「東京新宿格蘭貝爾酒店」係一間設計師精品酒店，賣點係有無敵夜景天台Bar，酒店位於「新宿歌舞伎町」，從《都營大江戶線》的「東新宿站」步行4分鐘就可以到達，交通超級方便！酒店附近有齊便利店、超市同各式餐廳，另外行去打卡景點「哥斯拉頭、3D巨貓」都唔算遠、晚餐於「新宿」嘅「磯丸水産歌舞伎町中央店」享用海鮮燒烤，亦係唔錯嘅選擇.....
今日全日都係賞花之旅，喺「根津神社」睇杜鵑花、再去「新宿御苑」睇櫻花，而我哋今晚嘅住宿就換咗喺「新宿 」～
格蘭貝爾酒店 Granbellhotel
✅MAPCODE ：
📍 700 182 *53
地址：160-0021東京新宿歌舞伎町2丁目14-5
電話：81-3-5155-2666
入住時間：15:00 退房時間：11:00
🔽停車收費：每晚2,000日圓（含稅）*需預約
⭐車輛尺寸👇
➤長 5.3m x 寬 1.95m x 高 2.1m 以下 / 1F 停車場
➤長 5.3m x 寬 1.95m x 高 1.55m 以下 / B1F、B2F 停車場
🔽公共交通：
➤從《東京地鐵副都心線》「東新宿站」A1出口步行約4分鐘可到達
➤從《東京地鐵副都心線、丸之內線》「新宿三丁目站」E1出口步行約7分鐘可到達
➤從JR「新大久保站」步行約13分鐘可到達
➤從JR「新宿站東口」步行約15分鐘可到達
➤從《西武新宿線》「西武新宿站」北口步行約10分鐘可到達
酒店有自己嘅停車場，但留意係需要預約，（可以喺訂房時，留訊息就可以了）
酒店屬於4星，坐落係「歌舞伎町」呢個充滿活力嘅區域，附近有齊便利店、超市同各式餐廳，就算夜瞓都不用擔心餓親
酒店係一間設計師酒店，概念係「FUN to STAY」，成間酒店由內到外都充滿藝術感
Reception附近有行李磅，呢啲設施算係貼心嘅服務
酒店由多位國內外創作家參與設計，所以每層甚至每間房都可能有唔同嘅風格，由現代簡約到玩味藝術感都有
等𨋢附近有一整排自動販賣機，咩種類嘅飲品、食品都有
酒店大堂另一邊就係 ～
☕ 咖啡廳：live cafe G
營業時間：7:00-20:00
（最後點餐時間19:30）
呢度提供正宗意式濃縮咖啡、生啤酒或者其他酒精飲品，仲有輕食提供
出面有個花園露台座位，天氣好時坐出去都好寫意
4星級酒店嘅房間係點？而家就同大家一齊睇下，不過就千祈唔好期望過高，因為一出𨋢見到啲裝修都有啲歷史😓
但又未至於去到好殘舊，不過就唔叫得做新淨，尤其地氈都已經褪色
房間樓層都有飲品售賣機，咁多販賣機真係唔驚冇嘢飲
入到房間首先左手邊就有一個小型凹位，可以掛衫同放部分細件行李，另外保險箱亦喺呢個位置
跟住旁邊就係洗手間，好彩唔係鑲嵌式嗰種，即係要行高一級入去，企喺廁所會有輕微晃動嗰款，嗰款我就真係有啲怕怕，成日以為沖涼時候地震🤣
不過身為一間4星級酒店，所提供嘅沐浴用品，居然係包裝，大洗啲都唔夠用，真心覺得有啲差勁👎
跟住就睇下間房，酒店提供好多種房型，而我哋就選擇最平嗰隻~經濟雙人房入住，雖然最平，但係房價都要$HKD1,300幾包早餐，都唔算平，而房間面積只有15平方公尺，所以張床都要貼牆放😥
房間設計比較特別嘅係，天花板與牆身融為一體嘅弧形牆面，上面仲有一幅壁畫，驟眼睇都算特別
雖然房間唔大，但幸好仲有一整排窗可以望到室外，有自然光入房，感覺會比較自在，窗前有張大長枱可以攞放好多雜物，不過整個房間，都係畀人一種陳舊嘅感覺，可能因為房型嘅關係，如果住比較高級嘅房間，環境可能會理想啲
電視擺放都係慳位嘅設計
有樽裝水供應，可以加番少少分數😁
單人梳化隔離個櫃仔，都擺放咗啲用品，例如水煲、杯
仲有咖啡包、茶包
雪櫃就擺放喺另一邊櫃門
想要有私隱嘅，可以落返窗簾，就唔怕畀對面睇到過嚟
不過窗對面都無太高嘅建築物，而且望出去都算開揚，不過始終位處於「歌舞伎町」範圍內，所以由窗望出去，都見到好多『情侶酒店』
睇完間房，我哋就再睇下酒店有啲咩設施：
呢間酒店特別多餐飲嘅設施🍽️
酒店除咗地下嘅咖啡廳，另外仲有兩處餐飲設施 ~
☀️Restaurant G （12F）
