【四國】瀨戶內海浪漫之旅：揸埋架車搭船去「小豆島 ~ 天使之路、戀人的聖地 • 承諾之丘」

「小豆島」上的「天使之路」與「戀人的聖地 • 承諾之丘」，的確是欣賞「瀨戶內海」美景嘅好地方，雙腳踩入退潮沙洲嘅夢幻感，再喺「承諾之丘展望台」上敲響「幸福之鐘」，每一刻都係滿滿嘅浪漫同回憶，尤其同情人一齊去，手牽手在沙洲漫步，場景似十足the way we were.....

（本篇亦會講述自駕隨車登船的詳情）

全文內容

旅程嘅第5日又開始了，旅途中嘅時間總是過得飛快，今日依然有好天氣，而且溫度都有成30度，10月份嘅「四國」，空氣仍是十分悶熱🥵，對怕熱嘅我嚟講，真係一大考驗💪，但怕熱都要面對😓，於是今日一大早就準備出發去～

小豆島

下圖係第5日嘅行程安排

去「小豆島」的交通，就係搭船過去，航線嘅地點有以下幾處：

「小豆島」航線

①▶️「高松港」⇄「小豆島土庄」（普通船）
②▶️「高松港」⇄「小豆島土庄」（高速船）
③▶️「姫路港」⇄「小豆島福田港」
④▶️「岡山港」⇄「小豆島土庄港」
⑤▶️「高松港」⇄「小豆島池田港」
⑥▶️「高松東港」⇄「小豆島坂手港」
⑦▶️「神戸三宮渡輪碼頭」⇄「小豆島坂手港」
⑧▶️「宇野港」⇄「豐島」⇄「小豆島土庄港」

所有開往小豆島的航線與班次👇：

我哋喺「高松」，當然由呢度出發，今次去「小豆島」，我哋係連埋架車一齊搭船過去，所以就選擇航班較多嘅 👇～

『高松港 ⇄ 土庄港（小豆島渡輪）』（有 15 個往返班次）

連車上船地點👉MAPCODE：

60 666 065 *45

乘客收費如下👇：

船票收費	（高速船）¥	（普通船）¥
大人（高中初中）	單程1400 來回2660	單程700 來回1330
兒童（小學）	單程700 來回1340	單程350 來回670
小學以下兒童免費入場	（每位成人限帶一名兒童）	車輛渡輪費用包含一名司機

團體票價錢如下👇：

團體（15人或以上）	團體折扣（高速船）	團體折扣（普通船）
成人	￥1,260（10%off）	¥630（10%off）
大・高・中学生	￥1,260（10%off）	¥490（30%off）
兒童（小學及以下）	¥630（10%off）	¥320（10%off）

『高松港 ⇄ 土庄港』👇：

出發都有兩種船選擇，分別係

高速船（只可載人，不可以載車）航程時間35分鐘
普通船（可以載車）航程時間60分鐘

（兩種船上船嘅地方係不一樣，大家可以睇以下Google Maps所有航線的上船地點）

普通船載車輛之收費👇：

購票與乘船須知：

①▶️自駕隨車登船：若需連同租賃汽車一起上船，強烈建議提早線上預約車位（通常於出發日前 2 個月開放預約）。乘船當天須提早 30-40 分鐘攜帶「汽車行照」到車輛專用窗口開票與排隊開車上船
②▶️自駕隨車登船：最多可提前兩個月預訂
③▶️自駕隨車登船：最晚可在出發前四小時預訂
④▶️自駕隨車登船：預約連結👈
⑤▶️預訂只能在線上進行
⑥▶️預訂採取先到先得的方式
⑦▶️優惠票券：若持有香川 Mini Rail 與 Ferry Pass 或相關數位通票，可直接在指定窗口兌換船票登船

我哋由昨晚入住嘅「KOKO HOTEL 高松」開車行駛1.8公里約6分鐘就可以到達碼頭，呢段路不需要公路費用

去到碼頭會有工作人員逐架車問去邊個島嶼，因為「直島、男木島」......等都係呢度上船（唔識講唔緊要，Show Google Map畀佢睇就得），然後根據工作人員嘅指引，喺適當嘅位置停車等候排隊上船，之後就可以去票務中心俾錢攞船票

