北海道自駕遊 ~ 【札幌美景、美食】二條市場、北海道大學（銀杏並木）、SAPPORO餃子製造所狸小路店、湯咖哩 Curry Soup S

呢篇會講我哋喺「札幌」嘅住宿、美食同部份景點，美食分別有「SAPPORO餃子製造所狸小路店」、「湯咖哩 Curry Soup S」、「二條市場（Donburi Chaya どんぶり茶屋）」，而美景就有「北海道大學（銀杏並木）」，另外亦會講下『星野集團』旗下「OMO3」同「OMO7」酒店嘅分別.....

寫完呢篇『北海道自駕遊』就完結了，今年1月份開始發佈第一篇「北海道」，到而家8月份，足足寫咗大半年先完成😓，平均7至10日一篇，無辦法得一對眼、一對手，寫到一篇其實都非常唔容易😥

💢言歸正傳，今次呢篇會集中講返之前喺「北海道札幌」嘅住宿、景點同美食

首先講下今次喺「札幌」住嘅酒店～

OMO3 札幌薄野 by 星野集團

但係唔需俾太多資料大家睇，因為呢間酒店已經係今年4月結束營運，而家寫返出嚟，只係想同大家分享下，『星野集團』旗下OMO系列酒店，3同7有咩分別，（因為係「旭川」我哋就住OMO7）

咁我哋就首先睇下「OMO3札幌」👇

酒店有自己嘅機械式停車場，雖然呢種泊車模式有高度限制，但係一般車應該都冇問題可以泊到

酒店大堂其實都非常唔錯，當然就冇OMO7咁富麗堂皇

其實我哋入住兩日，都見到有非常多人check in，真唔明白點解會停業

「札幌OMO3酒店」冇餐廳，但就有飲食補給站

如果訂房時揀咗包早餐，佢就每人會派1000日元餐券畀你，用餐券嘅二維碼結帳，就可以帶走食物

補給站全部都係自助式，如果冇餐券，可以用信用卡交易

基本上就等於一間便利店一樣，食物有杯杯湯、杯麵、飯糰、麵包、三文治、咖啡、雪糕、啤酒同各類果汁，連手信亦都有提供，而且價格唔貴，我哋一間房兩個人有2000日元餐劵，用嚟買早餐嘅麵包、咖啡，仲可以買埋宵夜嘅雪糕、零食、同手信💯

補給站裏面會有餐枱、櫈，同微波爐提供畀大家使用

跟住落嚟我哋就去睇下客房，上到樓層房間嘅走廊，亦都非常光猛、寬闊同整潔

入到房間關上門，就見到一個小型嘅掛衫區，呢個設計比「OMO7旭川」好太多👍

跟住就係洗手間，坐廁同浴室採用乾濕分離，亦係我最鐘意嘅設計

唔使喺浴缸跨出跨入，真係太方便，「OMO3札幌」洗手間嘅設計比「OMO7旭川」亦好太多了💯

不過房間就偏細，得15平方米左右，無太多空間可以走動

雖然房間細，但都有大大隻窗，令室內光線非常充足

床對面就有電視、寫字枱，設備都非常齊全，雖然房係細啲，但勝在價錢平，比「OMO7旭川」平一半，一晚房價連餐劵都係HK$669，非常超值

如果大家有興趣入住「OMO3」系列嘅酒店，而家喺「東京淺草、東京赤坂、京都東寺」仍有OMO3系列嘅酒店，可提供入住

圖片出自：hoshinoresorts.com

跟住就講下喺「札幌」住宿兩晚，我哋食過嘅美食、同部份之前未寫過嘅景點

住係「札幌」，大部份遊客都會去行 ~

狸小路商店街

從地鐵「大通站、薄野站」步行約3-5分鐘可到達

「狸小路」全長約900公尺，擁有約200間商店，不論藥妝、服飾或者餐廳應有盡有，呢度係「北海道」最古老嘅商店街，下圖見到嘅店舖係 ~

狸屋（北海道みやげたぬきや）

營業時間：

星期一至日09:30–21:30

呢間係「狸小路」較有特色嘅店舖，「狸屋」創業於 1916 年，極具歷史嘅手信店，店址位於「札幌狸小路商店街 4 丁目」，店面外巨大狸貓相當好認。除咗「北海道」知名手信外，「北海道」限定嘅角色周邊商品，有部份只有呢度可以買得到哦！

至於美食，就講一間喺「狸小路商店街」嘅餃子店 ~

SAPPORO餃子製造所狸小路店

景點資訊

地址：北海道札幌市中央区南2条西5-11-3（札幌狸小路商店街5丁目）

電話：81-11-252-0008

營業時間：
11:00～15:00；17:00～23:00

公共交通：
從札幌市電「資生館小學校前站」步行約4分鐘可到達

呢間店舖喺「札幌市」有多家分店，不過喺「狸小路」呢間，我覺得最就腳

店舖座位唔係太多，所以經常見到門外有人等位

廚房採用開放式，製作過程一眼睇曬

餐廳裏面有大大隻窗，可以一路食餃子，一邊睇住繁華嘅「狸小路」

餐枱上擺放咗各色調味料，用嚟配餃子食用就very nice👍

這家餐廳嘅最大特色。就係以獨特嘅製法，做出紮實且非常有咬口嘅餃子皮，無論煎、蒸、煮，點樣煮都會非常好味，而且餃子外型超級巨大

菜單上清一色都係餃子，可以將餃子造成套餐，配蕎麥麵或者白米飯都可以，另外呢度嘅「北海道」靈魂美食Zangi（北海道炸雞塊），配搭埋招牌餃子一齊享用就係絕配

至於餃子餡喺用「北海道」蔬菜同國產牛製成，味道極之鮮味，咁大粒餃子我驚煎會比較滯，所以我就食煮嘅餃子，感覺比較冇咁滯清爽啲

我家主子就食煎嘅餃子，其實煎都好好味，一啲都唔油膩，而且個皮又唔會太厚，最重要係個餡料真係好鮮味，連碗麵豉湯都有超級香甜嘅筍，飲落比普通麵豉湯更鮮甜，至於雞塊，佢唔係我哋食開用雞髀炸嗰種，而係用雞胸肉炸，但係一啲都唔柴同油膩，食落腸胃無咁大負擔

食飽飽就可以繼續喺附近散下步，除咗「狸小路商店街」，喺附近嘅～

Nikka Whiskey Sign（すすきのビルニッカ大看板）

亦係非常代表「札幌」嘅招牌

下圖嘅摩天輪，亦喺「札幌市」嘅一大亮點

大観覧車 Noria 札幌

景點資訊

地址：北海道札幌市中央區南3條西5丁目1-1

電話：81-11-261-8875

🔽營業時間：
➤星期日至四、假日11:00–23:00
➤星期五、六、假日前一天11:00–01:00

🔽門票收費：
➤成人1000日圓
➤小學生、國中生500日圓
➤※學齡前兒童免費

公共交通：
從地下鐵《南北線》「薄野（すすきの）站」步行約2分鐘即可到達

摩天輪位於「Norbesa（ノルベサ）」購物中心的 7 樓，有興趣的戀人們👩‍❤️‍👨，千萬不要錯過喺「札幌」夜空上嘅浪漫哦！

跟住就講另一間食店，嚟到「札幌」，當然要食下當地嘅特色美食 ~ 『湯咖哩』，原本我想試一啲大熱嘅湯咖哩餐廳，例如湯咖哩Suage+、 Rojiura Curry SAMURAI、湯咖哩 GARAKU，但係有時又唔想太刻意、同死板跟隨網絡推薦嘅餐廳，所以今次我就隨緣揀左路過嘅～

湯咖哩 Curry Soup S カレーショップエス

景點資訊

地址：札幌市中央区南3条西4丁目シルバービルB1F

電話：011-219-1235

營業時間：
星期四至二11:00–21:00；星期三休息

公共交通：
地下鐵《南北線》「薄野車站」2號出口步行1分鐘可到達

餐廳位於地庫1樓，可能睇個款，好多人都未必考慮入去食，但有時真係不能夠被外在蒙蔽哦😁

進入餐廳後所見到嘅等位區，非常有家嘅感覺，溫馨到令人十分有歸屬感

呢邊牆上面，亦有好多知名人士嘅相片同簽名

餐廳嘅座位唔算多，間隔尚算闊落，坐落唔覺太逼窄

呢度有中文餐牌提供

有中文餐牌會方便好多，因為order湯咖哩嘅程序都幾煩，要揀選咖哩湯嘅口味、飯嘅種類、咖哩嘅辣度、飯嘅份量、要唔要加配菜.....等，總之有中文睇就變得非常方便👍

我家主子叫咗個『鹿肉湯咖哩』😱，我就叫咗碟普通嘅巴基斯坦雞肉咖哩，我覺得非常好味😋，味道唔會似傳統日式咖哩偏甜，我自己本身超級鍾意食咖哩，真心覺得唔錯，而湯咖哩其實就係一個有咖哩味嘅湯，至於鹿肉，我家主子話同牛肉差唔多🙄，不過我哋嗌咗正常size份量嘅飯，點知食落都係太多，又唔想浪費就食到太飽了😥

喺「札幌」住兩晚嘅晚餐，就係食以上兩間食肆，而其中一日嘅早餐，我哋就去咗～

二條市場

景點資訊

地址：札幌市中央區南3條東1～東2丁目

電話：011-222-5308

🔽營業時間：
(⭐ 因店家而異) ➤07:00 至下午18:00（全年開放）

🔽公共交通：
➤從「狸小路商店街（1丁目）」出發步行1分鐘可到達
➤地下鐵《南北線》、《東西線》、《東豐線》「大通站」34號出口步行5分鐘可到達

🔽附近停車場：
➤Le Perc Sapporominami 2 Jo Higashi 1 #1（NTTル・パルク札幌南２条東１第１駐車場）步行86公尺1分鐘可到達
✅📍MAP CODE：949 370 2 *54
➤Sunshine Parking Lot（サンシャインパーキング）步行150公尺2分鐘可到達
✅📍MAP CODE：949 361 7 *07
➤ASAHI PARK 南2西1
✅📍MAP CODE：949 369 8 *06

我哋今次將架車泊喺～

Le Perc Sapporominami 2 Jo Higashi 1 #1（NTTル・パルク札幌南２条東１第１駐車場）

由呢度行過去「二條市場」非常近，89公尺就行到

停車收費：

（白天）08:00～20:00『20分鐘 200日元』