四國自駕遊 ~ 栗林公園（米芝蓮綠色指南三星庭園）、 高松城跡玉藻公園（日本三大水城之一）

 

今日行程包括有一步一景嘅【米芝蓮綠色指南三星級景點 ~ 栗林公園】，同埋有【日本三大水城】之一嘅「高松城跡玉藻公園」，呢兩個景點都係「高松」必遊嘅景點，兩個景點都充滿日本傳統美學同歷史感。如果大家Plan緊去「四國」，記得Bookmark定.....

全文內容

已經去到旅程嘅尾聲，今日會同大家講兩個景點，有歷史有美景，首先第一個景點係 ～

栗林公園

景點資訊

地址：香川縣高松市栗林町1丁目20番16號

電話：087-833-7411

👇營業時間：幾乎從日出到日落
🔻1月、12月
▶️07:00-17:00
🔻2月
▶️07:00-17:30
🔻3月
▶️06:30-18:00
🔻4月、5月、9月
▶️05:30-18:30
🔻6月、7月 、8月
▶️05:30-19:00
🔔全年開放

🔻入場收費：
▶️一般門票：成人500円、兒童（小學生）170円
▶️團體票（20人以上）：成人400円、兒童140円
▶️學齡前兒童、殘障人士免費
🔔*元旦（1月1日）及公園開園紀念日（3月16日）免費入園

🔻停車收費：
▶️県営東門駐車場：可停放（一般車輛30輛、巴士13輛）費用：一般車輛100円/25分鐘
▶️栗林公園北第一停車場：可停放（一般車輛32輛）費用：一般車輛100円/25分鐘

🔻公共交通：
▶️電車： 搭《JR高德線》去「栗林公園北口站」，出站行3分鐘到「北口」；或者搭《琴電琴平線》去「栗林公園站」，行約7至10分鐘到「東口」
▶️巴士： 喺「JR高松站嘅巴士站」上4或5號月台嘅車，去到「栗林公園前」落車直達門口
▶️的士： 如果喺「JR高松站」出發搭的士，車程大約7分鐘就到

下圖係今次旅程中第6、7日嘅景點

由「栗林公園」嘅『東門』進入，直接去最出名嘅「飛來峰」影返張人生絕境相片！因為全公園最Signature嘅風景——「飛來峰」同埋後面嘅「偃月橋、南湖」景觀，絕對係最值得專攻嘅重點，所以將車停泊喺以下呢個停車場，更為方便 ～

