「新宿御苑」可以話係「東京」市中心嘅綠洲，4月天更變身成粉紅仙境，園區佔地58.3公頃，一共種植咗65種、差不多1,000棵櫻花樹💮，俾唔算貴嘅入場費，就可以睇到以前『皇室御花園』，物超所值.....

喺「根津神社」欣賞完杜鵑花之後，跟住嘅行程都係賞花，原本係想去「千鳥之淵櫻花道」睇櫻花，但係今日唔知發生咩事，原本幾個近嘅停車場都封閉，普通街泊位又全泊滿車，可以泊到車嘅停車場又超級遠，所以唯有放棄呢個景點😭，下圖係喺車上路過時影的，所以自駕有時候都唔係完全方便😓，尤其係「東京」呢啲泊車超級麻煩嘅地方

雖然泊車麻煩，但有架車揸住，就條條大路通羅馬，所以我哋就改咗去以下呢個地方賞櫻～

新宿御苑

可以將車停泊喺：

新宿御苑大木戸駐車場

Times Shinjuku Gyoen Okido parking

✅MAPCODE：

📍 671 032 *71

景點資訊

地址：東京都新宿區內藤町11號160-0014

電話：81-3-3350-0151

👇營業時間：
🔽10月1日至3月14日
➤09:00-16:30（最後入場時間16:00）
🔽3月15日至6月30日、8月21日至9月30日
➤09:00-18:00（最後入場時間17:30）
🔽7月1日至8月20日
➤09:00～19:00（最後入場時間18:30）
🌟「新宿御苑」為避免賞花人潮過度擁擠，在櫻花季的周六、日需要先於網路預約才能入園

🔽門票收費：
➤一般入場費：500日元*可以使用交通IC卡在入口處付款*
➤（30人以上團體優惠：400日圓 ※無需提前申請）
➤65歲以上：250日圓 ※須在櫃檯出示年齡證明
➤學生（高中生以上）：250日圓 ※須在櫃檯出示學生證
➤兒童（國中生以下）：免費

🔽停車收費：
➤停車場位於「大木戶門」旁，🔔「新宿門」和「千馱谷門」沒有停車場
➤（新宿御苑遊客停車優惠） 120分鐘前600日元，之後每30分鐘200日元，全天最高費用（截至當天午夜）2,900 日元，進入「新宿御苑」時，請於「大木戶門」出示停車票，並支付「新宿御苑」入場費
👇公共交通：
🔽前往「新宿門」入口
➤乘坐火車《JR、京王、小田急線》到「新宿站南口」落車步行10分鐘可到達
➤乘坐火車《東京地鐵副都心線》到「新宿三丁目站E-5出口」落車步行5分鐘可到達
➤乘坐火車《西武新宿線》到「西武新宿站」落車步行15分鐘可到達
➤乘坐火車《東京地鐵丸之內線》到「新宿御苑前站1號出口」落車步行5分鐘可到達
➤乘坐火車《都營地鐵新宿線》到「新宿三丁目站C1/C5出口」落車步行5分鐘可到達
➤乘坐《都營巴士品名97》（品川車庫～新宿站西口）於「新宿三丁目站」落車步行5分鐘可到達
➤乘坐《都營巴士池867》（池袋站東口～澀谷站東口）於「新宿四丁目站」落車步行8分鐘可到達
➤乘坐《都營巴士早77》（早稻田～新宿站西口）於「新宿伊勢丹站」落車步行7分鐘可到達
🔽前往「大木戶門」入口
➤乘坐火車《東京地鐵丸之內線》到「新宿御苑前站2號出口」落車步行5分鐘可到達
➤乘坐《都營巴士品名97》（品川車庫～新宿站西口）於「新宿一丁目站」落車步行7分鐘可到達
➤乘坐《都營巴士Early81》（早稻田大學正門～澀穀站東口）於「四谷四丁目站」落車步行6分鐘可到達
🔽前往「千駄谷門」入口
➤乘坐火車《JR總武線》到「千馱谷站」落車步行5分鐘可到達
➤乘坐火車《都營地鐵大江戶線》到「國家體育場站A5出口」落車步行5分鐘可到達
➤乘坐《都營巴士黑色77》（目黑站～千馱谷站）於「千馱谷站前」落車步行4分鐘可到達
➤乘坐《都營巴士Early81》（早稻田大學正門～澀穀站東口）於「千馱谷站前」落車步行4分鐘可到達
➤乘坐《八公巴士》（神宮森林路線）於「千馱谷站前」落車步行4分鐘可到達

「新宿御苑」有三處入口可以入園，分別係「新宿門」、「大木戶門」、「千駄谷門」三個入口，如果揸車嘅旅客就一定喺「大木戶門」進入，因為得呢邊有停車場

「新宿御苑」佔地58.3公頃，相當於13座「東京巨蛋」咁大，要行曬全個園區其實都會幾攰😥

原本泊好車就諗住去「新宿御苑」斜對面嘅餐廳食午餐

Café La Boheme 新宿御苑

カフェラ・ボエム新宿御苑

營業時間：

星期一至日11:30–23:30

呢間餐廳係動畫電影《你的名字》男主角打工嘅餐廳，近乎百分之百還原真實存在啊！

我都係上幾次旅行搵資料去「飛驒古川」，睇過呢套動畫，幾好睇㗎😍，不過可惜餐廳太多人等位，裏面等候區嘅座位已經坐滿，要企喺門口等位，所以我哋就喺附近隨便食個炒麵就算數，食飽飽先有energy行去睇櫻花

