今次同大家分享「東京」必去嘅「淺草寺」同「隅田公園」櫻花祭，講起「東京」最古老寺廟，點少得「淺草寺」？呢度嘅「雷門」大燈籠同埋櫻花開滿嘅「隅田公園」，真係遊客必到嘅景點.....
今日第一日喺「成田機場」落機，就直奔「淺草」，在酒店安置好行李後（上一篇已介紹過入住之酒店），就出發去酒店附近嘅 ~
淺草寺
地址：〒111-0032東京都台東區淺草2-3-1
電話：81 03-3842-0181
⭐（電話諮詢時間為上午9:00至下午4:30，週日及假日除外）
🔽開放時間：
➤本館開放時間為06:00-17:00
⭐（10月至3月開放時間為上午6:30）
🔽停車場資訊：
⭐※淺草寺沒有停車場
👇可以使用以下收費停車場：
➤雷門地下駐車場 入口
➤MAPCODE: 740 747 *40
🔽公共交通：
➤《東武晴空塔線》到「淺草站」步行5分鐘可到達
➤《東京地鐵銀座線》到「淺草站」步行5分鐘可到達
➤《筑波快線》到「淺草站」步行5分鐘可到達
➤《都營地鐵淺草線》到「淺草站」A4出口步行5分鐘
我哋由酒店行經 ~
淺草HISAGO路商店街（浅草ひさご通り）
呢條商店街位於「淺草寺」西北，以日式拱廊為特色，它以『江戶街』為主題重新設計，裡面嘅「江戶下町傳統工藝館」亦很受遊客歡迎
之後沿路亦會經過 ～
淺草花屋敷商店街（花やしき通り）
呢條商店街喺2008年，完成咗景觀整修，將其外觀與『江戶城下町』嘅美學風格統一起來，沿路行到尾就係遊樂場「花屋敷」
商店街裡面有幾間食肆，包括日式燒肉餐廳
浅草焼肉 もん
下圖係演藝劇場
浅草花劇場
呢邊見到有小食快餐凍飲店 ~
下町ばなな
呢間賣漢堡包嘅食肆，門面真係非常懷舊feel，充滿濃濃嘅江戶風情 ~
ドムドムハンバーガー 浅草花やしき店
街角位置就已經見到 ~
淺草花屋敷 （浅草花やしき）
帶小朋友嘅話，可以去一趟日本超古老嘅遊樂園 「淺草花屋敷」
（喺門口見到有熊貓公仔，我至愛😍）
樂園於1853年開業，但後來被拆毀，於1947年又再重建，（都夠曬古老），新裝修後加咗AR捉妖怪、四季投影『NAKED花景色』，仲有復古鬼屋『江戶的試膽』，同埋必坐熊貓造型過山車
票價及營業時間可瀏覽以下網址👇
喺遊樂園嘅十字路口轉右直行，就會到達 ～
淺草西參道商店街
呢條商店街有「淺草」必食嘅名物菠蘿包
淺草 花月堂 本店
營業時間：
星期一至日09:00–16:30
同香港嘅菠蘿包外形都有啲分別
我哋order咗兩個，一個加雪糕，熱辣辣嘅菠蘿包，加冰凍嘅雪糕口感非常唔錯
另一款我哋點咗鮮奶油加朱古力醬，Ah.....🙄太甜×100，其實我都係覺得，香港茶餐廳嘅菠蘿油仲好味😅
跟住我哋就行去喺旁邊嘅「淺草寺」觀光
🌟因為酒店地理位置嘅原因，我哋就由「淺草寺本堂(観音堂)」開始行返去「正門（雷門）」
（下圖就係我哋步行嘅方向）
我哋沿著『淡島堂、藥師堂』行去『本堂(観音堂)』，不過如果你係一心參拜嘅話，就最好由『正門』開始行，咁樣形式上會比較誠心、虔誠啲😅
沿路都見到唔少攤檔販賣小食
呢邊更見到「淺草寺 ~五重塔」
呢座色彩鮮豔嘅「五重塔」，係一座由用鋼架、鋼筋、混凝土構成嘅建築，重建於1973年
據資料講最初建成嘅時間係 ~ 『天慶5年（942年）』