県営東門場

 MAPCODE：

60 575 021 *46

公園有兩個入口，分別係『東門』同『北門』，將車停喺邊個入口，就要視乎你想去邊個景點，另一個停車場係 ～

栗林公園北第一停車場

MAPCODE：

60 575 464

一去到門口，已經感受到一陣古樸氣息。其實「栗林公園」唔係浪得虛名，佢係日本國家級嘅【特別名勝】，而且喺所有被指定為【特別名勝】嘅文化庭園之中，為最大的一處地方

公園面積真係好大㗎！約75公頃，大約係3個「香港維園」 咁大，同時亦獲【米芝蓮綠色指南】評為三星景點

由停車場一路行到過嚟入口，就會見到（香川物產館 ）

栗林庵

營業時間：星期一至日

10:00–18:00

跟住就預備行去入口買入場券

呢個售票處係 ~

東門券売所

門票嘅樣式，非常有日本傳統feel

入到嚟園區首先就要知道自己行邊個方向，先前我哋已講過，所以當然直奔「飛來峰」

如果大家都好似我哋嘅路程一樣，咁就一定要睇落去😁

「栗林公園」入面種植咗好多松樹，據說有1400棵，呢啲松樹叫「奇松」（Kisho），其中有好幾棵超過300年歷史，包括『鶴龜松』同『屏風松』

見到啲松樹盤根錯節、姿態奇特，真係唔可以唔驚嘆造園師嘅鬼斧神工👍

一直行無幾耐就會見到 ～

花園亭（日本餐廳）

營業時間：

星期一至日

08:00–17:00；18:00–21:00

呢間係知名歷史茶屋同餐廳，除咗提供一般小點心同烏龍麵外，最著名嘅就係需要提前預訂嘅『大名朝粥（早粥）』

過咗「花園亭」少少會見到2條路，我哋行最外面嗰條

呢度都有箭咀寫住，去乘坐（和船）就對了

轉入嚟呢條路叫 ～

桜の馬場

呢度係園區內賞櫻嘅核心區域，遊客可以沉浸喺日式庭園嘅粉嫩春景裡

經過完「桜の馬場」花園後，會開始見到有湖水出現，呢個應該係「北湖」嘅湖水

「北湖」係園區內僅次於「南湖」嘅第二大湖，以數量龐大且不怕人嘅錦鯉聞名

每日下午 3點 園區有專屬的嘅『餵魚秀』。到時會有上百條碩大嘅錦鯉衝出水面搶食，水花四濺嘅震撼景象，非常受到遊客歡迎

我哋沿路繼續行，首先會到達「芙蓉峰」，「芙蓉峰」係一座人造假山（築山），上到去可以俯瞰園內「北湖」嘅全景

我嘅目標係「飛來峰」，所以就慳番啲腳骨力唔行「芙蓉峰」😅，一路行就會見到乘坐（和船）嘅地方同「飛來峰」路標

好快就行到嚟「南湖」，如果想親身感受吓古代藩主遊園嘅樂趣，咁一定要試吓佢哋嘅「南湖周遊和船」體驗

南湖周遊和船

🔻營運時段：
▶️首班船為 上午 9:00。末班船通常為 下午 4:15 出發
▶️📌冬季（11月至1月）末班船會提早至 下午 4:00 出發
🔻和船票價：
▶️大人（高中生以上）850日圓、中小學生 420日圓(注意：此費用不包含栗林公園的入園門票)
🔻乘船限制：
▶️未滿3歲的幼兒無法乘船，小學生以下需有家長陪同
🔻航行時間：
▶️環繞南湖一周約 30分鐘

有睇開我嗰Blog嘅朋友，應該會清楚我一定唔坐艇仔，呢啲體驗都係留返俾各位，完成後話我聽感受🫣，（心理陰影真係好難攪😮‍💨）

過咗乘搭和船嘅碼頭之後，跟住會見到分岔路，我哋依然選擇左邊嗰條繼續行

喺度講返少少「栗林公園」嘅歷史先：

呢個公園歷史非常悠久，公園名「栗林」源於早年呢度曾經係一大片栗子樹林。公園喺1625年左右，由當時嘅（讚岐領主）生駒高俊喺「紫雲山-南湖」一帶開始建造，之後經歷松平家5代藩主，花咗大約100年時間，先至變成而家嘅模樣，並於1745年正式完工

喺1869年明治政府收歸國有之前，呢度一直係松平家傳承咗11代嘅私人庭園。佢以【回遊式大名庭】嘅方式設計，巧妙地以翠綠嘅「紫雲山」為背景，園內分佈咗6個水池同13座築山（假山）。所以有句說話叫『一步一景』嚟形容

