「小豆島橄欖公園」——跳入魔女世界！點解一定要去？ 如果你係宮崎駿粉絲，或者純粹想喺日本搵個唔似日本嘅地方打卡，呢度係Must-go！「小豆島」係日本橄欖嘅發源地，氣候溫暖乾燥，成個感覺好有「地中海」風情，今次仲要加碼介紹「高松」一間CP值爆燈嘅海鮮居酒屋——「海鮮うまいもんや 浜海道 鍛冶屋町店」.....
全文內容
我哋跟住繼續講第五日嘅行程，（冇睇上一篇嘅記得睇返👇）
嚟到「小豆島」除咗必到嘅「天使之路」外，仲有一個景點，係大家都一定會嚟嘅 ～
小豆島橄欖公園
MAPCODE：
364 798 304 *10
地址：香川縣小豆郡小豆島町西村甲1941-1
電話：879-82-2200
開放時間：08:30 – 17:00（全年無休）
門票收費：免費
停車收費：免費
🔻公共交通：
▶️喺「土庄港碼頭」出面嘅巴士站，搭《田浦線》或者《坂手線》巴士，大約搭20-30分鐘，喺 「橄欖公園口站」落車，行大約5分鐘就會見到個大風車㗎喇
▶️如果你一日會周圍去，建議買『小豆島巴士一日券』(約1000-1600yen)，可以任搭橄欖巴士，咁就唔洗逐程逐程比錢咁麻煩
我哋由「天使之路」開車行使10公里約14分鐘就可以到達，（呢段路不需要公路費用）
.webp)
「小豆島橄欖公園」有幾個停車場，我哋將車泊喺「橄欖紀念館」嘅後面，不過呢邊唔係有太多停車位，每個人都想靠近主建築，方便購物食飯，所以呢邊嘅車位會比較Full
「小豆島橄欖公園」嘅範圍其實都幾大
停車場行出去就已經係「小豆島」嘅 ~
「Herb Garden」（香草花園）
停車場距離以下景點非常近👇
Olive Story Book
（オリーブストーリー）
呢個係公園內非常著名嘅立體巨型書本藝術裝置。亦係一處結合咗歷史感、童話風與絕佳影相效果嘅必到打卡景點
可以喺停車場前面嘅「橄欖紀念館」，免費借用魔法掃帚，帶過嚟影相就可以一飛沖天🪂
附近亦有另一藝術裝置 ~
魔法の扉
同樣係公園內嘅超人氣打卡裝置，類似於經典漫畫中的『任意門』
同樣係附近會見到公園內嘅人氣商店 ~
琪琪的店 - Koriko
營業時間：
星期一至星期六09:00-17:00
商店正面布置咗個綠意盎然嘅小花園
門前設有椅子，是遊客必影的網美點
這座精緻的小木屋，係 2014 年《魔女宅急便》真人版電影中，主角（琪琪）所寄宿嘅「Guchokipanya 麵包店」實景拍攝道具
在電影拍攝結束後，就被完整遷移到公園內嘅「香草花園」旁邊
然後改建為一間充滿溫馨氛圍嘅香草、雜貨與手作飾品店
店內裝潢與擺設延續了電影的世界觀，保留了英式鄉村雜貨風與乾燥花裝飾，讓人一踏入就彷彿置身於魔女的世界
商品都係帶有藝術與設計感，部分設計可能與特定的文創活動或場所主題相關
同時亦有復古風玩具
鍾意小飾品嘅朋友可能會好喜歡
因為設計真係幾獨一無二
而喺「琪琪的店」斜對面就係溫室
可購買香草
整個公園週圍都會有一啲雕塑，顯得非常有藝術氛圍
行完「琪琪的店」，我哋就繼續向公園標誌性嘅藝術裝置『希臘風車』出發
風車距離「琪琪的店」會有一小段距離
園區內種植了約2000棵橄欖樹，沿途都會見得到，據說如果喺「橄欖樹小徑」搵到（心形的橄欖樹葉），就會變非常幸福