從外觀上睇，整座塔似係矗立於地面上，但實際上它矗立喺一個類似塔院嘅結構上
再向前行就見到「東京」地標之一 ~「晴空塔」
沿路都見到有櫻花樹
櫻花加「晴空塔」就係咁容易影到😘
跟住見到嘅係 ～
浅草寺 めぐみ地蔵尊
向左邊望又見到「五重塔」同「寶藏門」
喺「淺草寺」周圍都好容易見到「五重塔」，喺繪畫嘅作品中，「五重塔」係「淺草」同「淺草寺」不可或缺嘅題材，亦係呢個地區嘅地標建築
好快就行到嚟 ～
淺草寺 本堂(觀音堂)
「淺草寺」嘅『本堂』又稱『觀音堂』，因寺內嘅本尊觀世音菩薩而得名
「淺草寺」點嚟？話說喺西元628年，有對漁夫兄弟喺「隅田川」捕魚，竟然撈到尊觀音像！當地人當係神蹟，就起寺供奉，仲成為「東京」最古老嘅寺廟
原來嘅『本堂』被指定為國寶，但喺1945年空襲中被毀。不過，在全國信徒嘅募款下，而家嘅『本堂」於1958年重建。最初『本堂』嘅建造，可追溯至『推古天皇36年（628年）』
而家嘅『本堂』係仿照舊『慶庵本堂』嘅面貌，以鋼筋混凝土重建而成，天花板嘅繪畫，都非常值得大家欣賞
真係非常多人參拜㗎
喺『觀音堂』向後望，就見到「淺草寺~寶藏門 (仁王門)」
行到去 ~
『寶藏門 (仁王門)』
呢邊見到更近距離嘅『五重塔』
佛塔最頂層（即第五層）供奉著神聖嘅佛舍利 ，係1966年3月18日從「斯里蘭卡~伊蘇魯穆尼亞寺」運過嚟「日本」
跟住見到嘅係『水亭（大水屋） 』、『枝香所 』
『寶藏門 (仁王門)』嘅塔門一層長五間，左右兩間供奉『仁王像』，中間三間則為通道
『寶藏門 (仁王門)』嘅大草鞋『 Owaraji』，係由「山形縣~村山市」志工於2018年10月捐贈的（自1941年首次捐贈以來，已捐贈了八次）。 草鞋象徵著『仁王』嘅力量，據說惡靈會被嚇跑，並會諗：『著咁大草鞋嘅人，喺度守護呢座寺廟嗎？』
『大草鞋』高4.5米，寬1.5米，重500公斤，由2500公斤稻草製成
穿過『寶藏門 (仁王門)』之後，就係
仲見世商店街
「仲見世」係通往「淺草寺」嘅主要參道
從『雷門』到『寶藏門』約有250米長，朱漆店鋪林立於參道兩側，係日本最古老嘅商店街之一，總係人聲鼎沸，超級多遊客
成條街有百幾間店舖，售賣嘅商品種類五花八門，從紀念明信片、傳統工藝品到在地甜點等，琳琅滿目到令人目不暇給，係購買「東京」紀念品最適合嘅地方
商店街上開滿櫻花，與特色嘅燈籠配合喺一齊，充滿濃濃嘅日本色彩
講開櫻花，預告下一站我哋都會去「隅田公園」睇櫻花😍
又再講返商店街，呢度有好多舖頭都係賣（煎餅、人形燒）
每隔幾間舖頭，就會見到有一間總係賣煎餅、人形燒
另外亦有好多店舖售賣糰子
呢度比較多人購買嘅紀念品，有江戶風鈴、招財貓、燈籠.....等
跟住我哋就走轉入~
傳法院通（伝法院通）
「傳法院通」與「淺草寺、仲見世通商店街」緊鄰，係「淺草」必行嘅商店街之一
轉入嚟呢條街最重要就係食 ～
淺草炸肉餅
營業時間：
10:00–19:00 (周一至周日)
都幾多人排隊㗎
炸肉餅350日元1個，攞上手非常滾燙熱辣
炸肉餅以「神奈川縣」百選嘅名物『高座豚肉』，混合『黑毛和牛』製成，『高座豚肉』被稱為『幻影豬肉』。肉餅外層酥脆肉質偏軟，充滿洋蔥鮮甜且會爆湯汁，非常好味，不過可能係有『黑毛和牛』嘅原因，食到最後有啲肥膩感
