「根津神社」嘅『杜鵑宛』，每年4月都有100種約3000株燦爛嘅杜鵑花盛開🌷，另外神社仲保留咗7棟國寶級江戶建築，非常值得觀看，同一地點嘅「乙女稻荷神社~迷你千本鳥居」⛩️，一排排小巧精緻紅色鳥局，就在『杜鵑宛』旁邊，同樣非常吸睛😍.....
行程嘅第二日，非常幸運，依然係陽光普照嘅一天，今日我哋仍舊繼續留喺「東京」玩，首先第一個出發嘅景點就係 ～
根津神社
地址：東京都文京區根津 1-28-9
電話：03-3822-0753
開放時間：05:30-18:00
🔽門票收費：免費
➤每年4月1至30日參觀『杜鵑苑』費用500円（平時免費）
🔽停車收費：
➤寺內設有參拜、祈願、婚禮等免費停車場（車位數量有限）
➤ 北入口處設有收費停車場，在繳費機領取使用憑證，之後入去神社嘅『授与所』換取停車優惠券
🔽公共交通：
➤《東京Metro千代田線》到「根津站」或「千駄木站」步行5分鐘可到達
➤《東京Metro南北線》到「東大前站」步行5分鐘可到達
➤《東營三田線》到「白山站」步行10分鐘可到達
我哋將車泊喺：
✅北口收費停車場
📍MAPCODE：
📍796 079 *30
喺「東京」我哋都係自駕，神社傍邊就有收費停車場，神社內亦設有For參拜、祈願、婚禮等使用嘅停車場（要從北口進入），但可停泊之車位唔多
我哋就將車泊喺收費停車場呢邊，比較方便
泊好車記得喺現場嘅繳費機領取使用憑證，之後入去神社嘅『授与所』換取停車優惠券
因為停車場喺西口同北口呢邊，亦即係神社嘅後面，所以今次參觀神社同「淺草寺」一樣，由後面行返去最前面
我哋由西口進入神社，首先見到嘅係 ～
駒込稲荷神社
佔地23,000平方米嘅「根津神社」，境內仲有其他兩個神社，包括「駒込稲荷神社」、「乙女稻荷神社」
跟住再向前行就見到「跟津神社」嘅 ~
透塀（重要文化財產）
『透塀』環繞著「跟津神社」，可以透過『透塀』嘅菱形窗戶睇到神社裡面，有300年歷史嘅『透塀』長200公尺，最近有調查顯示，『透塀』嘅地基位於地下8公尺深處，可以話係非常牢固
差不多行到去「乙女稻荷神社」前，就見到一堆石頭遺跡 ～
庚申塔
據資料話江戶時代，民間盛行一種信仰，就係每逢（庚申日）夜晚，所有人都會聚集一齊，徹夜不眠，於是就係十字路口豎立起塔樓。道路拓寬後，呢啲塔樓就被移至「根津神社」
其實嚟「根津神社」，今次最主要係睇杜鵑花，但係「根津神社」境內嘅「乙女稻荷神社」，有迷你『千本鳥居』，亦是嚟「根津神社」不可錯過必睇之景色
通往「乙女稻荷神社」參道兩旁，排列著多座迷你鳥居
如果你有六呎多身高，就可能要低頭先至可以行過😅
「乙女稻荷神社」就喺「根津神社」嘅『杜鵑苑』旁邊
要睇到神社嘅全貌，就要從另一角度先至可以見到
 |
| 圖片出自：nedujinja.or.jp |
由神社再向前行就見到以下呢個 ~
德川家宣公胞衣塚
呢度係德川綱重宅邸嘅舊址，綱重嘅兒子綱豐（第六代將軍『家宣』）就出生在這裡。呢度亦係德川家宣胎盤嘅安置處
跟住見到一整排迷你版『千本鳥居』，一路延伸至『杜鵑苑』出入口
實在忍唔住手，要同我家大頭🐼大壯🐼影返張相