可以將搵到嘅心形樹葉加錢（120円）造成書籤、御守
我都係第一次見到喺樹上的橄欖，橄欖果實喺每年嘅5至6月開花，最初生出嚟嘅果實係青綠色，到咗秋季大約10月至11月，就會由青色變成黃色、粉紅色、紅色，甚至係紫紅色，到完全成熟嗰陣就會變成黑紫色
如果大家夏天嚟「小豆島」記得要做好防曬措施，如果唔係好容易變小黑炭
跟住見到嘅呢個鳥居，係屬於 ~
水木荒神社
據說呢座隱密嘅神社，創建於江戶時代中期
以為10月份嚟「小豆島」唔會太熱，但係有太陽不斷咁曬，其實都會行到出曬汗🥵
昭和天皇御手播きのオリーブ
顧名思義呢棵樹係昭和天皇於1950年（昭和25年）3月15日，訪問「四國」期間，順道到訪「小豆島」，並親自播下種子，變成我哋而家見到嘅呢棵橄欖樹
終於行到嚟『希臘風車』
呢座風車係島上最知名的地標
建造呢座風車嘅原因，係為咗紀念「小豆島」與「希臘愛琴海」的「米洛斯島」結為姊妹島而建造
搭配「地中海」式嘅藍天、白色圓頂建築與周圍嘅橄欖樹林，真係好似置身歐洲一樣，大家都一定會借用魔法掃把，留低一張經典嘅魔女飛天照🪂，（我朋友飛天嘅姿勢係咪一絕👍）
扮完魔女飛天之後，我哋就返去停車場附近參觀 ~
橄欖紀念館
營業時間：
星期一至日08:30–17:00
一整排建築裏面除咗有「橄欖紀念館」，仲有 ~
Olive Memorial Hall Gift Shop
オリーブ記念館 売店
夠曬獨一無二，用嚟打卡一流
抬頭向上望，公園內最特別嘅設置，同值得參觀嘅景色，都已經陳列曬喺上面
紀念館裏面可以借用魔法掃把嘅木架，不過啲掃把已經畀人借曬出去😅
喺紀念館裏面仲有一啲藝術裝置嘅展出，就好似下圖呢個作品，名叫 ~
(美しき対極—無限に続く円—)
據講作品係以1990 年設計嘅連衣裙為靈感，但係想表達啲乜，就各位想像下啦，喺呢度唔寫咁多嚕😁
另一邊就見到一個大型嘅「小豆島」醬油木桶，旁邊有說明牌，簡單介紹咗島上醬油嘅歷史
OLIVAZ PIZZA用巴馬臣芝士（Parmesan）、加上新鲜蔬菜和肉腸製成 ¥1,380
橄欖素面
橄欖奶油乳酪醬
午餐時間我哋就幫襯呢度嘅 ～
OLIVAZ（オリヴァス）
營業時間：
星期一至日11:00–15:00
餐牌係得咁多嘢食🫣，包括
- 托斯卡尼豆子湯（Ribollita）
- 西班牙番茄雞肉燉飯
- OLIVAZ PIZZA
全部食物都係用「小豆島」產橄欖油烹製而成
西班牙番茄雞肉燉飯¥1,480
食物夠曬天然，好清新，味道亦非常唔錯
食飽當然要去旁邊嘅店舖購買手信 ~
Olive Memorial Hall Gift Shop
オリーブ記念館 売店
營業時間：
星期一至日08:30–17:00
咁我哋就睇下有啲乜嘢買😁
下圖見到嘅係 ～
「小豆島」手工拉麵
採用「小豆島」橄欖汁製成！用嚟搽喺多士、餅乾和芝士蛋糕上都非常完美！
「小豆島」的秋日風味 ~
新鮮醃橄欖
是什麼味道？精心採摘，再用鹽水醃製，帶來淡淡的鹹味，食用方法就好似醃菜一樣，可以直接食用，亦可以做成天婦羅、或者加入米飯一起煮成橄欖飯
另外當然有用「小豆島」橄欖油造成嘅護膚品、潤手霜、潤唇膏.....