好快就行到嚟「南湖」，弧形狀嘅「偃月橋」就在前方

見到呢個風景亦即係代表嚟到「飛來峰」腳下，我哋沿住小徑慢慢行上去

睇見呢張樓梯嘅相，真係有啲嚇親人，唔知真係覺得有排行😅

喺路邊會見到呢個 ~ 

雞林石

差唔多行到頂，就已經可以睇到峰下嘅美景

「飛來峰」係一座以「富士山」為原型，而建造嘅假山（築山），雖然唔係好高，但因為視野開揚，絕對係園內最佳嘅觀景台

終於上到嚟💪

山峰上地方唔係好大，但就有好多（矽化木），即係已經石化嘅樹木

多人參觀嘅時候，呢度細到真係企都冇位企🫣

當年嗰啲藩主好識嘆，呢度係成個庭園中最適合登高望遠、一覽全局嘅位置，我今日終於可以親身體驗👍

喺呢度望出去，成個「南湖」景觀一覽無遺，仲可以睇到遠處以「紫雲山」做背景嘅「掬月亭」同「偃月橋」，好似一幅畫咁靚

眼前嘅「偃月橋」如同一彎新月咁優雅地橫跨湖面

背後襯住翠綠嘅「紫雲山」同遠處嘅「掬月亭」，喺度影相唔使構圖、隨便影都係明信片級數

落嚟嘅時候可以試下從另一邊落，雖然「飛來峰」唔係好大，但原來係有兩條路可以上到嚟

「南湖」嘅海藻在鏡頭下真漂亮

水質又清澈，見到呢一片湖水，真係覺得暑氣冇咗一半

可以跨過湖上面嘅石塊走去對面嘅 ～

吹上亭

「吹上亭」係一間 紀念品商店 

營業時間：

星期一至日09:00–17:00

可以喺度買魚糧餵錦鯉

嘩😱！你睇下啲錦鯉幾靚

條條都又大又肥美

擘大個口搏命食魚糧，真係幾得意💕

平地角度影過去，係咪真係冇咁靚呢？所以嚟到一定要上「飛來峰」影哦！

喺「吹上亭」後面，仲有處景點 ~ 

吹上

「吹上」泉水清澈甘甜，滋養著各種生物，地下水資源豐富，從未乾涸過

我哋繼續行過去「偃月橋」影相

呢條橋坐落喺「南湖」嘅東側，橋如其名，成個月弧形狀好優美，配埋湖邊青翠嘅松樹同背後嘅「紫雲山」，構成咗「栗林公園」最標誌性嘅風景

呢度另外一個必影嘅地方就係 ～

近年備受情侶歡迎的『戀愛聖地』

戀愛杜鵑（恋ツツジ）

因長年的修剪與打理，園內嘅杜鵑花叢偶然形成咗夢幻嘅（愛心形狀），作為『戀人聖地』，呢度不僅是情侶打卡熱點，亦係拍攝婚紗照嘅熱門取景地，要影到漂亮嘅杜鵑花就要喺每年 4 月上旬至 5 月下旬嚟哦

喺「偃月橋」行過少少，就係 ~

飛猿巖

呢度係一處歷史悠久嘅天然假山巨石，亦係觀賞「飛來峰」全貌，同俯瞰園景嘅絕佳地點之一

喺「飛猿巖」旁邊就係 ～

迎春橋

喺「南湖」邊上一條古樸嘅木造小橋

喺橋上就見到 ~

掬月亭

呢間係正方形嘅茶室式建築，座落喺「南湖」北岸，係成個庭園嘅中心建築物。名稱取自唐朝詩句「掬水月在手」，意境好優美唷😘

喺「掬月亭」旁邊嘅就係 ~

根上り五葉松

呢棵巨大嘅松樹高約8米，樹幹週長約3.5公尺。據說於1833年，第九代藩主將松樹栽種於自家花園，如今已長成如此巨大

喺「掬月亭」另一邊已經唔係「南湖」，而係 ~ 

涵翠池

呢個池係「栗林公園」經典造景水池之一，其名稱寓意『涵浸翠綠』，池上有座「瑤島」，「瑤島」其實係一個人工小島，與鄰近其他假山造景相映成趣，係迴遊式大名庭園中，水景設計嘅精華點之一