營業時間：7:00-10:30
（最後點餐時間10:00）
※呢度只僅供應早餐
費用2,200日圓（含稅）
我哋都有預訂呢間酒店嘅早餐
既然講到早餐，咁我哋就一齊睇下有啲咩早餐食👇
下圖見到嘅係 ~ 日式茄子豆腐、和式扇貝仔沙律、冷麵
跟住見到嘅係 ~ 薯仔焗菜、炸蝦肉雞肉餅、燒賣 、醬油炆雞
呢邊就見到自助早餐經典款式 ~ 炒蛋、香腸、煙肉、炒麵
另外仲有飲品、麵包、日式醃菜、沙律菜、納豆.....等
唔算有特別驚喜嘅早餐，但係就一定食得飽，另外最啱朝早唔想週圍搵餐廳食早餐嘅人😅
另一間餐飲就係設喺13F ～
🍸 天台酒吧：roof top bar & terrace G
營業時間：
星期一至星期六17:00-06:00
（食物最後點餐時間 02:00 / 飲料最後點餐時間 05:30）
週日及假日：14:00～22:30
（餐點最後點餐時間21:30 / 飲品最後點餐時間22:00）
餐廳嘅內部裝潢以『一邊眺望新宿街景，一邊享用飲品』為理念，經過升級改造，打造出一個喺「歌舞伎町」地帶，亦可以感受到寫意嘅空間，坐喺度飲嘢，感受下繁華嘅「歌舞伎町」，真心覺得唔錯💯
除咗餐飲設施，酒店嘅其他設施仲有~
自助洗衣服務（2F）（收費500日元一次）
另外亦有電動滑板車租用
住喺「新宿~歌舞伎町」，當然要出街感受下，呢度繁華嘅氣氛，呢間酒店附近真係超級多『情侶酒店』😜
我哋由酒店行去「新宿車站」嗰邊，沿途都見到有唔少美男子嘅招牌👀
呢間建築外牆咁特別，應該都係以上講及嘅相關設施
步行咗十多分鐘，就嚟到好多人到「新宿」都會嚟打卡嘅 ～
哥斯拉頭部 ゴジラヘッド
呢隻哥斯拉模型頭，坐落喺「新宿東寶大廈」8樓天台，而旁邊就係「格拉斯麗新宿酒店」，呢間酒店本來都係我首選入住嘅，但係可惜4月唔知係咪因為櫻花季，房價貴到嚇親人，差不多要HKD$2000一晚，實在太唔化算，所以最後決定住暫宿較平嘅「格蘭貝爾酒店」
跟住嚟到「新宿」，另一個必定要打卡嘅景點就係 ~
「新宿東口的貓」（新宿東口Xspace 3D看板）
從各線「新宿」站東口步行即達
7:00 - 25:00
「新宿站~東口廣場」前面，經常都會有好多人企定定駐足觀看，立體影像嘅貓貓好似真實一樣，活靈活現得似真一樣存在
自2021年7月推出以來，迅速佔領日本及國外無數媒體嘅版面，亦成為『新宿新地標』，嚟到「新宿」時必要打卡嘅景點，貓3D動畫特集『貓Chanel』於每小時整點、15分、30分、45分，每隔15分鐘播出，要打卡嘅千萬唔好錯過
大城市果然係比較繁華
連過馬路都好繁忙，呢種過馬路方式，就算喺「香港」都唔會有，整個十字路口一齊過馬路，都幾壯觀🤪
大城市嘅旅遊熱門地區，真係人山人海😅
睇完兩大熱門「新宿」地標之後，跟住就開餐，我哋今次幫襯一間連鎖店，淨係「新宿」都有五間分店 ～
磯丸水産歌舞伎町中央店
24小時營業
我哋之前去過「大阪、神戶、姬路、名古屋、福岡」都見到有呢間店舖，不過今次都係第一次幫襯，況且好多人都話唔錯、評價唔低
趁今次係「新宿」近近哋，又得我哋兩個人，可以自由啲選擇食物
其實可以選擇嘅菜式都唔少，首先當然唔少得有刺身
另外燒烤海鮮亦係呢度嘅一大特色
唔同種類嘅魚，有鰻魚、燒魚
另外亦有蟹、拖羅、及一啲小食可選擇
圖中呢碟魚餅同多春魚係送嘅，用嚟燒烤
我哋至愛嘅拖羅刺身，同埋蟹腳壽司
呢個甲羅燒非常受歡迎，幾乎每張枱都點，非常鮮味又唔貴，濃濃嘅海味
再加碟海鮮拼盤用嚟燒烤，海鮮十分新鮮，絕非急凍貨品
呢碟係牛油烤菇，牛油燒開之後，包裹住滑溜嘅菇菇，好味到無法形容
再加碟炸生蠔（因為太好未又再encore多兩隻），蠔味十足，非常新鮮又juicy😋
食飽飽就行去紅燈區見識下 ~
歌舞伎町一番街
我唔敢影太多相呀，驚騷擾到人哋，我只能夠話實在太多俊男、美女喺街上面😜
當然我哋都無行到太夜，因為明天就要離開「東京」，又要早起出發去「河口湖」
所以下一篇就係 ~
【富士山下懷舊之旅】 ~ 「富士吉田懷舊商店街、金鳥居Kanadorii、河口湖大石公園與精進湖」巡禮
記得留意哦！也謝謝您的觀看❤️
發佈留言