因為神社唔算多外國遊客，可以影得比較自在啲，唔似喺「淺草寺」咁多人，只可以影到人頭湧湧😅
呢度雖然冇「京都~伏見稻荷神社」嘅鳥居咁壯觀，但迷你版嘅鳥居，亦係呢度嘅一大特色
參觀完『千本鳥居』就會見到『杜鵑苑』嘅出入口
參觀『杜鵑苑』係需要另外俾入場費
開放日期：每年4月1至30日
開放時間：09:30-17:30
參觀杜鵑苑費用500円（平時免費）
「根津神社」從1970年開始舉辦【文京杜鵑花節】（文京つつじまつり），神社內嘅『杜鵑苑』會於每年4月有3000株杜鵑花盛開
杜鵑花冚到密麻麻，啲花一球球好似巨型雪糕咁堆疊
不過我哋4月9號嚟，啲花仲未開齊
萬綠從中會有幾處紅色、紫色、粉色嘅花若隱若現
嚟呢度參觀，選擇四月嘅中、下旬會比較多花盛開
到時七彩繽紛一定會靚好多
呢度嘅杜鵑花差唔多有100個品種
『杜鵑苑』呢度就有 ～
久留米杜鵑：細細朵但顏色鮮豔到爆，如少女嘅青春般耀眼
江戶錦：粉白花瓣交錯，如少女臉龐般美好
紫鶴：神秘深紫，就如同貴氣逼人嘅貴婦
下圖見到嘅係 ～
弥生正緑館（文化廳登記有形文化財產）
一座西式嘅建築，於1897年左右建造的
一樓係西式房間，天花板好高，而二樓就係純日式風格，設有壁龕，據說係當時流行嘅日式與西式融合之建築
（目前不對外開放💢）
其實呢個『杜鵑苑』都唔算細地方，加上佢好似一個小山丘咁擺放杜鵑
喺啲斜坡、樓梯走上走落，我哋都用咗唔少時間喺呢度影相
可能而家仲係4月頭，啲花開得未算茂盛，所以唔係有太多人參觀，不過如果到4月中、下旬過嚟參觀嘅話，可能就會人山人海
係時候又見下我家大壯🐼大頭🐼喇
行到比較入面，啲花就開得比較茂盛
起碼睇到係有深粉紅色
呢邊見到嘅，就更明顯有深粉紅色、紫色
驟眼睇似唔似一個個圓形嘅波波草✳️
果然真係越靠後嘅地方，花就開得越燦爛
行埋落呢條樓梯，就差唔多全部參觀完
喺呢度亦見到剛剛行經嘅「乙女稻荷神社~千本鳥居」
難得冇咩人喺度影相，又再幫我家大壯🐼影張寫真先
當然唔少得大頭🐼啦
『杜鵑苑』參觀完之後，當然要繼續參觀埋「根津神社』，神社保留咗7棟國寶級嘅江戶建築⛩️，非常值得參觀
最後畀啲喺『杜鵑苑』影嘅花寫真大家睇下🌷
由『杜鵑苑』出嚟之後，再向前行就見到『神橋』
穿過『神橋』繼續向前走，就會見到「根津神社」嘅『正門』，而我哋就繼續行去「根津神社」
「根津神社」傳說係1900年前由神話英雄日本武尊創建，後來江戶幕府第五代將軍德川綱吉喺1706年大改建，將神社搬到而家位置，嗰陣仲移植咗成片（霧島杜鵑），經時代變遷就成為而家嘅『杜鵑苑』
下圖見到嘅係 ～
樓門（重要文化財產）
『樓門』係江戶唯一現存的神社門
跟住見到嘅係 ～
舞殿
據知呢度將被指定為（文京區無形文化財產）
神社嘅手水舍
跟住見到嘅係 ～
唐門（重要文化財產）
由『唐門』行入嚟之後就見到 ~
拜殿（重要文化財產）
『拜殿』嘅斜對面就係 ~
西門（重要文化財產）
不過我哋嗰日去就見到封咗，可能要保養維修
『拜殿』隔離就係『授与所』，而喺前面嘅櫻花樹開得十分燦爛
今次嚟到「東京」幾乎每個景點都見到櫻花
明天我哋就出發去「河口湖」，今次好幸運，天氣好又加上連續3日都見到「富士山」🎉
發佈留言