園區嘅面積實在太大，我哋都只係行咗三分一，園區有6個水池同13座人工造山，如果要每個行晒，都真係幾攰，所以其餘嘅三分二，等我哋有緣先再見😅

園區其他美景仲有 ~

北庭、讚岐民藝館、商工獎勵館、群鴨池、花しょうぶ園、石壁 (赤壁)、北梅林、西湖、旧日暮亭 

本篇第二個景點👇 

高松城跡玉藻公園

呢度好似「栗林公園」一樣，都係分（東口）同（西口）兩個出入口，如果自駕嘅話，免費停車場喺（東口）呢邊

玉藻公園專用駐車場 

MAPCODE：

60 636 408 *07

景點資訊

地址：香川縣高松市玉藻町2-1

電話：087-851-1521（玉藻公園管理事務所）

👇營業時間：
🔻東門
▶️4月～9月：07:00 ～ 18:00
▶️10月～3月：08:30 ～ 17:00
🔻西門（主要出入口，JR高松站步行約3分鐘）
▶️4月、5月、9月：05:30 ～ 18:30
▶️6月～8月：05:30 ～ 19:00
▶️10月： 06:00 ～ 17:30
▶️11月： 06:30 ～ 17:00
▶️12月～1月： 07:00 ～ 17:00
▶️2月： 07:00 ～ 17:30
▶️3月： 06:30 ～ 18:00
🔔*休息日： 每年 12 月 29 日 ～ 12 月 31 日休息

🔻門票收費：
▶️成人（16歲以上）200円
▶️兒童（6～15歲）100円
▶️6歲以下、殘障人士、持大學學生證者免費
🔔*每年1月1日～3日及5月5日為免費開放日

🔻公共交通：
▶️由「JR高松站」步行約3分鐘就到
▶️如果你搭《琴電（ことでん）》 ，喺「高松築港站」落車，步行約1分鐘就到公園「西門入口」

泊好車其實已經見到「高松城」嘅一部分 ～

艮櫓

「玉藻公園」旁邊就係「高松港」同「JR高松站」，交通極之方便。公園佔地約5.8公頃，面向「瀨戶內海」，景觀開揚，就算喺城市中心都可以望到海景

跟住我哋就要經過「旭橋」，「旭橋」係公園東側入口跨越護城河嘅橋樑

橋前方就係「旭門」

「艮櫓」位於「東之丸」嘅櫓台，係【日本國家重要文化財產】，與護城河嘅倒影構成非常優美嘅畫面

入到公園，第一眼就見到護城河，「高松城」屬於『輪郭式平城』，最特別嘅地方係佢引入「瀨戶內海」嘅海水做護城河，形成三重護城河體系，係名副其實嘅『水城』

與「愛媛縣」嘅「今治城」、「大分縣」嘅「中津城」齊名，並列為「日本三大水城」之一

直接用海水做護城河嘅城池非常罕見，珍貴程度甚至被稱之為【海上之城】

我家主子頭上嘅箭嘴，唔係我加上去㗎，係佢自己帶咗個頭箍，呢啲裝飾品我真係唔識欣賞🫣，不過西方人就非常欣賞，對住佢豎起大拇指👍

護城河嘅『海水』（我冇寫錯呀！係「瀨戶內海」嘅海水），倒影天空上嘅白雲，真正嘅天空之鏡

城牆上嘅松樹都有海上倒影㗎

喺護城河呢邊都已經影咗唔少相，跟住我哋就進入 「旭門」

過咗「旭門」就係售票處，參觀公園同城跡係要購票哦

門票唔算貴，況且仲係唔使俾停車費，又近市中心，所以呢個景點其實都好多遊客嚟

入場券上城跡嘅構圖真係幾靚，不過可能都需要用航拍機

完成購票後首先會經過「桝形」

「桝形」（內桝形虎口）是城池防禦力最強固嘅正門防衛設施

跟住就見到另一角度嘅「艮櫓」

「艮櫓」大部份時間都只可欣賞外觀，要係特別節日（例如5月5日開放紀念日.....等），先至會開放俾民眾入內參觀

跟住呢邊見到好大範圍，係園區內的 ～

桜の馬場

除咗松樹，呢度亦係「高松市區」嘅賞櫻聖地

每年春季約 4 月上旬，包含染井吉野櫻在內，約 76 株櫻花會盛開，夜間更會舉辦免費開放嘅夜櫻點燈活動

「高松城」於（約1587年）由生駒親正建造，後來成為松平家執政「四國」嘅政治中心，以前嘅天守閣係「四國」地區最大規模嘅城樓，不過宜家就.....😓

跟住我哋見到嘅呢個城門係 ~ 

櫻御門

「櫻御門」係「三之丸」的正門，喺1945年嘅『高松空襲』中被焚毀，歷時逾十年調查與重建，於2022年以木造結構完整復原

喺呢邊見到對面嘅係「天守台跡」，無錯天守已經不存在，如果從『西口』入嚟，首先就會見到呢度

呢條造型咁特別嘅係 ~

鞘橋

「鞘橋」係一座橫跨內護城河、連接「二之丸」與「本丸」嘅專屬通道，全長約 30 公尺，是一座帶有屋簷嘅木造橋樑，喺江戶時代中期，為了保護城主通行，免受風雨侵襲而加蓋咗屋頂，呈現獨特嘅「鞘狀」外觀，因而得名