買完嘢就再睇下風景，從高處嘅紀念館向前望出去，就係 ~
オリーブ公園
喺呢度可以見到「內海灣」、「田浦半島」和「三島半島」
石台上嘅紀念碑，係仿照古希臘『陶片 ~ 放逐法』（用陶片放逐）所用嘅碎片而建成
以前公民會用呢啲碎片選舉公職人員，放逐不稱職人員，陪審員亦用嚟喺審判中投票。中心嘅軸心代表無罪，而沒有軸心則代表有罪。呢座紀念碑象徵純潔，與寧靜祥和嘅「小豆島」相得益彰
另一大熱打卡裝置，就係呢個
橄欖色郵筒
帶來幸福嘅橄欖色信箱，從橄欖樹之島「小豆島」寄出一封信、明信片，令最珍惜嘅人得到幸福
呢度有座椅設置，可以欣賞眼前嘅美景，亦非常有心思，座椅扶手可以放一杯雪糕或這一杯咖啡☕
其實「小豆島」都仲有好多景點值得參觀，不過可惜我哋一日遊始終時間唔多，又係時候揸埋駕車搭船返去「高松」
返到「高松」已經接近黃昏，我哋今晚嘅晚餐就選擇食 ~
海鮮うまいもんや 浜海道 鍛冶屋町店
地理位置勁方便！喺「片原町商店街」行到最尾就到達，由入住嘅酒店「WeBase高松」行過嚟都係334公尺，大約行4分鐘
.webp)
今次講嘅呢間食肆，真係平靚正，氣氛仲要勁熱鬧
呢間鋪頭好有人氣，夜晚6點半之後好快滿座，如果唔想排隊排到餓親，最好都係預先訂位，或者早少少6點左右就去到啦
呢度係好地道嘅日式居酒屋格局，燈光昏黃，好有昭和風味。注意：店內係全席禁煙嘅，不過門口出面有煙灰缸
餐廳主打新鮮嘅「瀨戶內海」海鮮，最正係佢個炭火燒烤 (浜燒) 同埋刺身，價錢親民，最啱一大班Friend傾計喪食
部份餐牌仲有英文，對外籍人士，又唔識日文嘅人嚟講，實在太幸福
不過一張張嘅餐牌真係睇到人眼花繚亂
最鍾意餐牌有圖片，有時明明目標唔係嗰樣，但係睇見餐牌啲相咁靚，又會不自覺咁叫埋
跟住就同大家睇下我哋叫咗啲乜嘢餐點 ~
首先係：蔬菜大蜆湯👍👍👍👍
蜆肉肥美，湯亦非常鮮甜
刺身拼盤 👍👍👍👍👍
既然嚟到「香川」，一定要試鰹魚 (カツオ) ！呢度嘅刺身拼盤係由「高松魚市場」直送，厚切上檯，口感超滿足。佢地嘅拖羅同埋「瀨戶內海」嘅白身魚都好出色
味噌蟹甲羅燒 👍👍👍👍👍
呢個係餐廳嘅靈魂菜式！將蟹膏、味噌同埋鵪鶉蛋撈勻，放喺細火上面燒，嗰種鹹香鮮味，用嚟送酒或者搽喺法包上面，真係邪惡到一個點！上檯嗰陣仲會見到個蟹蓋下面有火光，必選之美食
炭火燒魚👍👍👍👍
燒得剛剛好，正所謂魚有魚味，而且燒完上枱個造型非常得體
炭燒帆立貝👍👍👍👍👍
炭燒魷魚👍👍👍👍
呢個其實可以當係小食，魷魚Q彈可口，食得出非常新鮮
燒完出嚟都覺得肥美，可想而之有幾大隻，燒得剛剛好，唔會過熟
炭燒生蠔👍
呢個就比較失望啲因為啲蠔實在太細隻，但係仍然係鮮味嘅
炭燒海蝦👍👍👍👍
爽口彈牙又鮮味，燒得剛好唔會柴，又夠大隻
將啲食物一齊影張大合照都幾壯觀
食飽飽又可以喺附近行下商店街幫助消化
第5日嘅行程又完結了，明天就繼續第6日嘅行程，首先出發去 ～
【日本四國】搭大船衝入世界最大的「鳴門漩渦」、「津田の松原服務區 (上行)」睇絕景
記得留意哦！也謝謝您的觀看❤️
發佈留言