堆屋前面就有水溝包圍4面，這個設計真夠特別

下一站就係「莫奈庭園」，不過因為篇幅非常長，所以會留返下一次一篇過寫畀大家睇

跟住呢篇就會講埋喺「莫內庭園」返到「高知」市中心，入住嘅酒店同埋「弘人市場」，我哋今晚係「高知」入住嘅酒店係～

新阪急高知皇冠飯店

MAPCODE：

73 184 490 *43

酒店資訊

地址：高知縣高知市本町4-2-50

電話：088 873 1111

入住/退房時間：14:00/11:00

🔻停車收費：
▶️住宿客人泊車費1500日元一晚
▶️多層停車場有車身高度限制1.550毫米，高過這尺寸嘅車輛就要停泊在地面停車區

🔻公共交通：
▶️乘搭《土佐電氣鐵道》（電車），在「高知城前」站落車，再步行1分鐘就可以到達

呢間酒店嘅好處，就係有自己停車場，我心儀嗰兩間酒店（喺附近）都冇停車場，停車又唔係太方便，所以呢個亦係我入住呢間酒店嘅原因之一

這是一間老酒店，設施比較老舊，但是地理位置就真係幾好，個大堂好似八十年代祖國嘅style

酒店鄰近「高知城」，步行就可以到達，離「弘人市場」亦唔遠，同樣步行就可以到達，這亦都係我考慮入住呢間酒店嘅原因之一

驟眼睇其實幾富麗堂皇㗎！不過真係好似時光倒流咁，以為自己返到80年代嘅時空

上到樓層走廊，就已經有啲後悔選擇呢間酒店入住，整條走廊都充滿陳年噏味

打開房門第一時間就去睇下個廁所，好彩尚算乾淨，不過款式就都係8、90年代嗰款，好彩算大面積

一般酒店供應嘅梳洗用品呢度亦一樣有

其實房間面積唔細㗎，我哋今次訂咗雙床房，面積有25.2平方米

跟住見到嘅就係衣櫃，夠曬大個

兩張床喺房間正中，可以三面落床，空間感十足

不過啲設計真係古早feel到不得了

睇下呢個有鎖嘅雪櫃，大家見過未！唔知以為係夾萬嚟

床旁邊仲有茶几同座椅放喺窗邊

拉開窗紗就可以睇到戶外嘅景色

呢間酒店我哋都有訂購早餐，食早餐嘅環境，好似去咗中式大酒樓咁，今次都算大開眼界

至於早餐嘅食物就唔影了，都係一般酒店供應嘅食品，另外酒店有幾間商店，包括有手信店、花店、婚紗店同五間食店

呢間酒店除咗有停車場係優點，另外價錢平亦算係優點，六百幾港幣包早餐住一晚，仲要有咁大空間，真係算平㗎！

如果你係一個極度細緻、又有潔癖嘅人，咁你一定唔啱住呢間酒店，但係如果你係大以化之，又著重價錢嘅話，咁呢間酒店可能會適合你

至於晚餐我哋就步行去不遠的 ~

弘人市場（ひろめ市場）

由酒店步行7分鐘500公尺可到達

景點資訊

地址：高知県高知市帯屋町2-3-1

電話：088-822-5287（弘人）市場資訊中心

🔻營業時間：
▶️平日、週六10:00-23:00／週日9:00-23:00
▶️※各店家營業時間略有不同

🔻停車收費：
▶️可將車停泊在「弘人市場駐車場(TIMES)」ひろめ市場駐車場
▶️MAPCODE：73 184 737 *04
▶️有188個車位
▶️收費30分鐘200日圓，在市場任意店家消費滿3000日元，即可享一小時免費停車。請在店舖出示停車票
▶️有車身限制：車輛限制→寬度1.9公尺→高度2.2公尺→長度5公尺→重量2.5噸

🔻公共交通：
▶️乘搭《土佐電氣鐵道》（電車），在「大橋通站」站落車，再步行2-3分鐘就可以到達
▶️如果由「JR高知站」出發，向南行穿過商店街，大約行15-20分鐘就會到達