圖片出自：boheme.jp/shinjuku-gyoen

喺「大木戶門」入口前，仲有指示牌，教你點行返去搭車

下圖就係「大木戶門」，不過如果唔係揸車嘅人，多數都會由「新宿門」入口進入園區

進入園區係要收費嘅，另外亦都有列明一啲規則，告示遊客要注意

「大木戶門」入口相對冇咁多人，未去到人山人海嘅景況

買好票之後，就可以開始去睇櫻花喇🎉

進入園區之後，會見到有一個地圖架，裏面有日文、中文、英文、韓文.....等翻譯嘅地圖

『江戶時代』嘅「新宿御苑」原本係德川家康愛將內藤成嘅宅邸（戰略要地嚟㗎！）

後來『明治政府』攞嚟做農業試驗場，1906年直接做咗『皇室御花園』，當時平民禁足㗎！直到1949年先開放畀大家入去參觀

一路行首先見到呢座係～

新宿御苑大溫室

裏面有好多亞熱帶地區嘅花卉，植物種類亦非常多，包括有蘭花、睡蓮、非洲菫、扶桑花、火鶴花.....等

行冇幾耐已經見到櫻花樹喇💮，純白色嘅櫻花，淡雅感十足

我哋4月9日嚟到，正好趕上染井吉野櫻、一葉櫻和關山櫻盛開嘅時期。園區內最常見嘅染井吉野櫻在3月底至4月初綻放，所以4月初嚟真係剛剛好

跟住經過嘅係～

Shinjuku Gyoen Museum

新宿御苑ミュージアム

呢個博物館於2022年開放，透過音頻和視頻，用簡單易明嘅方式令遊客了解，「新宿御苑」嘅歷史同文化

喺博物館後面就係～

玉藻池Tamamo Pond

這個池塘係用「玉川運河」剩餘水建造的

我哋跟住一路行，就繼續一路賞櫻

「新宿御苑」融合咗三種不同風格嘅庭園展示植物，分別有『日式庭園、『法式庭園』、『英式庭園』，一次過就可以睇曬咁多種風格嘅庭園

園區最厲害嘅係擁有約65種、超過1,000株嘅櫻花，賞花季節比一般場所更持久，從2月嘅冬櫻開始，到4月下旬嘅鬱金櫻都有得睇

二戰時呢度幾乎被炸到似廢墟，重建後變身國民公園，而家歸環境省管理

**500日元就入到皇室級庭園**

都算超值

我家大壯🐼、大頭🐼都要影張打卡相😆

一路賞櫻一路行，好快就嚟到 ~

英式庭園

櫻花嘅品種真係太多，其實我都唔知呢啲係乜嘢種類嘅櫻花，網上睇過相片對比，似係一葉櫻💮、染井吉野櫻💮

呢張相有名堂㗎，叫『櫻花樹上的小鳥』😆

呢度可以坐喺草坪野餐，一家大細或文青就最啱，不過就絕對唔可以飲酒同玩波

園區嘅櫻花分佈得好廣，特別係在日本庭園、風景式庭園和整形式庭園，這些區域擁有最密集的櫻花樹。漫步其中，隨處可見壯麗嘅花海，無論係影相定係賞花都一流💯

「新宿御苑」都有電影嘅打卡位，好似2013 年新海誠嘅動漫電影《言葉之庭》就有好多名場面

英式庭園加長木椅都算經典

跟住見到嘅就係**本普賢象櫻**

因為外形較特別，所以上網查好快就確認了

喺超闊草坪鋪張野餐墊，食住美食，望住摩天大樓同櫻花同框，可能只有「東京」先至會有嘅景象

四周被高樓大廈環繞，真係一片名副其實嘅「都市綠洲」

呢幾棵櫻花樹真係超級靚同大

由於「新宿御苑」種植了多種類型的櫻花樹，幾乎囊括了全日本的櫻花品種，所以可以睇到不同深淺嘅粉紅色，由淡粉到緋紅，層次豐富，好似大自然嘅調色板一樣

繼續行就見到另一種類嘅櫻花，如果冇睇錯應該係**關山櫻**

櫻花盛放得如同抹上微紅嘅胭脂，如同青春少女一般嬌艷

呢棵粉白色嘅櫻花非常壯觀，人泊埋去就顯得相當嬌小

係呢個位置攞對自製嘅熊貓出嚟，有日本姨姨、姐姐話kawaii，被人稱讚自己嘅製成品漂亮，我自己都有滿滿嘅成就咁😅

「新宿御苑」嘅櫻花真係隨便影都咁靘

下圖呢個牌大致上係講述：

【櫻花在日本文化中一直扮演著重要而重要的角色，這點在公元8世紀的《萬葉集》和《古事記》中有所體現，在平安時代（794-1185）更是尤為突出。 19世紀，新的園藝技術催生了數百種觀賞櫻花品種，而如今最受歡迎的品種——染井吉野櫻，據說就是在這段時期培育出來的。日本以櫻花聞名，而「新宿御苑」則擁有種類繁多的櫻花樹，擁有悠久的賞花歷史】