買完後旁邊就係內用區，大家記得喺呢度享用肉餅，千祈唔好邊行邊食。在日本邊行邊吃係會令人討厭，大家記得入鄉隨俗哦
跟住就行返入「仲見細商店街」，再向前行冇幾耐，就見到另一條商店街 ~
淺草 新仲見細商店街
終於行到嚟 ~
「淺草寺 ~ 正門（雷門）」
正式嚟講，『雷門』叫『風雷神門』，右邊見到擺放咗『風神』（管風嘅大神），左邊擺放咗『雷神』（管雷嘅大神）
『風神』同『雷神』係掌管風雨嘅神明，被供奉以抵禦風災和洪水，守護寺院。同時亦祈求風調雨順、五穀豐登
於1960年Panasonic創辦人松下幸之助捐錢重建成個『雷門』同燈籠。行過燈籠記住望下底部，底部雕咗條龍㗎，傳說當年漁夫喺「隅田川」執到觀音像時，就見到龍神金光閃閃，所以龍成為咗「淺草寺」嘅守護神
寫著『雷門』」嘅大紅燈籠。作為「淺草」象徵，『雷門』總係有非常多遊客，大家都要嚟影相留念。
巨無霸紅燈籠成3.9米高、700公斤重，燈籠骨架用晒（京都丹波竹），外面仲貼咗300張和紙，十足十日本傳統工藝嘅傑作
行入去內側仲有兩條龍：金龍（女身）同天龍（男身），傳說話係守護航海同豐收嘅神，夠晒神聖！
寺內必睇仲有：
💡二天門：1618年德川秀忠為紀念老竇家康起嘅，係二戰炸唔爛嘅倖存建築
💡淺草神社：拜緊三位寺廟創始人，係神道教同佛教crossover嘅象徵
參觀完「淺草寺」，我哋就行去 ～
隅田公園賞櫻
走喺街上又見到櫻花，我哋今次嚟「東京」啱時間，可以睇到盛放嘅櫻花
行到入公園嘅範圍，已見到非常多人賞櫻
由「淺草寺~雷門」行嚟「隅田公園」只需4分鐘，呢度係『日本櫻花名所百選』之一，唔使畀入場費就可賞櫻，同睇到「晴空塔」💯
望過去對岸就見到「晴空塔」，而在旁邊金光閃閃嘅係「朝日啤酒大樓Asahi」
下圖呢個金色蝌蚪形狀嘅雕塑，名為「金色火焰」（フラムドール），取自於法語「flamme d'or」一詞，象徵朝日啤酒燃燒的心，其下方的黑色物體則象徵聖火台
呢度仲可以體驗（隅田川遊船），同時亦係呢個季節最熱門嘅活動之一
不過亦有資料話「朝日啤酒樓大樓」本身係啤酒樽，黑色建築係啤酒杯，金色蝌蚪形狀雕塑係啤酒泡，不過據說金色蝌蚪雕塑因建築構造上嘅問題而無法豎立，打橫放後，有人話更似金色大便💩😱
「晴空塔」係一座無線電塔，與「東京鐵塔」同為東京的地標，吸引無數國內外觀光客到訪，「晴空塔」塔高有634公尺，之前係世界第一高塔，但後來被「杜拜」嘅「哈里發塔」（Burj Khalifa）超越，並以828公尺高度為「世界第一高塔」
夜晚推薦大家去「吾妻橋」影相，望住金色「啤酒樽」大樓（朝日啤酒總部）＋發光「晴空塔」，好多經典相都係咁影出嚟
「隅田公園」1公里長嘅河岸兩邊，都種滿晒染井吉野櫻！「淺草區側」有640棵+「墨田區側」（晴空塔嗰面）有350棵
不過開滿櫻花嘅同時，呢度亦擠滿咗人潮
想影一張靚相，都絕非易事
喺指定日期內，天黑後仲有夜櫻可以觀賞
又到咗要幫我家大壯🐼、大頭🐼影寫真時間喇😁
第一日就已經行咗唔少路，食埋個美味晚餐，就要返酒店好好休息，
如果大家無睇過上一篇，介紹酒店、同晚餐嘅話，記得睇番 👇
下一篇就會講第2日嘅行程，首先係 ～
東京 ～ 根津神社（杜鵑花祭）
記得留意哦！也謝謝您的觀看❤️
發佈留言