跟住見到呢座係 ~

披雲閣

1917年重建嘅迎賓館，融合咗日本傳統同西洋建築技術，係『日本國家重要文化財產』。目前經常被用作舉辦茶會同音樂會等活動，一般不對外開放，但喺每年1月1日至3日，同5月5日會特別公開俾公眾參觀

沿住小徑行入 ~

內苑御庭

庭園就喺「披雲閣」後方，係「三之丸」的著名枯山水日本庭園，於1916年（大正5年）為咗配合前高松藩主松平家別邸「披雲閣」嘅重建而設計

庭園內安置了一座體積比人還高、重達11公噸嘅巨大石製洗手盆「手水鉢」，係庭園最具代表性的地標之一

面積約3,000平方米嘅日式庭園，以石、砂、岩等呈現山水風景，設計雅致，非常適合靜心欣賞呢座庭園

呢度完美融合了江戶時代嘅藩政風格與近代日式庭園美學，目前與「披雲閣」一同被列為『日本國家重要文化財產』

庭園另一看點就係 ~ 

大正天皇與皇后手植松

庭園內種植咗大量修剪精緻嘅松樹，其中包含大正時期由大正天皇與皇后（部分文獻記載為昭和天皇於皇太子時期）親手栽種嘅紀念松樹

如果剛剛影嘅「披雲閣」係前方，咁呢度就係後方，呢度真係千回八轉，同一樣嘢要睇前後😅

跟住就行到嚟「高松城跡」最經典嘅 ~

月見櫓、水手御門

「水手御門」同「月見櫓」都係【日本國家重要文化財產】，「水手御門」係面向大海嘅城門，呢種設計喺日本城郭中真係非常少見，但可惜今日係關門狀態，真係超級可惜😓

「月見櫓」位於「北之丸」，係一座三層嘅望樓，昔日用嚟監視「瀨戶內海」嘅船隻出入。

呢度每逢星期日（上午9點至下午3點）會開放內部參觀，可以喺櫓上面飽覽「瀨戶內海」靚景

我哋兜過去後面睇下，大家就知道如何面向大海

喺「水手御門」再向前行就會見到 ~

高松城内堀遊覧和船玉藻丸乗り場

高松城和船

🔻營運時段：
▶️3月1日至11月30日（12月至2月冬季因寒冷停航）
▶️星期一至日10:00 - 15:30
▶️🔔*中午 11:30 至 13:30 為工作人員午休時間，期間不載客
▶️🔔*3月、10月和11月的末班船時間可能有所調整
▶️每30分鐘一班（如 10:00、10:30、11:00...）
🔻和船票價：
▶️大人（高校生以上）500円、兒童（5歲以上）300円
🔻航行時間：
▶️約30分鐘

船票已包含鯛魚飼料費用，可以喺木造嘅和船上，直接餵食護城河裡嘅鯛魚

一路向前行就係「西門」嘅出入口，而左轉就可以行去「鞘橋」同「天守台跡」

我哋就唔再行喇，因為都幾攰㗎，喺度係咁兜圈，我哋唔係搭公交，仲要返轉頭沿路去攞車，唔可以直接喺「西門」直接走人，所以有時自駕，亦未必真係咁方便，回程時見到呢啲非常大個嘅松果

下一篇就係『四國自駕遊』嘅最後一篇 ~

香川【屋島半日遊】~「屋島寺」千年古剎、「獅子之靈巖展望台」睇絕景、「Yashima-maru」打卡新地標

記得留意哦！也謝謝您的觀看❤️

Share: