山梨縣 ~ 「北口本宮富士淺間神社」有1900年歷史！富士山信仰聖地

「北口本宮富士淺間神社」有1900年歷史咁耐，係『世界文化遺產富士山』嘅一部分。踏入神社範圍，首先會見到超巨大嘅「富士第一大鳥居」，呢個係日本最大嘅木造鳥居，穿過鳥居之後，感覺即刻唔同咗，好似進入咗另一個神聖世界咁，而神社境內有樹齡超過1000年嘅神木「富士太郎杉」同「富士夫婦檜」，都係非常值得參觀.....

今次嚟「山梨縣」除咗睇最夢寐以求嘅「富士山」，其次就係參觀一些很受歡迎嘅神社，例如之前寫過嘅「河口湖淺間神社」、「新倉富士淺間神社」，以及今次講述嘅呢一篇 ～

北口本宮富士淺間神社

景點資訊

地址：山梨縣富士吉田市上吉田 5558

電話：0555-22-0221

開放時間：8:30-17:00

門票收費：免費

停車收費：免費

公共交通：
從「富士山站」搭乘巴士（A-line或C-line）前往「浅間神社前站」下車即可 🔔📌從「東京」要去「富士山河口湖」的方式，請看本文尾段

神社喺唔同位置都設有停車場，非常方便信眾參拜

「北口本宮富士淺間神社」停車場

🔽停車場1（P1）浅間神社 大型駐車場
➤可停泊約50輛汽車（可停放大型巴士）
➤ 📍MAPCODE： 161 185 356 *86
🔽停車場2（P2）北口本宫富士浅間神社 第２駐車場
➤ 📍MAPCODE：161 185 351 *31
🔽停車場3（P3）北口本宫富士浅間神社 P3駐車場
➤可停泊約10輛汽車（巴士僅可臨時停靠）
➤ 📍MAPCODE： 161 185 196 *64
🔽停車場4（P4）北口本宫富士浅間神社 P4駐車場
➤可停泊約20輛汽車（可停放中型巴士）
➤ 📍MAPCODE：161 185 196 *51
🔽停車場5（P5）北口本宫富士浅間神社 第５駐車場
➤可停泊約20輛汽車
➤ 📍MAPCODE：161 185 101 *48
🔽停車場6（P6）北口本宫富士浅間神社 第６駐車場
➤可停泊約20輛汽車
➤ 📍MAPCODE：161 185 071 *57
🔽停車場7（P7）北口本宫富士浅間神社 第７駐車場
➤可停泊約10輛汽車
➤ 📍MAPCODE：161 185 014 *14

我哋就將車停喺較遠嘅 ~ 

停車場1（P1）浅間神社 大型駐車場Asamajinja Ogata Parking Lot

（方便我哋睇神社非常有名嘅參道），由停車場過馬路就見到 ～

北口本宮富士淺間神社 第一大鳥居⛩️

大鳥居並非神社大門，而是建於1480年，用嚟祭拜「富士山」🏔️嘅鳥居，所以牌匾上係寫著「富士山」。呢個鳥居係神明鳥居⛩️，外面用銅板包裹著

同時呢個鳥居，亦係日本最大嘅木造鳥居⛩️，高達18米，真係超級壯觀😧

呢度亦係「富士山吉田口登山道」嘅起點，神社後面就係「登山門」

喺外面已經感受到神社樹木嘅威武，每棵樹都超級高大

穿過鳥居之後，眼前就係 ～

北口本宮冨士浅間神社 参道

喺參道上感覺即刻唔同咗，好似進入咗另一個神聖世界咁😇

亦有人將呢度同「熊本~上色見熊野座神社」嘅參道相提並論

不過講氣場，就真係「熊本~上色見熊野座神社」更強大，有機會大家都要去一次，感受下嗰種氣場強勁嘅感覺😳

有興趣去「熊本~上色見熊野座神社」，記得睇埋以上呢篇

（可點擊連結觀看）

「上色見熊野座神社」嘅樓梯真係唔易行，唔似呢度係平地咁好行，所以兩者始終係有分別嘅

不過呢度嘅樹木其實真係幾高壯，同「上色見熊野座神社」真係有得比併

就算用超廣角鏡頭，都只係勉強影到成棵樹

參道上嘅燈籠，令整體氣氛更莊嚴、神聖

加上一啲紀念碑嘅造型，講真.....真係有啲.....🙄一言難盡😅

 某些視覺，又真係幾似置身在「上色見熊野座神社」

參道全長約250公尺，由於有高樹遮陰，就算大太陽亦唔驚曬親

夏天行時可能會更舒服，有大自然嘅遮陽物擋住

我真係超級鐘意影樹木，所以台灣嘅「阿里山」、尤其當年千里迢迢，揸車去「塔塔加」影「夫妻樹」（嗰陣影到兩棵，可惜而家得番一棵），仲有「北海道」咁多影樹木嘅景點、更加唔會忘記同樣山長水遠，揸車去嘅「滋賀~牧野町水杉並木」、「靜岡~三保松原」，都係我十分喜歡嘅地方

每個地方嘅樹木姿態都唔一樣，就好似樹木本身，用身軀表達心情一樣

有好多神社，都唔接受商業性質嘅影相，例如婚紗攝影、廣告攝影.....等，「北口本宮富士淺間神社」亦不例外

跟住見到幾塊石同一塊告示板，原來呢度係 ～

角行の立行石

呢塊石係日本『國家指定史蹟富士山』元素，此石立於1610年（慶長15年）冬天，當年一位祖師為咗祭拜「富士山」嘅神靈，他冒著嚴寒，赤身裸體，踮著腳尖在石頭上苦行了30天，進行嚴格嘅修行。據說他因此全身出血，在村民的勸說下，才停止了苦行

跟住再行前少少嘅另一邊就見到 ～

仁王門礎石

原先寺院嘅位置所殘存嘅遺跡

差不多走完參道就見到 ～

北口本宮冨士浅間神社駐車場P4

參道嘅盡頭就係 ～

北口本宮富士淺間神社 大鳥居

「北口本宮富士淺間神社」嘅歷史真係好悠久，有成1900幾年歷史咁耐，係『世界文化遺產富士山』嘅一部分

呢個先係屬於神社嘅大鳥居

過咗鳥居嘅左邊會見到 ～

福地八幡社

呢座幡社被指定為『國家重要文化財產』。供奉的神祇是第十五代應神天皇本田醒命

在鳥居嘅右邊就有 ～

冨士守稲荷社

供奉神明係：宇賀禦魂

布條寫著以下嘅祝福：生意興隆、居家平安、出遊平安

大鳥居旁邊亦有告示板，寫咗詳細嘅解說

穿過鳥居之後就見到 ～

北口本宮富士淺間神社 隨神門

前些時候可能仲有落雪，地上嘅積雪都未完全溶化

「隨神門」亦係重要文化遺產，兩則亦設有神像~櫛門戸神、业磐門户神

穿過「隨神門」，就正式進入到寺院範圍

神社傳說係『日本武尊』為供奉「富士山」而設嘅遙拜所，自古以來日本人就將「富士山」視為神聖嘅靈山，而呢間神社就係「富士山」信仰嘅重要據點

跟住見到嘅係 ~

手水舎

神社境內有樹齡超過1000年嘅神木「富士太郎杉」同「富士夫婦檜」

下圖見到嘅係 ～ 

富士太郎杉

「富士太郎杉」係一棵樹幹周長8.2米、高30米嘅巨大杉樹

 喺「富士太郎杉」旁邊嘅就係 ~

神樂殿

神社供奉嘅係「富士山」同火山女神——木花咲耶姫，佢係位美貌女神，據說拜佢可以祈求戀愛圓滿、得到良緣，仲有事業繁榮等好處，所以特別受女性參拜者歡迎！

而「富士夫婦檜」就係「神樂殿」另一邊

「富士夫婦檜」因為樹幹交錯重疊，好似夫婦互相依偎而得名

企喺呢啲千年古樹下面，真係會感受到大自然嘅震撼力

「納経所」裡有御守及繪馬售賣

喺呢到又見到一個停車場 ~ 

北口本宫富士浅間神社 第５駐車場(P 5)

喺「富士夫婦檜」旁邊，有很多座細小嘅宮社

這些宮社依順序，包括有天満宮、国津神社、天津神社、愛宕社、日隆社、日枝社、倭四柱社、池鯉鮒社、日之御子社

呢啲宮社一路延伸至吉田口登山道

行到去最尾就見到

登山門(鳥居)

祖霊社

喺「登山門(鳥居)」旁邊見到 ～

北口本宮冨士浅間神社 西宮本殿

我哋又沿路返去「神樂殿」嗰邊，見到呢棵不知名嘅樹，造型非常特別

我哋慢慢行返去「神樂殿」，跟住再行去「諏訪神社」嗰邊，睇另外一對樹木

沿途見到嘅係 ~

三殿社、神変大菩薩

好快就行到嚟 ～

諏訪神社

「諏訪神社」前有兩棵大杉，左側那棵杉樹樹幹週長9.4米，高度就有41米，推測樹齡超過300年，非常雄偉壯觀，其底部供奉著「和津神社」

右側大杉樹幹週長5.4米，樹高36米，推測樹齡同樣超過300年

神社裏面真係非常多樹木，又見到一堆未溶嘅積雪，

成個神社境內有11座建築物被指定為『日本國家重要文化財產』，真係每一步都係歷史！非常值得參觀

每年7月1日，神社會舉行「富士山登山祭」，宣告「富士山」登山季節開始，而8月26日同27日就會舉行『火祭』作為登山季節結束嘅儀式。呢個『火祭』仲被稱為『日本三奇祭』之一，場面非常震撼，各位如果秋天嚟到嘅話，都唔好錯過哦

從「東京」要去「富士山河口湖」的方式

🔽方式一
➤從「東京」要去「河口湖」最方便的方式就是搭乘《特急富士回遊號（FUJI EXCURSION）》前往，《特急富士回遊號》每日行駛四趟往返列車（根據季節增設一趟特別往返列車），從「新宿」（部分列車從「千葉」出發）出發，直達《富士急行線「河口湖站」》
👇主要車站的總票價（單程）
📍新宿站～下吉田站：　3,940日元（火車票2,320日元、特快票1,620日元）
📍新宿站～河口湖站：　4,130日元（火車票2,510日元、特快票1,620日元）
📍（行車時間：最快只要1小時53分鐘）
👉可連結官網查閱《特急富士回遊號（FUJI EXCURSION）》
➤《富士急行線》是「JR大月車站」連接「河口湖車站」之鐵道，沿途有18個車站，是暢遊「富士山」的主要鐵路
👉可連結官網查閱《富士急行線》所經之車站
🔽方式二
➤高速巴士（新宿、東京、羽田機場）
➤主要的高速巴士從「新宿巴士總站」和「東京車站」（因巴士公司不同有從「鐵鋼大樓」和「八重洲巴士總站」）出發，也有從「羽田機場」經由「品川」的班次，非常方便
👇主要車站的總票價（單程）
📍大人 2,200日圓, 兒童 1,100日圓 （行車時間：約1小時45分）
👉可連結官網查閱Highway-buses.jp

🔽方式三
➤JR東日本中央線快速列車＋富士急行線
搭乘《中央線》的普通列車或特急列車至「JR大月站」，再轉乘《富士急行線》（上面方式一有講述）前往「河口湖」，這種方式較花時間又貴且需轉乘

下一篇係 ~

忍野八海（富士山下嘅能量景點）、山中湖（富士五湖之一）長池親水公園」自駕遊篇

（詳情請點擊連結觀看）

謝謝您的觀看❤️

Share: