4月時份嘅「新倉富士淺間神社」同「新倉山淺間公園」，會舉行櫻花祭，呢個景點絕對係一處令人驚嘆嘅地方！無論係神社嘅歷史氛圍、定係公園壯麗嘅自然景色，都令人留下深刻印象。4月櫻花盛開時，能夠同時欣賞到（富士山、櫻花同忠靈塔）呢個經典組合，真係好似置身於明信片一樣！自駕嘅朋友記得留意埋呢篇可泊車嘅停車場位置.....
4月時份嚟到「山梨縣」，以下呢個地方，應該都係最受歡迎嘅景點之一 ～
新倉富士淺間神社&公園
地址：〒403-0031 山梨県富士吉田市浅間2-4-1
電話：080-8401-0223（櫻花祭期間設有日語對應的諮詢電話）
開放時間：神社與公園均全天開放（夜間照明至特定時間）
門票收費：免費
👇停車場：
🔽1. 新倉山浅間公園第1駐車場（有料）
➤MAPCODE：161 276 580 *06 可停放（普通車88輛）
➤費用1,500日元（每次6小時）
🔽2. 新倉山浅間公園第２駐車場
➤MAPCODE：161 276 135 *15 可停放（普通車38輛）
➤費用1,000日元（每6小時）
🔽3. 新倉山浅間公園第3駐車場
➤MAPCODE：161 276 260 *85 可停放（普通車 35 輛）
➤費用1,000 日元（每次 6 小時）
🔽4.新倉山浅間公園第4駐車場👇
➤MAPCODE：161 245 891 *52
🔔🌟櫻花季期間以上停車場均關閉，如要停車只可以停喺：
➤富士吉田市立下吉田第二小学校
📍MAPCODE：161 245 800*85
🔽公共交通：
➤由從《富士急行線》「下吉田站」步行5分鐘可到達
➤櫻花祭期間《富士急行》會運行臨時列車《櫻滿喫號》」（さくら満喫号），往返於「河口湖」與「下吉田」之間
（P.S. 從「東京」要去「富士山河口湖」的方式，請參考本文尾段）
由「富士吉田懷舊商店街」開車過嚟，只需1.3公里約4分鐘就可以到達，呢段路不需要公路費用
我哋係4月9號嚟到，而神社嘅櫻花季就喺2025年4月1日至4月18日，呢段時間神社同公園嘅停車場都關閉，只可以停車喺 ～
下吉田第二小學校
✅MAPCODE：
📍 161 245 800 *85
停車場呢邊可以見到巨大嘅「富士山」
停車費用喺1,000日元（每次計）
付過停車費之後，停車場嘅工作人員，會送一本關於「富士吉田市」景點、美食嘅刊物畀泊車人士，仲附加送一張經典景色明信片😍
由停車場行去神社，大約要行900公尺，13-15分鐘就可以行到去😥
行經「淺間公園第3駐車場」時，發現傷殘、行動不便人士可以將車泊喺呢邊
之後更可以付費（500日元）乘坐接駁車到神社（只到神社，唔會到公園），不過呢項服務，都係俾行動不便、傷殘人士使用，（我個膝頭哥唔跪得，算唔算行動不便人士🤔）
嚟到神社嘅入口，就已經見到人山人海😨(香港名句people mountain people sea)😆😆
入口附近有非常多攤檔在擺賣，非常有慶典氣氛
跟住我哋就正式出發，行上去神社同公園😑
大部份人4月嚟呢度，都係為咗去公園嘅展望台，睇櫻花、「忠靈塔」同「富士山」一齊同框嘅畫面，而「新倉富士淺間神社」同「新倉山淺間公園」其實係相連嘅景點
大家都想去嘅展望台，係位於「富士吉田市」管理的「新倉山淺間公園」內，但要去嗰度，就必須經過「新倉富士淺間神社」
所以我哋今次都會參觀埋神社
由神社嘅入口往前行，已經見到部份櫻花樹，但櫻花都未開得好明顯
呢度大約有650棵櫻花樹（主要係染井吉野櫻），開滿時成個公園會變成一片粉紅色花海
我哋就跟住人潮一路往上行，好彩4月仲未係好熱嘅天氣，如果唔係真要了我老命🤣
往上行冇幾耐就見到一座鳥居，鳥居上懸掛著一塊匾額，上面寫著 ～
『三國第一山』
詳細嘅意思就係:（神社於807年被平城天皇賜封為『三國第一山』」），意思係『富士山係世界第一山嶽』，『三國』指的是「日本」、「中國」和「印度」
整張近鏡俾大家睇得清楚啲
呢度向下望，已經見到「富士吉田市」
還有龐大嘅「富士山」
樓梯唔算難行，慢慢行點都會行到💪
沿著參道往上行，大約行90級樓梯後，又會見到一座朱紅色嘅鳥居，鳥居高高聳立在平台上
穿過鳥居回頭望，就可以見到鳥居對面嘅「富士山」。鳥居就好似畫框，將「富士山」框在眼前，呢個位置係頗受歡迎嘅影相打卡位
當然亦可以用唔同角度，去影鳥居同「富士山」
有積雪嘅「富士山」份外迷人
今次旅程，連續3日都見到「富士山」，我兩實在太好運氣✌️
呢度望出去嘅景色亦好靚，仲有望遠鏡，可以超近距離欣賞「富士山」
影「富士山」真係影極都唔夠
一步三回頭，都要影低「富士山」嘅美景
跟住見到嘅係，神社參道上供奉嘅『狛犬像』
由參道上嚟就係一大個廣場，最先見到嘅係 ~
鹽釜神社
據說可以保佑平安產子、育兒、多子多福嘅神
跟住再向前行，就見到停咗幾架小食、飲品販賣車，但係如果唔係櫻花季，就唔知仲有冇呢類餐車停泊
過咗「鹽釜神社」之後，跟住就見到 ~
子育て神木
呢棵柏樹高約25.5米，樹根週長約5.05公尺，柏樹離地面約2.5公尺處分成兩根樹幹，中間生長著一棵幼小的杉樹，因此被稱為「子育て神木」，據講喺度祈禱，可以保佑孩子健康成長同順利分娩㗎
跟住再一路前行就見到 ~
三国第一山 富士浅間神社 御由緒の碑
神社自古以來就有每60年更換神靈衣服嘅習俗，若果嗰年為吉年，就會舉行盛大嘅換衣儀式，並樹立此碑以資紀念
沿著「鹽釜神社」向前行大約50米，就可以見到『正殿』了。『正殿』右邊嘅建築係 ~
神樂殿
左邊就係『手水屋』（淨水泉）同埋神社事務處，經常可以睇到遊客喺神社事務處領取護身符
「新倉富士淺間神社」已經有超過1300年歷史，建於公元705年，係為了祭祀「甲斐國（而家山梨縣）八代郡新倉鄉」嘅氏神而建
神社主要祭拜嘅係木花咲耶姫命（代表櫻花、梅花同富士山之神）、大山祗命同瓊瓊杵尊
 |
| 圖片出自：fuji3po.com |
主殿裝潢華麗，有獅子、大像等各種雕刻，為神殿帶嚟莊嚴嘅感覺
抬頭望去，就見到氣勢恢宏嘅鬼瓦，據說可以驅除厄運同災難
神社嘅御朱印（收集印章）有普通款同每月替換款，仲有附有富士山插圖款，好有紀念價值。記住買個安產或家宅平安嘅御守做手信
 |
| 圖片出自：arakurafujisengen.com |
『正殿』後方左側，就有 ~
荒濱神社
據說為織布之神，因為織布時嘅線互相交纏，而家已被視為姻緣之神
由『正殿』沿路行返去「鹽釜神社」，就會見到另一條長長嘅樓梯，呢度就係 ~
咲くや姫階段
（即係櫻花公主階梯）由呢度可以行到上公園展望台
由呢度（海拔781公尺）到觀景台，要行398級樓梯，高低差約77公尺
爬上60級樓梯之後，跟住就會見到呢條斜坡路，斜坡 路同樣可以通往展望台，唔想行樓梯可以選擇行斜坡路，（不過我認為行上去，行樓梯會更好，如果落返嚟，可以考慮行下坡路，應該會輕鬆啲🤗
行樓梯行到半山腰，就會見到 ~
愛宕神社
係祭祀防火、防盜之神
慢慢行樓梯上去大概需要10分鐘左右，（行斜坡路就要15分鐘），沿途都係一步三回頭去欣賞「富士山」😁
呢度嘅高度望過去影相會更靚
山腳下嘅「富士吉田市」就在眼前
上到嚟見到四週圍都係人頭湧湧📢😥
「新倉富士淺間公園」裏面最標誌性嘅建築就係忠靈塔（五重塔）
喺1962年為咗祭祀戰死將士，而建造呢座慰靈塔
塔高約19.5公尺，其設計靈感來自於「大阪」歷史悠久嘅「四天王寺」五重塔
呢座「忠靈塔」可以話係公園嘅象徵地標
行樓梯行到氣咳上到嚟，還仲有一大考驗 ~ 就係排隊
見到展望台上面嘅人群嗎？假如要上展望台影相，就要排隊
櫻花祭期間，真係超級多人，尤其喺展望台，今次上到嚟要實施人流管制（每次只放50-70人上去展望台5分鐘影相）😨
其實等都冇所謂，但係你哋知條龍尾去到邊嗎？
係幾乎排返落山，真係超級誇張！
咁嘅情況可能最少都要排個幾兩個鐘😨😨😨
咁我哋唯有喺附近周圍影下相，花咁多時間影張打卡相，值唔值就真係見仁見智🤔
呢度四季景致分明，除咗春天有櫻花，夏天呢度就會綠意盈盈、秋天紅葉就火紅一片、冬天嘅白雪就如同童話世界一樣，而且日夜景式各異，呢度更被選為『日本夜景100選』之一
眾裏尋他，見到有一棵開得比較茂盛嘅櫻花
有櫻花、有積雪嘅「富士山」，實在太有日本氛圍感
而且呢種氛圍感，仲係帶住一啲浪漫情懷💑
「忠靈塔」與「富士山」加櫻花一齊嘅美景，讓此處成為聞名國際嘅影相打卡熱點，（呢張相係停車送嘅Postcard）😅
📌櫻花季預計於2025年4月1日(星期二)至4月18日(星期五)舉行
📌會場附近的「新倉山淺間公園停車場」將無法使用
📌要將車停放在「下吉田第二小學校」園內等臨時停車場（開放時間:06:00~18:00）
📌居住在富士吉田市以外的人需要繳交停車費（標準房車:1,000日圓、電單車:500日圓）
📌觀景台不實行預約制
📌當觀景台人潮較多時，每5分鐘將輪流接待約70人
📌觀景台上禁止飲食、禁止使用三腳架、禁止佔據特定區域
📌請將垃圾帶走
🔽方式一
➤從「東京」要去「河口湖」最方便的方式就是搭乘《特急富士回遊號（FUJI EXCURSION）》前往，《特急富士回遊號》每日行駛四趟往返列車（根據季節增設一趟特別往返列車），從「新宿」（部分列車從「千葉」出發）出發，直達《富士急行線「河口湖站」》
👇主要車站的總票價（單程）
📍新宿站～下吉田站： 3,940日元（火車票2,320日元、特快票1,620日元）
📍新宿站～河口湖站： 4,130日元（火車票2,510日元、特快票1,620日元）
📍（行車時間：最快只要1小時53分鐘）
👉可連結官網查閱《特急富士回遊號（FUJI EXCURSION）》 ➤《富士急行線》是「JR大月車站」連接「河口湖車站」之鐵道，沿途有18個車站，是暢遊「富士山」的主要鐵路
👉可連結官網查閱《富士急行線》所經之車站
🔽方式二
➤高速巴士（新宿、東京、羽田機場）
➤主要的高速巴士從「新宿巴士總站」和「東京車站」（因巴士公司不同有從「鐵鋼大樓」和「八重洲巴士總站」）出發，也有從「羽田機場」經由「品川」的班次，非常方便
👇主要車站的總票價（單程）
📍大人 2,200日圓, 兒童 1,100日圓 （行車時間：約1小時45分）
👉可連結官網查閱Highway-buses.jp
🔽方式三
➤JR東日本中央線快速列車＋富士急行線
搭乘《中央線》的普通列車或特急列車至「JR大月站」，再轉乘《富士急行線》（上面方式一有講述）前往「河口湖」，這種方式較花時間又貴且需轉乘
下一篇係講喺「河口湖」入住嘅酒店 ~
（詳情請點擊連結觀看）
也謝謝您的觀看💗
發佈留言