我哋到嘅時間算早，（其實我哋都係跟足指引早到30分鐘），仲未有太多車排隊

但去完票務中心出嚟，就見到延綿不斷嘅車龍

票務中心入面同樣都迫滿人，因為今日星期六，係日本假期三連休嘅第一日😔

今年適逢每三年舉行一次嘅『瀨戶內國際藝術祭』，「小豆島」作為會場中面積最大嘅島嶼，係活動核心之一，所以難怪會咁多人

就算唔識日文都冇問題，因為仍有漢字體，好易搵到對應窗口買票

係咪非常清晰呢？仲有工作人員攞住個牌，點都會睇到

我哋早兩個月之前已經喺網上book定票，當日去畀錢攞船飛就可以了，（記得一定要帶埋車輛證明，租車嘅話一定會有，架車按長度收費，佢要睇下你架車嘅長度係咪同你Book嘅一樣）

終於可以上船了，工作人員會指示泊車嘅位置，（日本人好嚴謹㗎，好多時候人多嘅地方，都會有專人指定你要泊邊個位）

一艘船可以載四至五行車，每行約十架車左右

記得攞齊所需嘅用品落車，同鎖車門，因為開船期間，停放車輛呢層係唔會開放

跟住就可以行樓梯上二樓搵位坐

亦有升降機，方便行動不便人士

船艙都幾大㗎，座位又闊落

船頭仲有女性專用坐位區

有少少似以前細個搭渡輪去「大嶼山」嘅感覺，不過以前啲船嘅坐位冇呢度咁靚

一路逐浪前行，搭（普通船）大概60分鐘就會到「小豆島」，「高松」距離「小豆島」有22 公里

我家大頭🐼大壯🐼，都一齊坐船過去「小豆島」

不過呢兩位小朋友，冇畀錢就佔用座位喎😅

除咗座椅另外亦有（瞓臥區），瞓喺度攤下腰骨都幾好，成個鐘頭船，瞓一陣都仲得😴

另外亦有餐飲、小賣court

不過得一個人，煮麵係佢、收錢係佢、賣嘢亦係佢，我見佢開船頭40分鐘都未得閒過🫣

我哋今次坐嘅船係（橄欖小島君）為主題，佢係「小豆島」嘅吉祥物

另外仲有2款主題，包括：

『呆呆獸』主題
動漫『擅長捉弄人的高木同學』主題

跟住我哋就上甲板睇下風景

企喺甲板吹住海風、睇住「瀨戶內海」嘅藍天白雲，真係幾好 Feel

仲有散落喺海上面嘅一個個小島，令風景更不單一

船駛過時濺起嘅白色浪花，真係有70年代文藝片嘅感覺

喺船尾向後望，已經離開上船嘅地點頗遠

甲板上極具標誌性的；紅色潛望鏡造型煙囪裝置

鮮紅色的巨大煙囪，外型類似一具雙目潛望鏡（或常被旅客戲稱為雙筒望遠鏡、紅色機器人）

海風嘅威力都唔細

你睇我家主子，擺造型時都不忘要撳住頂帽🤣

喺架船不停咁影下相，其實一個鐘好快就過

差不多到達目的地，要準備落下層上車

到岸前會有鐘聲提醒旅客，落番去底層攞車，排頭位進船，而家就變咗最尾出

工作人員會指示邊架車行先，聽從指揮就可以了

去到「小豆島」我哋第一個景點就係～

✨ 超夢幻嘅

天使之路

（Angel Road）

可以將車停喺 ~

エンジェルロード有料駐車場

MAPCODE：

364 817 147 *77

景點資訊

地址：〒761-4106 香川県小豆郡土庄町甲24-92

電話： 0879-62-2801

🔻開放時間：
▶️全天開放（但沙灘通道僅在每日兩次退潮時段才會浮現，建議事先查詢潮汐時刻表）

門票收費：免費

🔻停車收費：
▶️可停車在「エンジェルロード有料駐車場」（Angel Road Yuryo Parking Lot）
▶️08:00-18:00頭鐘30分鐘300円，之後每30分鐘100円
▶️18:00-07:59免費

🔻公共交通：
▶️可以在碼頭嘅観光案內中心購買「一日乘車券」（1,600円）
▶️在「土庄港巴士總站」（土庄港ターミナル），乘搭《小豆島橄欖巴士》的《西浦線》或《田之浦映画村線》，到「國際飯店（天使步道前）站」（国際ホテル・エンジェルロード前）落車就可以到達，車程約10分鐘

由碼頭開車行駛3.5公里約7分鐘就可以到達，呢段路不需要公路費